കെപിസിസി ജനറൽ സെക്രട്ടറി കെ സുരേന്ദ്രൻ അന്തരിച്ചു

കണ്ണൂർ: ദേശീയ തലത്തിൽ ഐഎൻടിയുസിയുടെ കരുത്തുറ്റ ശബ്ദങ്ങളിലൊന്നായ മുതിർന്ന കോൺഗ്രസ് നേതാവ് കെ സുരേന്ദ്രൻ (68) അന്തരിച്ചു. ഹൃദയാഘാതത്തെ തുടർന്ന് ഇന്ന് വൈകുന്നേരം കണ്ണൂർ ശ്രീ ചന്ദ് ആശുപത്രിയിൽ വെച്ചായിരുന്നു അന്ത്യം. ഐഎൻടിയുസിയുടെ ദേശീയ ജനറൽ സെക്രട്ടറിമാരിൽ ഒരാളായിരുന്ന സുരേന്ദ്രൻ രാജ്യമാകെ നടന്ന നിരവധി സംയുക്ത ട്രേഡ് യൂണിയൻ സമരങ്ങൾക്ക്‌ നേതൃത്വം നൽകിയിട്ടുണ്ട്.

Also Read: മിമിക്രിയിലൂടെ ഗിന്നസ് ബുക്കിൽ! താരമായി കാസർകോട്ടെ ഈ ബസ് ഡ്രൈവർ

കഴിഞ്ഞ പുന:സംഘടനയിൽ കണ്ണൂരിൽ നിന്നുള്ള കെപിസിസി ജനറൽ സെക്രട്ടറിമാരിലൊരാളായിരുന്നു സുരേന്ദ്രൻ. കണ്ണൂർ ജില്ലാ കോൺഗ്രസ് കമ്മിറ്റി മുൻ അധ്യക്ഷനുമായിരുന്നു. എപ്പോഴും പ്രസന്നവദനനായ കെ സുരേന്ദ്രൻ സംഘടനാപരമായ കഴിവ് തെളിയിച്ച വ്യക്തിത്വമായിരുന്നു. സാധാരണ തൊഴിലാളിയായി പൊതു പ്രവര്‍ത്തനത്തിനിറങ്ങിയ സുരേന്ദ്രനെ തേടി നിരവധി സ്ഥാനങ്ങള്‍ എത്തിയിട്ടുണ്ട്. കണ്ണൂർ ഡിസിസി പ്രസിഡന്റ് സ്ഥാനം ഒഴിഞ്ഞതിനു പിന്നാലെ തൊഴിലാളി മുന്നേറ്റത്തിനു കരുത്തു പകരുന്നതിനായി അദ്ദേഹത്തെ ഐഎന്‍ടിയുസി ദേശീയ ജനറല്‍ സെക്രട്ടറിയുമാക്കി.

Also Read: ഗർഭനിരോധന ഗുളികകളിൽ സയനൈഡ് ചേർത്ത് കൊലപാതകം!! 20ാം കേസിലും മോഹൻ കുറ്റക്കാരനെന്ന് കോടതി: ശിക്ഷ ബുധനാഴ്ച

കണ്ണൂർ ജില്ലയിലെ കോണ്‍ഗ്രസ് രാഷ്ട്രീയം ഗ്രൂപ്പ് വഴക്കിന്റെ പേരില്‍ കലങ്ങിമറഞ്ഞ കാലയളവിലാണ് ഡിസിസി പ്രസിഡന്റ് സ്ഥാനം പാര്‍ട്ടി സുരേന്ദ്രനെ ഏല്‍പ്പിക്കുന്നത്. പ്രതിസന്ധികളെ തരണം ചെയ്തും സിപിഎം രാഷ്ട്രീയത്തിനെതിരെ ശക്തമായ നിലപാടുകള്‍ ഉയര്‍ത്തിപ്പിടിച്ചുമാണ് പ്രസ്ഥാനത്തെ നയിച്ചത്. ഡിസിസി പ്രസിഡന്റ് സ്ഥാനം ഒഴിഞ്ഞ ശേഷവും കോണ്‍ഗ്രസ് വേദികളിലെ തീപ്പൊരി പ്രാസംഗികന്‍ കൂടിയായ കെ സുരേന്ദ്രന്‍ നിറസാന്നിധ്യമായി പാര്‍ട്ടി പ്രവര്‍ത്തനത്തിലുണ്ടായിരുന്നു. തമിഴ്, ഹിന്ദി, ഇംഗ്ലീഷ് ഭാഷകളിലും പ്രസംഗിക്കാനും വിഷയങ്ങള്‍ ആഴത്തില്‍ പഠിച്ച് കൈകാര്യം ചെയ്യുന്ന കോണ്‍ഗ്രസിലെ ചുരുക്കം നേതാക്കളില്‍ ഒരാളുമാണ് അദ്ദേഹം.

Also Read: ഭിന്നശേഷിയുള്ള വിദ്യാർഥികൾക്ക് ഓൺലൈൻ പഠനം സാധ്യമാകുന്നില്ല; പ്രത്യേക ക്ലാസുകള്‍ വേണമെന്ന് ആവശ്യം

കോൺഗ്രസ് നേതാവ് കെ സുരേന്ദ്രന്റെ നിര്യാണത്തിൽ മുഖ്യമന്ത്രി പിണറായി വിജയൻ അനുശോചിച്ചു. ഊർജസ്വലനായ പൊതുപ്രവർത്തകനും കക്ഷി വ്യത്യാസങ്ങൾക്കതീതമായി സൗഹൃദങ്ങൾ കാത്തുസൂക്ഷിച്ച ട്രേഡ് യൂണിയൻ നേതാവുമായിരുന്നു കെ സുരേന്ദ്രനെന്ന് മുഖ്യമന്ത്രി അനുശോചന സന്ദേശത്തിൽ പറഞ്ഞു.