ശിഹാബ് തങ്ങൾ ആംബുലൻസിൽ നിന്നും നിരോധിത പുകയില ഉൽപ്പന്നങ്ങൾ പിടിച്ച സംഭവം; ഗുഢാലോചനയെന്ന് മുസ്ലീം ലീഗ്

കണ്ണൂർ: ശിഹാബ് തങ്ങൾ മെമ്മോറിയൽ ആംബുലൻസിൽ നിന്നും നിരോധിത പുകയില ഉൽപ്പന്നങ്ങൾ പിടിച്ച സംഭവത്തിൽ വൻ ഗൂഢാലോചനയുണ്ടെന്ന് മുസ്ലീം ലീഗ് ജില്ലാ ജനറൽ സെക്രട്ടറി അബ്ദുൽ കരീംചേലേരി. സാധാരണയായി ആംബുലൻസിനൊപ്പം കണ്ണൂർ ജില്ലയിലെ രോഗികൾക്ക് മരുന്ന് കൂടി എത്തിക്കുന്ന സേവനം ആംബുലൻസ് ഡ്രൈവർ ചെയ്യാറുണ്ട്. പോലിസ് റെയ്ഡ് നടത്തുന്ന സമയത്തു തന്നെ ദ്യശ്യ മാധ്യമ പ്രവർത്തകർ സ്ഥലത്തെത്തിയത് ഗൂഢാലോചനയാണെന്നും അബ്ദുൽ കരീംചേലേരി ആരോപിച്ചു.

Also Read: അക്ഷരവൃക്ഷത്തില്‍ ലേഖനം; മലപ്പുറത്തിന് അഭിമാനമായി അമന്‍ഷാ

മുസ്ലിം ലീഗ്‌ നേതാവായിരുന്ന ശിഹാബ്‌ തങ്ങളുടെ പേരിലുള്ള ആംബുലൻസിൽ നിന്നും നിരോധിത പുകയില ഉൽപ്പന്നങ്ങൾ കണ്ടെത്തിയതാണ് വിവാദമായത്. മട്ടന്നൂരിലെ ശിഹാബ്‌ തങ്ങൾ റിലീഫ്‌ സെന്ററിന്റെ ആംബുലൻസിൽനിന്നാണ്‌ 90 പാക്കറ്റ്‌ നിരോധിത പുകയില വസ്‌തുക്കൾ കുമ്പള പോലീസ്‌ പിടികൂടിയത്‌. ഡ്രൈവർ മട്ടന്നൂർ മണ്ണൂർ പൊറോറ മുർഷിദ മൻസിലിലെ പി പി മുസാദിഖി (29) നെ അറസ്‌റ്റു‌ ചെയ്‌തിട്ടുണ്ട്. രഹസ്യ വിവരത്തെതുടർന്ന്‌ കുമ്പള എസ്‌ഐ എ സന്തോഷ്‌ കുമാറിന്റെ നേതൃത്വത്തിലുള്ള സംഘം കുമ്പള ആരിക്കാടിയിൽ വെച്ച്‌ തിങ്കളാഴ്‌ച വൈകിട്ടാണ്‌ കെഎൽ 58 ടി 241 നമ്പർ ആംബുലൻസിൽ കടത്തുകയായിരുന്ന ലഹരി വസ്‌തുക്കൾ പിടികൂടിയത്‌.

Also Read: കൊറോണക്കാലത്ത് നാട്ടുകാര്‍ക്ക് പ്രിയങ്കരിയായി മാറിയ മലപ്പുറത്തെ പ്ലസ്ടൂകാരി

ഉപ്പളയിൽ നിന്നാണ്‌ ലഹരിവസ്‌തുക്കൾ കയറ്റിയത്‌. പോലീസ്‌ കസ്‌റ്റഡിയിലെടുത്ത ആംബുലൻസിലെ രോഗികളെ മറ്റൊരു ആംബുലൻസിൽ മട്ടന്നൂരിലേക്ക്‌ അയച്ചു. ഡ്രൈവർക്കെതിരെ കേസെടുത്തിട്ടുണ്ട്. ഈ സംഭവത്തെ തുടർന്ന് മുസ്ലീം ലീഗിന്റെ സേവന പ്രവർത്തനങ്ങളെ അപകീർത്തിപ്പെടുത്തിക്കൊണ്ട് സോഷ്യൽ മീഡിയയിൽ രാഷ്ട്രീയ എതിരാളികൾ കടുത്ത പ്രചാരണമാണ് അഴിച്ചുവിടുന്നത്. ഇതിനെ തുടർന്നാണ് മുസ്ലീം ലീഗ് നേതൃത്വം വിശദീകരണവുമായി രംഗത്തുവന്നത്.

Also Read: കോഴിക്കോട് വീണ്ടും അതിഥി തൊഴിലാളികളുടെ പ്രതിഷേധം, പോലീസ് ലാത്തിവീശി