പി കെ കുഞ്ഞനന്തന് പിറന്ന നാടിൻ്റെ യാത്രാമൊഴി; പാനൂരിൽ ഹർത്താൽ

തലശ്ശേരി: സിപിഎം പാനൂർ ഏരിയാ കമ്മിറ്റിയംഗം പി കെ കുഞ്ഞനന്തന് ജന്മനാടിൻ്റെ യാത്രാമൊഴി. പാനൂര്‍ ഏരിയാ കമ്മിറ്റി ഓഫീസിലും പാറാട് ടൗണിലും പൊതുദര്‍ശനത്തിനു വെച്ച മൃതദേഹം ഉച്ചക്ക് ഒരു മണിയോടെ വീട്ട് വളപ്പില്‍ സംസ്‌ക്കരിച്ചു.

Also Read: മംഗളൂരുവില്‍ കൊവിഡ് ബാധിച്ച യുവതി പ്രസവിച്ചു; കുട്ടി ആരോഗ്യവാനാണെന്ന് അധികൃതര്‍

ഇന്ന് രാവിലെ എട്ടു മണിയോടെയാണ് പി കെ കുഞ്ഞനന്തൻ്റെ മൃതദേഹം സിപിഎം പാനൂര്‍ ഏരിയാ കമ്മിറ്റി ഓഫീസിലെത്തിച്ചത്. പാനൂരിലേക്കുള്ള യാത്രാമധ്യേ ഒഞ്ചിയത്ത് സിപിഎം നേതാക്കളായ സംസ്ഥാന കമ്മിറ്റിഅംഗം പി സതീദേവി, ഏരിയാ സെക്രട്ടറി ടി പി ബിനീഷ് എന്നിവരുടെ നേതൃത്വത്തില്‍ പ്രവര്‍ത്തകര്‍ അന്ത്യാഞ്ജലി അര്‍പ്പിച്ചു. പാനൂര്‍ ഏരിയാ കമ്മിറ്റി ഓഫീസില്‍ പൊതുദര്‍ശനത്തിന് വെച്ച മൃതദേഹത്തില്‍ സിപിഎം നേതാക്കളായ പി കെ ശ്രീമതി ടീച്ചര്‍, എം വിജയരാജന്‍, പി ജയരാജന്‍, കെ പി സഹദേവന്‍, കെ കെ രാഗേഷ് എം പി, എ എന്‍ ഷംസീര്‍ എംഎല്‍എ, സിപിഐ നേതാവ് സി എന്‍ ചന്ദ്രന്‍ തുടങ്ങിയവര്‍ അന്ത്യാഞ്ജലി അര്‍പ്പിച്ചു. മുഖ്യമന്ത്രിക്ക് വേണ്ടി മണ്ഡലം പ്രതിനിധി പി ബാലന്‍ റീത്ത് സമര്‍പ്പിച്ചു.

Also Read: അട്ടിമറിയുണ്ടായില്ല! ചങ്ങനാശേരിയിൽ ഭരണം നിലനിർത്തി യുഡിഎഫ്; സാജൻ ഫ്രാൻസിസ് ചെയർമാൻ

പാറാട്ട് ടൗണിലും നിരവധി പേര്‍ അന്ത്യാഞ്ജലി അര്‍പ്പിക്കാനെത്തി. ഉച്ചയ്ക്ക് 12 മണിയോടെ മൃതദേഹം പാറാട്ടെ വീട്ടിലെത്തിച്ചു. അടുത്ത ബന്ധുക്കളും അയല്‍വാസികളും അന്തിമോപചാരമര്‍പ്പിച്ചു. തുടര്‍ന്ന് ഒരു മണിയോടെ മൃതദേഹം വീട്ടുവളപ്പില്‍ സംസ്‌കരിച്ചു. കൊവിഡ് പ്രോട്ടോക്കോള്‍ പാലിച്ചായിരുന്നു പൊതുദര്‍ശനവും സംസ്‌കാരച്ചടങ്ങും നടത്തിയത്. സംസ്‌കാരശേഷം അനുശോചന യോഗവും ചേര്‍ന്നു. കുഞ്ഞനന്തനോടുള്ള ആദരസൂചകമായി പാനൂര്‍ ടൗണിലും കുന്നോത്ത് പറമ്പ് പഞ്ചായത്തിലും ഹര്‍ത്താല്‍ ആചരിച്ചു.

Also Read: കശുവണ്ടി ഫാക്ടറി ഉടമയുടെ ആത്മഹത്യ; കൊല്ലത്ത് പ്രതിഷേധം, ബാങ്കിനു മുന്നിൽ പ്രതീകാത്മക ആത്മഹത്യാ സമരം