മാഹി: കൊവിഡ് 19 പ്രതിരോധ സെസ് പിരിക്കുന്നതിന്റെ ഭാഗമായി പുതുച്ചേരി സംസ്ഥാനത്തിൽ ഉൾപ്പെടുന്ന മയ്യഴിയിൽ പെട്രോൾ, ഡീസൽ ഇന്ധനങ്ങൾക്ക് വില കൂട്ടി. കൊവിഡ് സെസ് എന്ന രീതിയിലാണ് പുതുച്ചേരി സംസ്ഥാനത്ത് മുഴുവൻ ഇന്ധന വില കൂട്ടുന്നതെന്ന് മുഖ്യമന്ത്രി വി.നാരായണസ്വാമി അറിയിച്ചു. ഇതോടൊപ്പം പുതുച്ചേരി സംസ്ഥാനത്ത് മദ്യത്തിനും വില കൂട്ടാൻ നീക്കം നടക്കുന്നുണ്ട്. കൊവിഡ് ലോക്ക് ഡൗൺ കഴിഞ്ഞാൽ ഉടൻ മാഹി ഉൾപ്പെടുന്ന പുതുച്ചേരി സംസ്ഥാനത്ത് മദ്യത്തിന്റെ വില കുത്തനെ കൂടുമെന്നാണ് സൂചന.
ഇപ്പോൾ കൊവിഡ് ദുരിതാശ്വാസ നിധിയിലേക്ക് അടിയന്തിരമായി പണം സംഭരിക്കാനാണ് പുതുച്ചേരി സർക്കാർ ഇന്ധനനികുതി വർധിപ്പിച്ചത്. ഒരു ശതമാനമാണ് വർധനവ് – ഇതോടെ പെട്രോളിനും, ഡീസലിനും മാഹിയിൽ 70 പൈസയുടെ വർധനവ് വരും. പെട്രോളിന് 21.15 % വിൽപ്പന നികുതിയുള്ളത് 22.15 % ആയും, ഡീസൽ 17.15 % എന്നത് 18.15 % ആയും ഉയർത്തി, വില വർധനവ് വെള്ളിയാഴ്ച്ച മുതൽ നിലവിൽ വന്നു. മാഹിയിൽ കഴിഞ്ഞ ദിവസത്തെ പെട്രോൾ വില 67.81 രൂപയും, ഡീസലിന് 63.65 രൂപയുമാണ്.
നിലവിൽ കേരളത്തിലേതിനേക്കാൾ പെട്രോളിന് 3.86 രൂപയും, ഡീസലിന് 2.32 രൂപയും മാഹിയിൽ കുറവായിരുന്നു. കണ്ണൂരിൽ കഴിഞ്ഞ ദിവസത്തെ പെട്രോൾ വില 71.67 രൂപയും, ഡീസലിന് 65.97 രൂപയുമാണ്. മാഹിയിലെ പുതിയ വില നിരക്ക്. പെട്രോൾ: 68.37, ഡീസൽ 64.20 എന്നിങ്ങനെയാണ്. കണ്ണൂരിൽ നിന്നും കോഴിക്കോട് ഭാഗത്തേക്ക് പോകുന്ന ചരക്ക് വാഹനങ്ങൾ ദീർഘദൂര ബസുകൾ, സ്വകാര്യ വാഹനങ്ങൾ എന്നിവ ഇന്ധനം സംഭരിച്ചു വയ്ക്കുന്നത് മയ്യഴിയിലെ പമ്പുകളിൽ നിന്നാണ്. എന്നാൽ ഇപ്പോഴുണ്ടായ വില വർധനവ് വാഹന ഉടമകൾക്ക് അധികഭാരം നൽകിയിരിക്കുകയാണ്.