ഇതാണോ ഒരു എയർപോർട് റോഡ്... ആരോട് പറയാൻ ആര് കേൾക്കാൻ, പരിഹാരമായില്ലെങ്കില്‍ ഇരിക്കൂറില്‍ ട്വന്‍റി 20 മോഡല്‍ സ്ഥാനാര്‍ത്ഥി

ഈ മേഖലയിലെ ആദ്യകാല റോഡുകളിൽ ഒന്നാണ് ഇത്. കൊയ്യം ഗവണ്മെന്‍റ് ഹയർ സെക്കൻഡറി സ്‌കൂൾ, കൊയ്യം മർകസ് തുടങ്ങിയ സ്ഥാപനങ്ങൾ ഈ റൂട്ടിലാണ്. ഈ റോഡ് നേരെ ചെന്നെത്തുക മയ്യിൽ എന്ന പ്രദേശത്താണ്. മറ്റു റോഡുകൾ അപേക്ഷിച്ചു വിമാനത്താവളത്തിലേക്ക് പോകുന്നവർക് ഏറ്റവും എളുപ്പത്തിൽ എത്താനുള്ള മാർഗമാണ് ഇത്. ഇതിനു സമീപത്തുള്ള മറ്റ് റോഡുകൾ മെക്കാഡം ടാർ ചെയ്തിട്ടും എന്തിനാണ് ഇതിനോട് മാത്രം ഇത്രേം അവഗണന എന്നാണ് നാട്ടുകാർ ചോദിക്കുന്നത്. നടന്നു പോകാനുള്ള സൗകര്യം പോലുമില്ലെന്നും നാട്ടുകാർ പറഞ്ഞു.

വീതിയില്ലാത്തത് കാരണം ഈ റോഡിൽ അപകടങ്ങൾ ഏറെയാണ്. നാട്ടുകാര്‍ക്ക് കാല്‍ നടയായി പോലും സഞ്ചരിക്കാൻ കഴിയാത്ത അവസ്ഥയാണ് നിലവിലുള്ളത്. ഇതിന്‍റെ ഒരു ഭാഗം പുഴയുമാണ്. അതുകൊണ്ട് തന്നെ സൈഡ് ഒതുക്കി പോകാമെന്ന് വിചാരിച്ചാൽ തന്നെ ചിലപ്പോൾ അടുത്ത കാൽവെപ്പ് പുഴയിലായിരിക്കും.

റോഡിന്‍റെ ശോചനീയവസ്ഥയിൽ പ്രതിഷേധിച്ചു കാളവണ്ടി സമരവും നടത്തിയിരുന്നു. ഏറെ ജനശ്രദ്ധയാകൃഷിച്ച വേറിട്ട ഒരു സമരമുറയായിരുന്നു ഈ കാളവണ്ടിസമരം. കാളവണ്ടികൂടാതെ ടയർ ഉരുട്ടുകയും, കളിപ്പാട്ടവണ്ടി വലിക്കുകയും ചെയ്തിരുന്നു. പുറത്തു നിന്നും കാളവണ്ടിയെത്തിച്ചാണ് നാട്ടുകാർ പ്രതിഷേധിച്ചത്.

കാളവണ്ടി സമരത്തിലൂടെ ജനങ്ങളുടെയും നേതാക്കളുടെയും ശ്രദ്ധ പിടിച്ചുപറ്റാനായി. സംഭവം ഗതാഗത മന്ത്രി ജി സുധാകരന്റെ ശ്രദ്ധയിൽപ്പെട്ടതോടെ ഇരിക്കൂർ മണ്ഡലത്തിലെ റോഡ് വികസനത്തിനായി തളിപ്പറമ്പ എം എൽ എ ഇടപെടണമെന്ന് അദ്ദേഹം ആവശ്യപ്പെടുകയായിരുന്നു. തുടർന്ന് എംഎൽഎ യുമായി നടത്തിയ ചർച്ചയിൽ താൽകാലികമായി ടാർ ചെയ്യുകയാണ് ഉണ്ടോയത്.

റോഡ് പണിയരംഭിക്കുന്നതുവരെ സമരം തുടരുമെന്ന് നാട്ടുകാർ പറഞ്ഞു. അതിന്‍റെ ഭാഗമായി വളക്കൈ മുതൽ കൊയ്യാം വരെ പോസ്റ്റർ പ്രദർശിപ്പിക്കാനും, സമൂഹ മാധ്യമങ്ങളിലൂടെ ട്രോളുകൾ പ്രചരിപ്പിക്കാനുമാണ് പദ്ധതിയെന്ന് ഓഫ് റോഡ് വാട്‌സ്ആപ്പ് കൂട്ടായ്മ പ്രതിനിധികൾ പറഞ്ഞു.

നിലവിൽ ഫേസ്ബുക്കിൽ ഓഫ് റോഡ് എന്ന ഹാഷ്ടാഗ് കൂട്ടായ്മ പ്രവർത്തിക്കുന്നുണ്ട്. ഇതിലൂടെയാണ് ട്രോളുകളും മറ്റും സമൂഹ മാധ്യമങ്ങളിൽ പ്രചരിപ്പിക്കുന്നത്. കൂടാതെ ഓഫ് റോഡ് എന്ന പേരിൽ വാട്സാപ് കൂട്ടായ്മയും ഉണ്ട്. ഈ കൂട്ടായ്മയാണ് പ്രതിഷേധങ്ങൾക്ക് ഉൾപ്പെടെ നേതൃത്വം നൽകുന്നത്. പി കെ ജയകുമാർ, കെ കെ ഷിബു, കെ സി ജിതേഷ്, ഷകീർ ക്യാപ്ട്ടൻ, പ്രമോദ് പെരിന്തലേരി, സലാം കൊയ്യം തുടങ്ങി 250ലേറെ പേരാണ് വാട്സാപ് ഗ്രൂപ്പിലുള്ളത്.

എറണാകുളം ജില്ലയിലെ കിഴക്കമ്പലം പഞ്ചായത്തിൽ കിറ്റക്സിന്‍റെ ട്വന്‍റി20 സ്ഥാനാര്‍ത്ഥിയെ നിര്‍ത്തിയത് പോലെ എയർ പോർട് റോഡ് മേക്കാടം റോഡ് ആക്കി ശാശ്വത പരിഹാരം ആയില്ലെങ്കിൽ വരുന്ന നിയമസഭാ തിരഞ്ഞെടുപ്പിലേക്ക് ഇരിക്കൂർ മണ്ഡലത്തിൽ ട്വന്‍റി20 മോഡൽ സ്ഥാനാർഥിയെ മത്സരിപ്പിക്കുമെന്നു നാട്ടുകാർ പറഞ്ഞു.