കണ്ണൂരില്‍ അങ്കം കെ സുധാകരനും ജയരാജനും തമ്മില്‍; പികെ രാഗേഷിനായി സുധാകരൻ ഇറങ്ങുന്നു, കൊവിഡ് കാലത്തും കണ്ണൂരിലെ ഹൈ വോള്‍ട്ടേജ് രാഷ്ട്രീയത്തിന് ശമനമില്ല!!

സുധാകരനുമായുള്ള പ്രശ്നങ്ങൾ പറഞ്ഞു തീർത്ത് പികെ രാഗേഷ് സ്വന്തം തട്ടകമായ കോൺഗ്രസിലേക്ക് തിരിച്ചു വന്നതോടുകൂടിയാണ് മൂന്നേമുക്കാൽ കൊല്ലം നീണ്ട എൽഡിഎഫ് ഭരണം വീണത്. എന്നാൽ സുധാകരന്‍റെ മറുവശത്ത് എൽഡിഎഫിനായി ചാണക്യ തന്ത്രങ്ങൾ മെനയുന്നത് സിപിഎം ജില്ലാ സെക്രട്ടറി എംവി ജയരാജനാണ്. പി.ജയരാജനെപ്പോലെ അടിക്ക് തിരിച്ചടിയെന്ന ശൈലിയില്ലെങ്കിലും രക്തം പൊടിയാതെ എതിരാളികളുടെ കണക്ക് കൂട്ടലിനപ്പുറം പോയി വിജയം നേടാനുള്ള കരുത്ത് എം.വി ജയരാജനുണ്ട്.

മുസ്ലിം ലീഗ് വിമതൻ കെപിഎ സലിമിനെ തങ്ങൾക്കനുകൂലമായി വോട്ടു ചെയ്യിച്ച് കോർപറേഷൻ ഡെപ്യൂട്ടി മേയർ സ്ഥാനത്ത് അപ്രമാദിത്വത്തോടെ വിരാജിച്ചിരുന്ന പികെ രാഗേഷിനെ ഒറ്റ വോട്ടിന്‍റെ കരുത്തിൽ വീഴ്ത്താൻ ജയരാജനായി. അതു കൊണ്ടു തന്നെ വരുന്ന 12 ന് നടക്കുന്ന ഡെപ്യൂട്ടി ചെയർമാൻ തെരഞ്ഞെടുപ്പിൽ ജയരാജൻ ആവനാഴിയിൽ നിന്നും പുറത്തെടുക്കുന്ന അമ്പേതാണെന്ന പരിഭ്രമം യുഡിഎഫ് ക്യാംപിലുമുണ്ട്.

സിപിഐയിലെ വെള്ളോറ രാജനാണ് എൽഡിഎഫിന്‍റെ ഡെപ്യൂട്ടി മേയർ സ്ഥാനാർത്ഥി. എതിർ ചേരിയിലുള്ള മുസ്ലിം ലീഗുമായി ഏറെ ബന്ധം പുലർത്തുന്ന നേതാക്കളിലൊരാളാണ് രാജൻ. എന്നാൽ ഇതു മുൻകുട്ടി കണ്ടു കൊണ്ട് ഇക്കുറി ടിഒ മോഹനൻ, മാർട്ടിൻ ജോർജ് തുടങ്ങിയ നേതാക്കളെ മാറ്റിനിർത്തി കണ്ണൂരിലെ കരുത്തനായ കെ സുധാകരൻ തന്നെ തന്ത്രം മെനയാൻ കളത്തിലിറങ്ങിയത് യുഡിഎഫിലെ ചോർച്ച തടയുമെന്നാണ് പ്രതീക്ഷിക്കപ്പെടുന്നത്.

കോർപറേഷനിലെ സ്ഥിതിഗതികൾ വിലയിരുത്താൻ യുഡിഎഫ് ഘടകകക്ഷികളുടെ യോഗം ഉടൻ ചേരുമെന്ന് യുഡിഎഫ് ജില്ലാ ചെയർമാൻ പ്രൊഫ.എഡി മുസ്തഫ അറിയിച്ചു. പികെ രാഗേഷ് വിജയിക്കുകയാണെങ്കിൽ നിലവിലെ മേയർ സുമാ ബാലകൃഷ്ണൻ 12 ന് തന്നെ രാജി വയ്ക്കുമെന്ന് സൂചനയുണ്ട്. മുസ്ലിം ലീഗ് സീനിയർ വനിതാ നേതാവ് സി. സീനത്താണ് പകരം മേയർ സ്ഥാനത്തേക്ക് വരിക. മൂന്ന് മാസമാണ് ഇവർക്ക് മേയറായി തുടരാനുള്ള കാലാവധി.