കണ്ണൂര്: കോൺഗ്രസിന് പിന്നാലെ യുഡിഎഫ് ഘടകകക്ഷികളിൽ നിന്നും പുറത്തേക്കുള്ള ഒഴുക്ക് തുടരുന്നു. ജി.ദേവരാജന് നേതൃത്വം നല്കുന്ന ഫോര്വേഡ് ബ്ലോക്ക് പാര്ട്ടിയുടെ സംസ്ഥാന കമ്മിറ്റി അംഗം കെ.മനോജ് ഉള്പ്പെടെ ആറോളം മണ്ഡലം കമ്മിറ്റികള് രാജിവെച്ച് തൃണമൂല് കോണ്ഗ്രസില് ചേര്ന്ന് പ്രവര്ത്തിക്കുവാന് തീരുമാനിച്ചെന്ന് ഭാരവാഹികള് വാർത്താ സമ്മേളനത്തില് അറിയിച്ചു.
വ്യക്തമായ രാഷ്ട്രീയ കാഴ്ചപാടുകളില്ലാതെ മുന്നോട്ടു പോകുന്ന സാഹചര്യത്തിലാണ് രാജിവെച്ചതെന്ന് പ്രവർത്തകർ പറഞ്ഞു. ഇന്ത്യയിൽ നരേന്ദ്ര മോദി നേതൃത്വം നൽകുന്ന ഫാസിസ്റ്റ് ഭരണകൂടത്തെ നേരിടാൻ മമതാ ബാനര്ജിക്ക് മാത്രമേ കഴിയുകയുള്ളു. കോൺഗ്രസും ഇടതുപാർട്ടികളും ഈക്കാര്യത്തിൽ പരാജയമാണെന്ന് തെളിയിച്ചു കഴിഞ്ഞു. മമതയുടെ നേതൃത്വത്തിന് പിൻതുണ നൽകുന്നവർ കേരളത്തിലും വിവിധ പാർട്ടികളിലുണ്ട് വരും ദിനങ്ങളിൽ അവരും തങ്ങളുടെ പാർട്ടിയിലുമെത്തുമെന്ന് തൃണമൂൽ കോൺഗ്രസ് നേതാക്കൾ പറഞ്ഞു.
വാർത്താസമ്മേളനത്തില് തൃണമൂല് കോണ്ഗ്രസ് സംസ്ഥാന പ്രസിഡന്റ് മനോജ് ശങ്കരനെല്ലൂര്, ഫോര്വേഡ് ബ്ലോക്ക് സംസ്ഥാന കമ്മിറ്റിയംഗം കെ.മനോജ്, കുന്നത്ത് ഹബീബുള്ള, ഷൈജു നാരായണന്, എം.ഉദയകുമാര് എന്നിവർ പങ്കെടുത്തു.