കണ്ണൂർ: കൊവിഡ്-19 വൈറസ് രോഗം ബാധിച്ച് ദുബായ്യിൽ മലയാളി മരിച്ചു. തലശേരി ടെമ്പിൾ ഗേറ്റ് സ്വദേശി പ്രദീപ് സാഗർ (41) മരിച്ചത്. കഴിഞ്ഞയാഴ്ചയാണ് ശ്വാസംമുട്ടൽ, പനി, ചുമ തുടങ്ങിയ ശാരീരികാസ്വാസ്ഥ്യങ്ങളെ തുടർന്ന് ഇദ്ദേഹത്തെ ആശുപത്രിയിൽ പ്രവേശിപ്പിച്ചത്.
Also Read: കണ്ണൂരിൽ ഒരു കൊവിഡ് കേസ് കൂടി; രോഗബാധ ദുബായ്യിൽ നിന്നെത്തിയ ആൾക്ക്
കൊവിഡ്-19 സ്ഥിരീകരിച്ചതിനു പിന്നാലെ ഐസൊലേഷൻ വാർഡിൽ ചികിത്സയിലായിരുന്നു. അതേസമയം തുടക്കത്തിൽ പ്രദീപിന് കാര്യമായ ചികിത്സ ലഭിച്ചില്ലെന്ന് ബന്ധുക്കള്‍ ആരോപിച്ചു. ഒരാഴ്ച മുമ്പ് രോഗം കടുത്തതോടെയാണ് ആശുപത്രിയിലേയ്ക്ക് മാറ്റിയതെന്നും ബന്ധുക്കള്‍ പറഞ്ഞു. മൃതദേഹം ദുബായ്യിൽ സംസ്കരിക്കും. പ്രദീപിന്റെ മരണത്തോടെ യുഎഇയിൽ കൊവിഡ്-19 നെ തുടർന്ന് മരിച്ച മലയാളികളുടെ എണ്ണം മൂന്നായി. യുഎഇയിൽ കഴിഞ്ഞയാഴ്ച രണ്ടുമലയാളികൾ മരിച്ചിരുന്നു.
Also Read: കോയമ്പത്തൂരില്‍ മരിച്ച മലയാളിക്ക് കൊവിഡ്-19 ബാധിച്ചത് എവിടെ നിന്ന്? അവ്യക്തത!
ഇതിനിടെ ജില്ലയില്‍ ഇന്ന് ഒരാൾക്കു കൂടി കൊവിഡ്-19 സ്ഥിരീകരിച്ചു. 40കാരനായ മുര്യാട് സ്വദേശിക്കാണ് രോഗം സ്ഥിരീകരിച്ചത്. മാര്‍ച്ച് 17ന് ദുബായ്യിൽ നിന്ന് കരിപ്പൂര്‍ വിമാനത്താവളം ഇദ്ദേഹം വഴിയാണ് നാട്ടിലെത്തിയത്. ഏപ്രില്‍ 10ന് സ്രവ പരിശോധനയ്ക്ക് വിധേയനായ ഇദ്ദേഹം ഇപ്പോള്‍ വീട്ടില്‍ നിരീക്ഷണത്തിലാണ്. ഇദ്ദേഹത്തെ ഉടന്‍ തന്നെ അഞ്ചരക്കണ്ടി കോവിഡ് ആശുപത്രിയിലേക്ക് മാറ്റുമെന്ന് ജില്ലാ മെഡിക്കൽ ഓഫിസർ ഡോ.നാരായൺ നായ്ക്ക് അറിയിച്ചു. നിലവിൽ ജില്ലയില്‍ കൊറോണ ബാധ സംശയിച്ച് നിരീക്ഷണത്തിലുള്ളവരുടെ എണ്ണം 7836 ആയി.