കൊവിഡ് ചികിത്സയിലിരിക്കെ കണ്ണാടിപറമ്പ് സ്വദേശി ഖത്തറില്‍ മരിച്ചു

കണ്ണൂർ: കൊവിഡ് വൈറസ് രോഗ ബാധിതനായി ചികിത്സയില്‍ കഴിയുകയായിരുന്ന കണ്ണൂര്‍ സ്വദേശി ഖത്തറില്‍ മരണപ്പെട്ടു. കണ്ണാടിപ്പറമ്പ് കാരയാപ്പ് സ്വദേശി സിദ്ദിഖ് (48) ആണ് മരിച്ചത്. കൊവിഡ് പോസിറ്റീവായതിനെ തുടര്‍ന്ന് ദിവസങ്ങള്‍ക്ക് മുൻപേ ഇദ്ദേഹത്തെ ഇന്‍ഡസ്ട്രിയല്‍ ഏരിയയിലെ കൊവിഡ് ആശുപത്രിയില്‍ പ്രവേശിപ്പിക്കുകയായിരുന്നു. നേരത്തെ തന്നെയുണ്ടായിരുന്ന ജീവിതശൈലീ രോഗങ്ങള്‍ കൂടി ഗുരുതരമായതോടെ ആരോഗ്യനില വഷളാവുകയും വെന്‍റിലേറ്ററിലേക്ക് മാറ്റുകയും ചെയ്തിരുന്നു.

Also Read: സിസിടിവിയില്‍ കൃത്രിമം നടന്നു։ ഹാൾടിക്കറ്റിൽ കൈയ്യക്ഷരം അഞ്ജുവിന്റെ അല്ല; കോളേജിനെതിരെ ആരോപണവുമായി കുടുംബം

തുടര്‍ന്ന് ഞായാറാഴ്ച്ച പുലര്‍ച്ചെ 1.30 ഓടെ മരണം സംഭവിച്ചതായി ബന്ധുക്കളെ അറിയിക്കുകയായിരുന്നു. ക്രയാറ്റിന്‍ അളവും, ഷുഗര്‍, രക്തസമ്മര്‍ദ്ദം തുടങ്ങിയവ കൂടിയതുമാണ് മരണകാരണമെന്ന് ആശുപത്രി അധികൃതര്‍ ബന്ധുക്കളെ അറിയിച്ചിട്ടുണ്ട്. 16 വര്‍ഷത്തോളായി ഖത്തറില്‍ ലിമോസിന്‍ ഡ്രൈവറായി ജോലി നോക്കുകയായിരുന്നു സിദ്ദിഖ്. ഭാര്യയും മൂന്ന് മക്കളുമുണ്ട്. രണ്ട് സഹോദരന്മാര്‍ ഖത്തറില്‍ തന്നെ പ്രവാസികളാണ്. കൊവിഡ് പ്രോട്ടോകോള്‍ അനുസരിച്ചുള്ള നടപടിക്രമങ്ങള്‍ക്ക് ശേഷം മൃതദേഹം ഖത്തറില്‍ തന്നെ ഖബറടക്കുമെന്ന് ബന്ധുക്കൾ അറിയിച്ചു.