തലശേരിയിൽ കൺട്രോൾ റൂം എസ്ഐക്ക് കൊവിഡ്: ഡിവൈഎസ്പി ഓഫീസിൻ്റെ പ്രവർത്തനം സ്തംഭിച്ചു

കണ്ണുർ: തലശേരി ഡിവൈഎസ്പി ഓഫീസ് കെട്ടിടത്തിൽ പ്രവർത്തിക്കുന്ന കൺട്രോൾ റൂം എസ്ഐക്ക് കൊവിഡ്-19 സ്ഥിരീകരിച്ച പശ്ചാത്തലത്തിൽ കണ്ണൂർ ജില്ലയിൽ പോലിസ് സേനയിൽ ആശങ്ക. ഹൈവേ പട്രോൾ ടീമിൽ പ്രവർത്തിക്കുന്ന എസ്ഐക്ക് സമ്പർക്കത്തിലൂടെയാണ് രോഗം പടർന്നതെന്നാണ് സൂചന. ഞായറാഴ്ച്ച ഉച്ചയോടെയാണ് ഇദ്ദേഹത്തിൻ്റെ സ്രവ പരിശോധനാ ഫലം പുറത്തു വന്നത്. ഇതോടെ തലശേരി മിനി സിവിൽ സ്റ്റേഷനു സമീപം പ്രവർത്തിക്കുന്ന ഡിവൈഎസ്പി ഓഫീസിൽ ജോലി ചെയ്യുന്ന പോലിസുകാരുൾപ്പെടെ 30 ഓളം പേർ ക്വാറൻ്റൈനിൽ പ്രവേശിച്ചു. ഡിവൈഎസ്പി ഓഫീസ് കെട്ടിടം അടച്ചിടുമെന്ന് പോലിസ് അധികൃതർ അറിയിച്ചു.

Also Read: കണ്ണൂരിൽ 26 പേർക്ക് കൂടി സമ്പർക്കത്തിലുടെ കൊവിഡ് രോഗബാധ

കണ്ണുർ അഞ്ചരക്കണ്ടി കൊവിഡ് ആശുപത്രിയില്‍ നിന്നു രക്ഷപ്പെട്ട കൊവിഡ് രോഗിയായ
മോഷണ കേസ് പ്രതിയുമായി സമ്പര്‍ക്കത്തിലായവരെ കണ്ടെത്തി നിരീക്ഷണത്തിലാക്കുന്നതിന് ആരോഗ്യവകുപ്പ് നടപടി തുടങ്ങി. 19 വയസുകാരനായ പ്രതി അഞ്ചരക്കണ്ടിയില്‍ നിന്ന് മട്ടന്നൂര്‍
വരെ യാത്ര ചെയ്ത സ്വകാര്യബസും മട്ടന്നൂരില്‍ നിന്ന് ഇരിട്ടിയിലെത്തിയ സ്വകാര്യബസും പോലീസ് തിരിച്ചറിഞ്ഞു. ഇയാളെ മട്ടന്നൂരില്‍ നിന്ന് പത്തൊമ്പതാം മൈല്‍ വരെ എത്തിച്ച ബൈക്ക്
യാത്രക്കാരനെയും തിരിച്ചറിഞ്ഞ് ക്വാറന്‍റൈനില്‍ പ്രവേശിപ്പിച്ചു. ബസ് ജീവനക്കാരെയും ടൗണില്‍ വെച്ച് ഇയാളുമായി സമ്പര്‍ക്കത്തിലായവരെയും കണ്ടെത്തി ക്വാറന്‍റൈനില്‍ പ്രവേശിപ്പിക്കാനാണ് നിര്‍ദേശിച്ചിരിക്കുന്നത്.

Also Read: പാലത്തായി പീഡനക്കേസ്: പ്രത്യേക മെഡിക്കൽ ബോർഡ് രൂപീകരിക്കും

ബസ് ജീവനക്കാരും ബൈക്ക് ഓടിച്ചയാളും പോലീസിന്‍റെ നിര്‍ദേശത്തെ തുടര്‍ന്ന്
നിരീക്ഷണത്തില്‍ പോയിരുന്നു. ബസിലെ യാത്രക്കാരെ കണ്ടെത്തുന്നതിന് സമൂഹ മാധ്യമങ്ങള്‍
വഴിയാണ് പോലീസ് വിവരങ്ങള്‍ നൽകിയത്. യുവാവ് അഞ്ചരക്കണ്ടിയില്‍നിന്ന് എസ്ആര്‍
ബസില്‍ മട്ടന്നൂരിലും ഇവിടെനിന്ന് ഇരിട്ടിയിലെത്തിയത് എംഫോർസിക്‌സ് ബസിലുമാണെന്നാണ് പോലീസ് കണ്ടെത്തിയിരിക്കുന്നത്. ഈ രണ്ടു ബസിലും സഞ്ചരിച്ചവര്‍ അതത് പ്രദേശത്തെ
ആരോഗ്യപ്രവര്‍ത്തകരുമായി ബന്ധപ്പെട്ട് സ്വയം നിരീക്ഷണത്തില്‍ പോകണമെന്ന് ഇരിട്ടി സിഐ എ കുട്ടിക്കൃഷ്ണന്‍ പറഞ്ഞു. ഇരിട്ടിയില്‍നിന്നു പിടിയിലായ പ്രതി തലശേരി ജനറല്‍ ആശുപത്രില്‍ ചികിത്സയിലാണ്.

Also Read: ബൈക്കപകടത്തില്‍ മരിച്ച വിദ്യാര്‍ത്ഥിക്ക് കൊവിഡില്ല; ആലപ്പുഴയില്‍ നിന്നും ലഭിച്ച ഫലം നെഗറ്റീവ്

കണ്ണൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ