പേമാരിയിൽ തകര്‍ന്ന് കണ്ണൂര്‍ നഗരം... താഴ്ന്ന പ്രദേശങ്ങൾ വെള്ളത്തിനടിയിലായി

കണ്ണൂർ: മഴ കനത്തതോടെ കണ്ണൂർ നഗരത്തിനടുത്തെ താഴ്ന്ന പ്രദേശങ്ങൾ വെള്ളത്തിന്നടിയിലായി. കണ്ണൂർ നഗരത്തോട് ചേർന്ന് കിടക്കുന്ന കോർപ്പറേഷൻ പുഴാതി സോണലിലെ താഴ്ന്ന പ്രദേശങ്ങളാണ് വെള്ളത്തിനടിയിലായത്. ഇതോടെ കഴിഞ്ഞ രണ്ടു പ്രളയങ്ങളിൽ ദുരിതമനുഭവിച്ചവർക്ക് ഇത്തവണയും പേമാരി തീരാ ദുരിതമായിരിക്കുകയാണ്. കഴിഞ്ഞ വർഷം അത്താഴക്കുന്ന് മാപ്പിള എൽ പി സ്ക്കൂളിൽ നൂറോളം കുടുംബങ്ങളെ മാറ്റി താമസിപ്പിക്കാൻ ദുരിതാശ്വാസ ക്യാംപ് തുറന്നിരുന്നു.

Also Read: കല്ലമ്പലത്ത് എട്ടുവയസുകാരിയെ പീഡിപ്പിച്ച കേസില്‍ യുവാവ് അറസ്റ്റില്‍

എന്നാൽ ഇത്തവണ കൊവിഡ് മഹാമാരിയുടെ പിടിയിൽ നാടമർന്നതിനാൽ എല്ലാ വരും ഒന്നുകൂടി ഒന്നിച്ചു താമസിക്കേണ്ടി വരുമൊയെന്ന ഭീതിയുടെ നിഴലിലാണ് പ്രദേശവാസികൾ. അത്താഴക്കുന്ന് ഒമ്പതാം ഡിവിഷനിലെ ഓലാട്ട് വയൽ, അത്താഴക്കുന്ന് ഭാഗങ്ങളിലെ മിക്ക വീട്ടുകാരും ശനിയാഴ്ച്ച രാവിലെ തന്നെബന്ധുവീട്ടിലേക്ക് മാറി താമസിച്ചിട്ടുണ്ട്. ഇതോടെ കഴിഞ്ഞ പ്രളയത്തിൽ കനത്ത നഷ്ടം സംഭവിച്ചവർക്ക് ഇത്തവണയും കണ്ണീരു കുടിക്കേണ്ടി വരുമെന്നാണ് പിടിവിടാതെ പെയ്യുന്ന പേമാരി നൽകുന്ന സൂചന.

കനത്ത പുഴക്കൽ കക്കാട് , പുല്ലൂപ്പി എന്നിവടങ്ങളിൽ പുഴ നിറഞ്ഞ് കവിഞ്ഞതിനാൽ പള്ളിപ്രം, കക്കാട് റോഡ് മുഴുവൻ വെള്ളത്തിന്നടിയിലായിട്ടുണ്ട്. ഇടച്ചേരി, തുളിച്ചേരി, ഒറ്റ പീടിക, ശാദുലി പള്ളി, ആരും ഭാഗം, പൂല്ലൂപ്പി, തുരുത്ത്, കല്ല് കെട്ടുച്ചിറ എന്നീ താഴ്ന്ന പ്രദേശങ്ങളിലെല്ലാം വീടുകളിലും, കടകളിലും വെള്ളം കയറിയിട്ടുണ്ട്. പുല്ലൂപ്പി കോളനി, ശാദുലി പള്ളി ഭാഗങ്ങളിലും കഴിഞ്ഞ ദിവസമുണ്ടായ കാറ്റിൽ മരങ്ങൾ വീടുകൾക്ക് മുകളിൽ വീണ് നാശനഷ്ടങ്ങൾ സംഭവിച്ചിരുന്നു.

Also Read: കരിപ്പൂരിൽ അപകടത്തിന് തൊട്ടുമുമ്പ് എത്തിയ എയർ ഇന്ത്യ വിമാനത്തിൽ നിന്ന് 25 ലക്ഷം രൂപയുടെ സ്വർണം പിടികൂടി

കണ്ണൂർ ജില്ലകളിലെ പുഴകളെല്ലാം കരകവിഞ്ഞൊഴുകുകയാണ്. വളപട്ടണം പുഴ നിറഞ്ഞൊഴുകുന്നതിനാൽ താഴ്ന്ന പ്രദേശങ്ങളെല്ലാം വെള്ളത്തിനടിയിലാണുള്ളത്. കണ്ണൂർ നഗരത്തിൽ താവക്കരയിലാണ് ഏറ്റവും കൂടുതൽ വെള്ളം കയറിയത്. കണ്ണൂർ സർവകലാശാലയുടെ അടുത്തുള്ള താഴ്ന്ന പ്രദേശങ്ങളെല്ലാം വെള്ളത്തിലായിട്ടുണ്ട്. ഇതുപോലെ കോർപറേഷൻ പരിധിയിലെ പടന്ന പ്പാലം, മഞ്ചപ്പാലം, ചാലാട് ഭാഗങ്ങളിലും വൻതോതിൽ വെള്ളം കയറിയിട്ടുണ്ട്.