ആന്തൂര്‍ ചുവന്ന് തുടുത്തു... പിണറായി പഞ്ചായത്തില്‍ 19ല്‍ 19, യുഡിഎഫ് സിറ്റിങ് സീറ്റുകളിലും വിജയം കൈവരിച്ച് എല്‍ഡിഎഫ്

കണ്ണൂർ: ഇടതു കോട്ടയായ ആന്തൂര്‍ നഗരസഭയിൽ സമ്പുർണ്ണ വിജയവുമായി എൽഡിഎഫ് മുഴുവന്‍ വാര്‍ഡുകളും നേടിയാണ് ആന്തൂര്‍ നഗരസഭയില്‍ എല്‍ഡിഎഫ് ചരിത്ര വിജയം നേടിയത്. പ്രതിപക്ഷമില്ലാത്ത സംസ്ഥാനത്തെ ഏക നഗരസഭയായി ഇതോടെ ആന്തൂര്‍ ഒരിക്കല്‍ കൂടി മാറി.. ആകെയുള്ള 28 സീറ്റും എല്‍ഡിഎഫ് നേടി. ആന്തൂരില്‍ എതിരില്ലാതെ ആറ് സീറ്റ് നേടിയ എല്‍ഡിഎഫ് തെരഞ്ഞെടുപ്പ് നടന്ന 22 വാര്‍ഡുകളില്‍ വന്‍ ഭൂരിപക്ഷത്തോടെയാണ് വിജയിച്ചത്.

Also Read: വെള്ളിമാടുകുന്നില്‍ തിളക്കമോടെ ചന്ദ്രന്‍; എതിരാളികളെ ഞെട്ടിച്ച് ഭൂരിപക്ഷം

കഴിഞ്ഞ തവണയും മൂഴുവന്‍ സീറ്റും എല്‍ഡിഎഫിനായിരുന്നു. ഇത്തവണ കോൺഗ്രസിനൊപ്പം ബിജെപിയും മത്സര രംഗത്തുണ്ടായിരുന്ന ആന്തൂരിൽ എല്‍ഡിഎഫ് മിന്നുന്ന വിജയമാണ് നേടിയത്. മുഖ്യമന്ത്രിയുടെ ജന്മനാടായ പിണറായി പഞ്ചായത്തിൽ 19ൽ 19 സീറ്റും നേടി എൽഡിഎഫ് മികവു തെളിയിച്ചു. 19 സീറ്റുള്ള പഞ്ചായത്തിൽ 17 സീറ്റിൽ സിപിഎമ്മും 2 വാർഡിൽ സിപിഐയുമാണ് ജനവിധി തേടിയത്. യുഡിഎഫ് സ്ഥാനാർഥികളായി 18 കോൺഗ്രസ് സ്ഥാനാർത്ഥികളും ഒരു ലീഗ് സ്ഥാനാർത്ഥിയും മത്സരിച്ചു. 12 ബിജെപി സ്ഥാനാർഥികളും പഞ്ചായത്ത് പതിമൂന്നാം വാർഡിൽ ഒരു എസ്‌ഡിപിഐ സ്ഥാനാർഥിയും മത്സരിച്ചിരുന്നു.

Also Read: നിരവധി ആരോപണങ്ങള്‍... എന്നിട്ടും വിവി രാജേഷിന് മിന്നുന്ന വിജയം, എല്‍ഡിഎഫിനെ മുന്നാം നിരയിലേക്ക് തള്ളി ബിജെപി

ഇത്തവണ എട്ടാം വാർഡായ പാനുണ്ടയിൽ എൽഡിഎഫ് സ്ഥാനാർഥി എപി മോഹനൻ167 വോട്ടുകൾക്ക് വിജയിച്ചതോടെയാണ് മുഴുവൻ സീറ്റിലും വിജയം നേടിയത്. കഴിഞ്ഞ തവണ എട്ടാം വാർഡായ പാനുണ്ടയിൽ കോൺഗ്രസിന്‍റെ സ്വതന്ത്ര സ്ഥാനാർഥിയായ ഷീബ പ്രകാശ് വിജയിച്ചതോടെയാണ് ഒരു സീറ്റ് നഷ്ടമായത്. ഇത്തവണ ഷീബപ്രകാശ് കോൺഗ്രസ് സ്ഥാനാർഥിയായി കൈപ്പത്തി ചിഹ്നത്തിൽ തന്നെ മത്സരിച്ചിരുന്നു. എന്നാൽ മറ്റൊരു ഇടതു കോട്ടയായ മലപ്പട്ടത്ത് കോൺഗ്രസ് സ്ഥാനാർത്ഥി ഒരുു വാർഡിൽ ജയിച്ചത് സിപിഎമ്മിൻ്റെ പ്രതിപക്ഷഷമില്ലാത്ത പഞ്ചായത്തെന്ന ഖ്യാതിക്ക് കോട്ടം തട്ടിയിട്ടുണ്ട്.

കണ്ണൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി ഫേസ്ബുക്ക് പേജ് ഫോളോ ചെയ്യൂ

കണ്ണൂർ ജില്ലയിൽ നിന്നുള്ള ഏറ്റവും പുതിയ നാട്ടുവാർത്തകൾക്കായി വാട്സ്ആപ്പ് ഗ്രൂപ്പ് ഫോളോ ചെയ്യൂ