പ്രവാസി മലയാളികൾക്ക് ആശ്വാസം... ദോഹയിൽ നിന്നും വീണ്ടും കണ്ണൂരിലേക്ക് വിമാന സർവീസ്, കേരളത്തിലേക്ക് മൂന്ന് സര്‍വ്വീസുകള്‍!

കണ്ണൂർ: ഖത്തറിലെ പ്രവാസി മലയാളികള്‍ക്കിടയില്‍ ആശ്വാസം പകര്‍ന്ന് കണ്ണൂരിലേക്ക് എയർ ഇന്ത്യ വീണ്ടും സർവിസ് നടത്തുന്നു. വരുന്ന 19നാണ് ദോഹയിൽ നിന്നും കണ്ണൂരിലേക്ക് പ്രവാസികളെയും കൊണ്ട് വിമാനമെത്തുക. പുതിയ സർവിസിനായി അടുത്തയാഴ്ചയിലെ ഷെഡ്യൂളില്‍ എയര്‍ഇന്ത്യ മാറ്റം വരുത്തിയിട്ടുണ്ട്. ആകെ മൂന്ന് സര്‍വീസുകളാണ് അടുത്തയാഴ്ച ദോഹയില്‍ നിന്നും കേരളത്തിലേക്കുണ്ടാവുക.

Also Read: ഒരു കുപ്പി കള്ള് കിട്ടാന്‍ കടമ്പകളേറെ... ഭാഗ്യം വേണം; വരിനിന്നവര്‍ക്കെല്ലാം ഫലം നിരാശ മാത്രം!

കോഴിക്കോടിനും കൊച്ചിക്കും പുറമെ കണ്ണൂരിലേക്കും കൂടിയാണ് പുതുതായി സർവീസ് ഉള്‍പ്പെടുത്തിയത്. ഇത് ജില്ലകളിലെ പ്രവാസി മലയാളികൾക്ക് ഏറെ ആശ്വാസകരമാണ്. കണ്ണൂരിലേക്ക് സര്‍വീസുണ്ടാകുമെന്ന് നേരത്തെ അറിയിച്ചിരുന്നെങ്കിലും അനിശ്ചിതത്വം നിലനിന്നിരുന്നു. വരുന്ന പത്തൊമ്പതിനാണ് ദോഹ -കണ്ണൂര്‍ വിമാനം യാത്ര തിരിക്കുക. ദോഹയില്‍ നിന്ന് പ്രാദേശിക സമയം വൈകീട്ട് 6.40 ന് പുറപ്പെടുന്ന വിമാനം ഇന്ത്യന്‍ സമയം അര്‍ദ്ധരാത്രി 01.25 ന് കണ്ണൂരിലെത്തുമെന്നാണ് പ്രതീക്ഷിക്കുന്നത് .
വരുന്ന പതിനെട്ടിനാണ് കോഴിക്കോട്ടേക്ക് സര്‍വീസ്. പ്രാദേശിക സമയം ഉച്ച തിരിഞ്ഞ് 15.35 ന് പുറപ്പെട്ട് ഇന്ത്യന്‍ സമയം രാത്രി 10.30 ന് കോഴിക്കോട്ടെത്തും.

Also Read: സിപിഎം നേതാക്കളുടെ സമ്പര്‍ക്ക പട്ടികയില്‍ ആശങ്ക; മഹാരാഷ്ട്രയില്‍ നിന്നെത്തിയ ബന്ധുവിനെ സ്വീകരിക്കാന്‍ നേരിട്ടെത്തി

വരുന്ന 21 നാണ് കൊച്ചിയിലേക്കുള്ള രണ്ടാം സര്‍വീസ്. പ്രാദേശിക സമയം ഉച്ചയ്ക്ക് 02.05 ന് പുറപ്പെട്ട് ഇന്ത്യന്‍ സമയം രാത്രി 0‌8.05 ന് കൊച്ചിയിലെത്തും. ഹൈദരാബാദ്, ബംഗളൂരു ഉള്‍പ്പെടെ ഇന്ത്യയിലെ മറ്റ് നാലിടങ്ങളിലേക്കും അടുത്തയാഴ്ച്ച സര്‍വീസുണ്ട്. പുതിയ സര്‍വീസിലേക്കുള്ള യാത്രക്കാരെ തെരഞ്ഞെെടുക്കുന്ന നടപടികള്‍ ഖത്തറിലെ ഇന്ത്യന്‍ എംബസി തുടങ്ങിയിട്ടുണ്ട്. ഇതില്‍ കോഴിക്കോട് സര്‍വീസിനായി തെരഞ്ഞെടുത്തവര്‍ക്ക് ടിക്കറ്റ് കൈമാറുന്ന നടപടികളും ആരംഭിച്ചു. മടക്കയാത്ര ഉദ്ദേശിക്കുന്നവര്‍ക്കായി എംബസി പുതിയ രജിസ്ട്രേഷന്‍ പോര്‍ട്ടല്‍ ആരംഭിച്ചിട്ടുണ്ട്. ഇതില്‍ രജിസ്റ്റര്‍ ചെയ്യുന്നവരില്‍ നിന്നും പ്രത്യേക സമിതി വഴിയാണ് മുന്‍ഗണനാക്രമത്തില്‍ അടിയന്തിര സാഹചര്യത്തില്‍ നാട്ടില്‍ പോകേണ്ടവരെ തെരഞ്ഞെടുക്കുക. കുട്ടികൾ, ഗർഭിണികളായ കുട്ടികൾ, വയോധികർ, രോഗികൾ, എന്നിവർക്ക് കൂടുതൽ പരിഗണനയുണ്ടാകും.