കണ്ണൂരിൽ പാലം തകർന്ന സംഭവം; നിര്‍മ്മാണത്തില്‍ ക്രമക്കേടുണ്ടെന്ന് കോൺഗ്രസ്, വിശദീകരണം തേടി മന്ത്രി

കണ്ണൂര്‍: നിര്‍ദ്ദിഷ്ട തലശേരി-മാഹി ബൈപ്പാസ് റോഡിലെ നിര്‍മ്മാണത്തിലിരിക്കുന്ന പാലത്തിൻ്റെ ഗര്‍ഡര്‍ ബീമുകള്‍ നെടുകെ പിളര്‍ന്നു വീണ സംഭവത്തില്‍ മന്ത്രി ജി സുധാകരന്‍ വിശദീകരണം തേടി. ദേശീയ ഹൈവേ അതോറിറ്റി ഓഫ് ഇന്ത്യ റീജിയണല്‍ ഡയറക്ടറോടാണ് മന്ത്രി വിശദീകരണം ആവശ്യപ്പെട്ടത്. അതേസമയം നിര്‍മ്മാണത്തില്‍ ക്രമക്കേടുണ്ടെന്ന ആരോപണവുമായി ഡിസിസി അധ്യക്ഷന്‍ സതീശന്‍ പാച്ചേനി രംഗത്തു വന്നു. നിര്‍മ്മാണത്തില്‍ ക്രമക്കേടുണ്ടെന്നു പ്രദേശവാസികളും ആരോപിക്കുന്നുണ്ട്.

Also Read: ഇക്കുറി കളിമാറും; പഞ്ചായത്തുകള്‍ ആരുഭരിക്കണമെന്നത് സമൂഹ മാധ്യമങ്ങള്‍ തീരുമാനിക്കും

പാലത്തിൻ്റെ ഗര്‍ഡര്‍ ബീമുകള്‍ തകര്‍ന്നു വീണത് തെന്നിമാറിയാണെന്നാണ് പ്രാഥമിക പരിശോധനയില്‍ മനസിലായതെന്ന് കരാറുകാരായ ജിഎച്ച്വി- ഇകെകെ പ്രൈവറ്റ്‌ ലിമിറ്റഡ് അറിയിച്ചു. ഒരു ഡര്‍ഡര്‍ ബീം വീണപ്പോള്‍ അതേ ദിശയിലുള്ള ബാക്കി മൂന്നു ബീമുകളും നിലംപതിക്കുകയായിരുന്നു. അഞ്ചു ഗര്‍ഡര്‍ ബീമുകള്‍ പൂര്‍ത്തിയായാല്‍ ക്രോസ് ഗര്‍ഡര്‍ സ്ഥാപിച്ചാണ് ബലപ്പെടുത്തുക. എന്നാല്‍ നാലു ഗര്‍ഡര്‍ ബീമുകളാണ് ഇവിടെ പൂര്‍ത്തിയായതെന്നും കരാറുകാര്‍ വ്യക്തമാക്കി.

Also Read: കേന്ദ്രസർക്കാരിനെതിരായ സമരത്തില്‍ പങ്കെടുത്തു; സര്‍വകലാശാല ഉദ്യോഗസ്ഥയായ സിപിഎം നേതാവിന്‍റെ ഭാര്യക്കെതിരെ പരാതി

തലശേരി നെട്ടൂര്‍ ബാലത്തിലുള്ള ബൈപ്പാസ് റോഡിലെ നിര്‍മ്മാണത്തിലിരിക്കുന്ന പാലത്തിന്റെ നാലു ഗര്‍ഡര്‍ ബീമുകള്‍ നെടുകെ പിളര്‍ന്നു പുഴയിലേക്ക് വീഴുകയായിരുന്നു. ബുധനാഴ്ച്ച ഉച്ചയ്ക്ക് രണ്ടരയോടെ അപകടമുണ്ടായത്. വന്‍ശബ്ദം കേട്ട് പ്രദേശവാസികള്‍ സ്ഥലത്തെത്തിയപ്പോഴാണ് ബീമുകള്‍ തകര്‍ന്നു വീണതു ശ്രദ്ധയില്‍പ്പെട്ടത്. ഉടന്‍ ബന്ധപ്പെട്ട അധികൃതരെ അറിയിക്കുകയായിരുന്നു. വരുന്ന ഡിംസബറിനുള്ളില്‍ തലശേരി-മാഹി ബൈപ്പാസ് നിര്‍മ്മാണം പൂര്‍ത്തിയാക്കാനിരിക്കെയാണ് പാലത്തിൻ്റെ ബീമുകള്‍ തകര്‍ന്നു വീണത്. ലോക ബാങ്ക് സഹായത്തോടെ 883 കോടിരൂപ ചെലവഴിച്ചാണ് തലശേരി- മാഹി ദേശീയ പാത ബൈപ്പാസ് നിര്‍മ്മിക്കുന്നത്.

Also Read: കണ്ണൂരില്‍ കൊവിഡ് ചികിത്സ തേടിയ ഗര്‍ഭിണികളുടെ എണ്ണം 100 കടന്നു