പൊട്ടിക്കൽ സംഘം
രാഷ്ട്രീയ ക്രിമിനല്‍ കേസുകളിലെ പ്രതികളായ ചിലര്‍ നേതൃത്വം നല്‍കുന്ന ചിലരാണ് സംസ്ഥാനത്ത് തന്നെ പൊട്ടിക്കല്‍ സംഘത്തിന് (സ്വര്‍ണം റാഞ്ചിയെടുക്കല്‍) പരിപാടിക്ക് നേതൃത്വം നല്‍കുന്നതെന്നാണ് പോലീസിന് ലഭിച്ച വിവരം. രാഷ്ട്രീയ അക്രമങ്ങള്‍ ഇല്ലാതായതോടെയാണ് തലശേരി താലൂക്കിലെ ക്വട്ടേഷന്‍ ടീമുകള്‍ പൊട്ടിക്കല്‍ സംഘത്തിലേക്ക് തിരിഞ്ഞത്. ടിപി വധക്കേസില്‍ ജയില്‍ ശിക്ഷയനുഭവിച്ചു വരുന്ന കൊടി സുനിയടക്കമുള്ള നിരവധി പേര്‍ ഇപ്പാള്‍ ജയിലിനകത്തുനിന്നുപോലും ഇത്തരം ക്വട്ടേഷന്‍ സംഘങ്ങളെ നിയന്ത്രിക്കുന്നുണ്ട്. തലശേരി നഗരത്തില്‍ വര്‍ഷങ്ങള്‍ക്കു മുന്‍പ് നടന്ന ജ്വല്ലറി ഉടമയുടെ കൊലപാതകം സ്വര്‍ണഇടപാടുമായി ബന്ധപ്പെട്ട തര്‍ക്കത്തെ തുടര്‍ന്നാണെന്നാണ് പൊലിസിന് ലഭിച്ച സൂചന. എന്നാല്‍ ഈകേസിലെ പ്രതികളെ ഇതുവരെ പിടികൂടാന്‍ കഴിഞ്ഞിട്ടില്ല. നെടുമ്പാശേരി വിമാനത്താവളത്തില്‍ നിന്ന് യുവാവിനെ തട്ടിക്കൊണ്ടുപോയ കേസില്‍ ഒരാള്‍ കൂടി അറസ്റ്റിലായതോടെയാണ് കൂടുതല്‍ വിവരങ്ങള്‍ പുറത്തുവരുന്നത്.
കോടികളുടെ കൊള്ള
പാനൂര്‍ പറമ്പത്ത് വീട്ടില്‍ ആസിഫിനെയാ(46)ണ് നെടുമ്പാശേരി പോലീസ് അറസ്റ്റു ചെയ്തത്. ഇതോടെ ഈ കേസില്‍ പാനൂര്‍ സ്വദേശികളായ ആറുപേരുടെ അറസ്റ്റ് പോലീസ് രേഖപ്പെടുത്തിയിട്ടുണ്ട്. സംഭവവുമായി ബന്ധപ്പെട്ട് തലശേരി, പാനൂര്‍ മേഖലയില്‍ നെടുമ്പാശേരി പോലീസ് വ്യാപകമായ റെയ്ഡ് നടത്തിയിട്ടുണ്ട്. നെടുമ്പാശേരിയില്‍ നിന്നും തട്ടിയെടുത്ത അരക്കോടി രൂപ വിലവരുന്ന സ്വര്‍ണം പോലീസ് കണ്ടെത്തിയിട്ടുണ്ട്. കണ്ണൂര്‍ ജില്ല കേന്ദ്രീകരിച്ചുള്ള ഹവാലപണവും കള്ളക്കടത്ത് സ്വര്‍ണവും തട്ടിയെടുക്കുന്ന പൊട്ടിക്കല്‍ സംഘം, കേരളത്തില്‍ ഉടനീളം നടത്തിയിട്ടുള്ള കോടികളുടെ കൊള്ളകള്‍ സംബന്ധിച്ചുള്ള ഞെട്ടിക്കുന്ന വിവരങ്ങളാണ് ഇതു സംബന്ധിച്ച അന്വേഷണം നടത്തിവരുന്ന ഏജന്‍സികള്‍ക്ക് ലഭിച്ചു കൊണ്ടിരിക്കുന്നത്.
തടങ്കലിൽ പാർപ്പിക്കാൻ ഒളിസങ്കേതം
തലശേരി പുതിയ ബസ് സ്റ്റാന്‍ഡിലെ ആഡംബര ഹോട്ടലില്‍നടന്ന പിറന്നാള്‍ ആഘോഷ പാര്‍ട്ടിക്കിടയിലാണ് നെടുമ്പാശേരി തട്ടിക്കൊണ്ടുപോകല്‍ സംഘത്തിലെ പ്രതികള്‍ ഉള്‍പ്പെടെയുള്ള 14 പേരെ തലശേരിടൗണ്‍ സി. ഐ അനിലും സംഘവും പിടികൂടി നെടുമ്പാശേരി പോലീസിന് കൈമാറിയത്. പാനൂര്‍ സ്വദേശികളായ ശ്രീനിലയത്തില്‍ ശ്രീലാല്‍, മനേക്കരയിലെ ലിബിന്‍, വാരിയം കണ്ടത്ത് അജ്മല്‍, കുന്നുമ്മക്കണ്ടന്‍ നജീബ്, പന്തക്കലിലെ റനീഷ് എന്നിവരാണ് നേരത്തെ അറസ്റ്റിലായത്. ഇവരെ കൂടുതല്‍ ചോദ്യം ചെയ്യുന്നതിനായി കസ്റ്റഡിയില്‍ വാങ്ങുമെന്ന് പോലീസ് അറിയിച്ചു. കഴിഞ്ഞ ദിവസം അറസ്റ്റിലായ ആസിഫാണ് അക്രമി സംഘത്തില്‍ നിന്നും സ്വര്‍ണം വാങ്ങിയതെന്നാണ് പോലീസിന് ലഭിച്ചിട്ടുള്ളവിവരം. ഈയാളെ പോലീസ് വിശദമായി ചോദ്യം ചെയ്തുവരികയാണ്. തലശേരി പുതിയ ബസ് സ്റ്റാന്‍ഡിലെ ഒരു ആഡംബര ഹോട്ടല്‍ കേന്ദ്രീകരിച്ചു നേരത്തെയും സ്വര്‍ണക്കടത്ത് സംഘം ഗൂഡാലോചന നടത്തിയിട്ടുണ്ടെന്നാണ് പോലീസിന് ലഭിച്ച വിവരം. മാഹിയിലും പാനൂരില്‍ സ്വര്‍ണവുമായി വിമാനത്താവളത്തിലിറങ്ങുന്നവരെ റാഞ്ചി കഴിഞ്ഞാല്‍ ഇവരെ തടങ്കിലില്‍പാര്‍പ്പിക്കാന്‍ പ്രത്യേകം ഒളിസങ്കേതങ്ങള്‍ തന്നെയുണ്ട്.