നിമസഭയിൽ ഉന്നയിക്കും?
തിങ്കളാഴ്ച്ച നിയമസഭ തുടങ്ങാനിരിക്കെ പയ്യന്നൂര്‍ എംഎല്‍എ ടിഐ മധുസൂദനന്‍ കുറ്റാരോപിതനായ ഫണ്ട് വിവാദം നിയമസഭയില്‍ പ്രതിപക്ഷ അംഗങ്ങള്‍ ഉന്നയിക്കാന്‍ സാധ്യതയുണ്ടെന്നാണ് സിപിഎം സംസ്ഥാന നേതൃത്വത്തിന്റെ വിലയിരുത്തല്‍. ഈ സാഹചര്യത്തില്‍ നിയമസഭയില്‍ പ്രതിരോധിക്കേണ്ട അടവുനയങ്ങളാണ് പാര്‍ട്ടിക്കുള്ളില്‍ ചര്‍ച്ചയാവുക. സംസ്ഥാനസമിതി യോഗത്തില്‍ വിഷയം കണ്ണൂര്‍ ജില്ലാസെക്രട്ടറി എം.വി ജയരാജന്‍, ടി.വി രാജേഷ് എന്നിവര്‍ റിപ്പോര്‍ട്ട് ചെയ്യുമെന്നാണ് വിവരം.
ആയുധമാക്കാൻ പ്രതിപക്ഷം
ഇതിനിടെ പയ്യന്നൂര്‍ എംഎല്‍എ ടിഐ മധുസൂദനനെതിരെ പൊതുപണം ദുരുപയോഗം ചെയ്തുവെന്ന പരാതി യൂത്ത് ലീഗ് പയ്യന്നൂര്‍ ഡി.വൈ. എസ്.പിക്ക് നല്‍കിയതിനാല്‍ വിഷയം നിയമസഭയില്‍ സബ്മിഷന്‍ രൂപത്തില്‍ അവതരിപ്പിക്കുന്നതിന് പ്രതിപക്ഷത്തിന് വഴിതുറന്നിരിക്കുകയാണ്. പയ്യന്നൂര്‍ രക്തസാക്ഷി ഫണ്ട് വിവാദം ദേശീയ മാധ്യമങ്ങള്‍വരെ റിപ്പോര്‍ട്ട് ചെയ്ത സാഹചര്യത്തില്‍ സ്വര്‍ണക്കടത്ത് ആരോപണത്തിനൊപ്പം പയ്യന്നൂരില്‍ നടന്നുവെന്നു പറയുന്ന കോടികളുടെ ഫണ്ട്തട്ടിപ്പും ഒരേസമയം ഉയര്‍ത്തികൊണ്ടുവരാനാണ് പ്രതിപക്ഷം തീരുമാനിച്ചിട്ടുള്ളത്.
പുതിയ കണക്ക് അവതരിപ്പിക്കാൻ സാധ്യത
ഇന്ന് കണ്ണൂര്‍ ജില്ലയിലെത്തുന്ന വിഡി സതീശന്‍ ഇതു സംബന്ധിച്ചു വിശദാംശങ്ങള്‍ തന്റെ പയ്യന്നൂര്‍ സന്ദര്‍ശന വേളയില്‍ ശേഖരിക്കുമെന്നാണ് വിവരം. ഇതിനിടെ പയ്യന്നൂരില്‍ വിവാദത്തിന്റെ തീയണയാത്ത സാഹചര്യത്തില്‍ സിപിഎം പയ്യന്നൂര്‍ ഏരിയാകമ്മിറ്റിയോഗം ഇന്ന് ചേരും. തല്‍സ്ഥാനത്തു നിന്നും നീക്കിയ മുന്‍ ഏരിയാ സെക്രട്ടറി വി.കുഞ്ഞികൃഷ്ണന്‍ ഏരിയാ കമ്മിറ്റിയംഗമായി തുടരുന്നുണ്ടെങ്കിലും അദ്ദേഹം യോഗത്തില്‍ പങ്കെടുക്കില്ലെന്നാണ് സൂചന. പയ്യന്നൂര്‍ ഫണ്ട് വിവാദത്തില്‍ സാമ്പത്തിക നഷ്ടമുണ്ടായിട്ടില്ലെന്ന ജില്ലാസെക്രട്ടറിയേറ്റിന്റെ വിലയിരുത്തല്‍ ശരിവയ്ക്കുന്നതിനായി ഇന്ന് ചേരുന്ന ഏരിയാ കമ്മിറ്റി യോഗത്തില്‍ പുതിയ കണക്ക് അവതരിപ്പിക്കുമെന്നാണ് വിവരം. ഇതോടെ ഇതിനെ എതിര്‍ക്കാനും തങ്ങളുടെ കൈവശമുണ്ടെന്ന് പറയുന്ന യഥാര്‍ത്ഥ കണക്കുകള്‍ പുറത്തുവിടാനുള്ള ഒരുക്കത്തിലാണ് വി കുഞ്ഞികൃഷ്ണനെ അനുകൂലിക്കുന്ന വെള്ളൂര്‍ സഖാക്കള്‍.