മാക്കൂട്ടത്ത് കൊല്ലപ്പെട്ടത് കണ്ണവം സ്വദേശിനിയല്ല; അഭ്യൂഹങ്ങൾക്ക് വിരാമം, യുവതിയെ കണ്ടെത്തി

തലശേരി: കണ്ണവത്തുനിന്നു ദുരൂഹസാഹചര്യത്തിൽ കാണാതായ യുവതിയെ പോലീസ് നടത്തിയ അന്വേഷണത്തിനൊടുവിൽ കണ്ടെത്തി. കണ്ണവം തൊടീക്കളത്തെ രമ്യയെ (31) യാണ് പോലീസ് നടത്തിയ തെരച്ചിലിൽ കണ്ടെത്തിയത്. പേരാവൂരിലെ ഒരു കോളനിയിൽ നിന്നാണ് കണ്ണവം പോലീസ് യുവതിയെ കണ്ടെത്തിയത്. ഭർതൃമതിയായ രമ്യയെ മൂന്നാഴ്ച മുൻപാണ് കാണാതായത്. എന്നാൽ മാക്കൂട്ടം ചുരം പാതയിൽ മൂന്ന് ട്രോളി ബാഗിൽ കഷ്ണങ്ങളാക്കി മാറ്റി ഉപേക്ഷിച്ച നിലയിൽ കണ്ടെത്തിയ മൃതദേഹം രമ്യയുടേതാണെന്ന സംശയമുയർന്നിരുന്നു. കേസ് അന്വേഷിച്ചു വരുന്ന വീരാജ്പേട്ട പോലീസ് കണ്ണവം തൊടിക്കളത്തെ രമ്യ താമസിക്കുന്ന കോളനിയിലെത്തുകയും അമ്മയുടെ മൊഴി രേഖപ്പെടുത്തുകയും ചെയ്തിരുന്നു. ഇതേ തുടർന്ന് പോലീസ് മടിക്കേരി മെഡിക്കൽ കോളേജ് മോർച്ചറിയിൽ രമ്യയുടെ അമ്മയെയും ബന്ധുക്കളെയും മൃതദേഹം തിരിച്ചറിയാനായി കൊണ്ടുപോയെങ്കിലും കാലപ്പഴക്കം കാരണം സാധ്യമായിരുന്നില്ല.


കൊല്ലപ്പെട്ട യുവതിയുടെ പ്രായവും ധരിച്ച ചുരിദാറുമാണ് കൊല്ലപ്പെട്ടത് രമ്യയാകാൻ സാധ്യതയുണ്ടെന്ന നിഗമനത്താൽ പോലീസ് കണ്ണവത്തെത്തി അന്വേഷണം നടത്തിയത്. എന്നാൽ രമ്യയെ നേരത്തെ പലതവണ കാണാതായിട്ടുണ്ടെന്നും ധരിച്ച ചുരിദാർ അവരുടേതല്ലെന്നും അമ്മയും ബന്ധുക്കളും വെളിപ്പെടുത്തിയിരുന്നു. ഇതോടെയാണ് കണ്ണവം പോലീസ് രമ്യയെ കണ്ടെത്താനുള്ള അന്വേഷണം ഊർജിതമാക്കിയത്. ഇതിനായി പോലീസ് യുവതിയുടെ ഫോട്ടോ സോഷ്യൽ മീഡിയയിൽ പ്രചരിപ്പിച്ചിരുന്നു. തുടർന്നാണ് പേരാവൂർ കോളനിയിൽനിന്ന് കണ്ടെത്തിയത്.

വിനോദസഞ്ചാരികളെ വരൂ...; മയ്യഴിപ്പുഴയുടെ സൗന്ദര്യം നുകർന്ന് ബോട്ടുയാത്ര നടത്താം; ജെട്ടികൾ ഒരുങ്ങി
കണ്ണൂ‍ര്‍ ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം


Read Latest Local News and Malayalam News