കണ്ണൂർ: പ്രകൃതി സുന്ദരമായ പുരളിമലയുടെ താഴ് വാരത്തിൽ തരിശായി കിടക്കുന്ന സ്ഥലത്ത് വെജിറ്റബിൾ ടൂറിസം ഹബ്ബ് ഒരുക്കിയിരിക്കുകയാണ് കണ്ണൂർ ജില്ലാ പഞ്ചായത്ത്. പുരളിമലയുടെ സൗന്ദര്യം ആസ്വദിക്കാനെത്തുന്ന വിനോദ സഞ്ചാരികൾക്ക് ഇനി ജൈവരീതിയിൽ തരിശായി കിടക്കുന്ന സ്ഥലത്ത് വിളയുന്ന പച്ചക്കറിയും വാങ്ങി മടങ്ങാം. പുരളിമലയുടെ താഴ്വാരത്തിലെത്തിയാൽ ഇനിയെല്ലാവരും മടങ്ങുക കൈനിറയെ പച്ചക്കറിയുമായിട്ടായിരിക്കുമെന്ന പ്രതീക്ഷയിലാണ് ഇവിടുത്തെ കർഷകരും.
മൂല്യവർധിത ഉൽപ്പന്നം നിർമിക്കാൻ കർഷകർക്ക് പരിശീലനവും നൽകും. മലയോര മേഖലയിലെ തരിശുഭൂമിയിൽ കൃഷിയോഗ്യമായത് കണ്ടെത്തി കൃഷിചെയ്യാൻ താൽപ്പര്യമുള്ള കൂട്ടായ്മകൾക്ക് രൂപം നൽകും. ഇതിനായി റിവോൾവിങ്ങ് ഫണ്ട് നൽകും. ഇത്തരം ഗ്രൂപ്പുകളുടെ കൃഷിത്തോട്ടങ്ങളും വെജിറ്റബിൾ ടൂറിസം ഹബ്ബായി മാറ്റും. മൂന്നുവയസുകാരൻ ദർശിതിനൊപ്പം വിത്തിട്ട് ജില്ലാ പഞ്ചായത്ത് പ്രസിഡന്റ പി പി ദിവ്യ പദ്ധതി ഉദ്ഘാടനംചെയ്തു. വൈസ് പ്രസിഡൻറ് ബിനോയ് കുര്യൻ അധ്യക്ഷനായി. എം എൻ പ്രദീപൻ, മാലൂർ പഞ്ചായത്ത് പ്രസിഡന്റ് വി ഹൈമാവതി, കെ സുധാകരൻ, യു പി ശോഭ, വി കെ സുരേഷ്ബാബു, സി ജനാർദനൻ, വി ഗീത, എൻ സതീഷ് ബാബു, സി രജനി, എൻ പ്രേമരാജൻ, സി ബിനോജ്, ശ്രീജ മേപ്പാടൻ തുടങ്ങിയവർ സംസാരിച്ചു.