കണ്ണൂര്: കണ്ണൂര് നഗരത്തെ വിറപ്പിച്ചു വീണ്ടും മോഷ്ടാക്കള്. കണ്ണൂര് നഗരത്തിലെ പൂട്ടിക്കിടക്കുന്ന വീടുകുത്തിതുറന്ന് പതിനഞ്ചു പവന് കവര്ന്നു. കണ്ണൂര് കോര്പറേഷന് പരിധിയിലെ കണ്ണോത്തുംചാല് ഡൈയിങ് കമ്പനിക്കടുത്തുളള ശ്രീമന്ദിറില് നിഷിത്ത് ആനന്ദിന്റെ വീട്ടിലാണ് കവര്ച്ച നടന്നത്. ഏപ്രില് 14-നും 19-നുമിടെയിലാണ് മോഷണം നടന്നതെന്ന് പരാതിയില് പറയുന്നു. 19നാണ് മോഷണ വിവരം ശ്രദ്ധയില്പ്പെടുന്നത്. അടുക്കള വാതില് തുറന്ന് അകത്തുകടന്ന മോഷ്ടാവ് കിടപ്പുമുറിയിലെ അലമാരയിലെ പൂട്ടു കുത്തിതുറന്ന് സ്വര്ണാഭരണങ്ങള് കവരുകയായിരുന്നു.
ഡോഗ് സ്ക്വാഡും പരിശോധന നടത്തിയിട്ടുണ്ട്. പ്രദേശത്തെ സിസിടിവി ക്യാമറാദൃശ്യങ്ങള് പരിശോധിച്ചു മോഷ്ടാവിനെ പിടികൂടാനുളള ഒരുക്കത്തിലാണ് പോലീസ്. കഴിഞ്ഞ വര്ഷം ഇതേ സമയത്ത് താണയിലെ ഡോക്ടറുടെ വീടുകുത്തിതുറന്ന് സ്വര്ണവും പണവും മോഷ്ടിച്ചിരുന്നു. എന്നാല് ഈ കേസിലെ പ്രതികളെ പോലീസിന് പിടികൂടാന് കഴിഞ്ഞിട്ടില്ല. കണ്ണൂര് നഗരത്തിലെ പഴയ ബസ് സ്റ്റാന്ഡിലെ കടകളിലും മോഷണം പതിവുസംഭവമാണ്. പോലീസ് രാത്രികാല പട്രോളിങ് ശക്തമാക്കണമെന്നാണ് നഗരവാസികളുടെ ആവശ്യം.
കണ്ണൂര് ജില്ലയിലെ മുഴുവൻ വാര്ത്തകളും ഒറ്റ ക്ലിക്കിൽ ഇവിടെ വായിക്കാം
Read Latest Local News and Malayalam News