ഇനിയെങ്കിലും കണ്ണ് തുറക്കുമോ അധികാരികൾ...ശരീരം മുഴുവൻ ബാൻഡേജ് ചുറ്റി ഒരു സമരം

കണ്ണൂർ (Kannur): റോഡ് പൂർണ്ണമായും തകരുകയും അതിലൂടെയുള്ള യാത്ര ദുഷ്കരമായി തുടരുകയും ചെയ്യുന്ന സാഹചര്യത്തിലും പാൽ ചുരം റോഡിനോടുള്ള അധികൃതരുടെ അവഗണന തുടർന്നുകൊണ്ടിരിക്കുകയാണ്. ഈ സാഹചര്യത്തിൽ പാൽച്ചുരം റോഡും താമരശ്ശേരി ചുരം റോഡും തമ്മിലുള്ള വ്യത്യാസം ചൂണ്ടിക്കാട്ടി യുവജനത, ചുങ്കക്കുന്ന് മുതൽ ബോയ്സ് ടൗൺ വരെ നടത്തിയ വ്യത്യസ്ത സമരം ശ്രദ്ധേയമായി. പാൽചുരം റോഡിന്റെ ശോചനീയാവസ്ഥയെ കാണിക്കാനായി ശരീരമാസകലം ബാൻഡേജ് ചെയ്താണ് കെസിവൈഎം ഒറ്റപ്ലാവ് യൂണിറ്റിലെ യുവജനങ്ങൾ പ്രതിഷേധം സംഘടിപ്പിച്ചത്.

കേരളത്തിലെ മറ്റൊരു ചുരം റോഡും ഇത്രയും ശോചനീയമായ അവസ്ഥയിൽ ഇല്ല. റോഡിന്റെ അറ്റകുറ്റപ്പണികൾക്കായി പണം അനുവദിച്ചു എന്ന അറിയിപ്പുകൾ വന്നിട്ടും ഇതുവരെ റോഡ് പണിക്കായി അധികൃതർ ആരും മുന്നോട്ട് ഇറങ്ങിയില്ല. നിരവധി ആളുകൾ യാത്ര ചെയ്യുന്ന ഈ വഴിയിൽ കൂടി യാത്ര ദുഷ്കരമായി മാറിയിരിക്കുകയാണ്. ഇരിട്ടി പേരാവൂർ തുടങ്ങിയ ഭാഗങ്ങളിൽ നിന്നും വയനാട്ടിലേക്കുള്ള ഏറ്റവും എളുപ്പമാർഗമാണ് പാൽ ചുരം വഴിയുള്ള യാത്ര. ദിനംപ്രതി ആയിരക്കണക്കിനാളുകളാണ് ഈ ചുരത്തെ ആശ്രയിക്കുന്നത്. ചുരം റോഡിലെ കുഴികൾ കാരണം ദിവസവും വലിയ ഗതാഗതക്കുരുക്കുകൾ ആണ് യാത്രക്കാർ നേരിട്ടുകൊണ്ടിരിക്കുന്നത്.
'മാവോയിസം ഉപേക്ഷിക്കും, സർക്കാർ സഹായം സ്വീകരിക്കാൻ തയ്യാർ'; കോടതിയിൽ കത്ത് നൽകി മാവോവാദികൾ

അതുമാത്രമല്ല ചെങ്കുത്തായ പാതയിലെ ഗർത്തങ്ങൾ അപകടസാധ്യത വർദ്ധിപ്പിക്കുന്നുണ്ട്. പാൽചുരം റോഡിന്റെ ശോചനീയാവസ്ഥയിൽ തുടർന്ന് നിരവധി പ്രതിഷേധങ്ങൾ നേരത്തെ നടന്നിരുന്നു. സമരങ്ങൾ ജനശ്രദ്ധ ആകർഷിക്കാനും കൂടുതൽ ആൾക്കാരിൽ എത്തിപ്പെടാനും ആയി വ്യത്യസ്തമായ സമരമാർഗങ്ങൾ ആയിരുന്നു പലരും സ്വീകരിച്ചു പോന്നത്. പാൽ ചുരം റോഡ് നോടുള്ള അവഗണന ഇനിയും തുടരുന്ന സാഹചര്യത്തിൽ വരുംദിവസങ്ങളിൽ കൂടുതൽ പ്രതിഷേധങ്ങളിലേക്ക് വരാനുള്ള തയ്യാറെടുപ്പിലാണ് ഈ പ്രദേശങ്ങളിലെ വിവിധ സംഘടനകൾ.


Topic: Bandage Protest, Protest for Palchuram, Palchuram Road Issue