കള്ളന്‍ കപ്പലില്‍ തന്നെ? സെന്‍ട്രല്‍ ജയിലിലെ കവര്‍ച്ച അന്വേഷണം ജയില്‍ അധികൃതരിലേക്ക്

കണ്ണൂര്‍: കണ്ണൂര്‍ സെന്‍ട്രല്‍ ജയിലിലെ ചപ്പാത്തി യൂണിറ്റിന്റെ ഓഫീസില്‍ നിന്നു രണ്ടു ലക്ഷം രൂപ മോഷണം പോയ സംഭവത്തില്‍ അന്വേഷണം ജയില്‍ അധികൃതരിലേക്ക്. ജയിലിലെ ഉദ്യോഗസ്ഥരറിയാതെ മോഷണം നടത്താനാവില്ലെന്ന നിഗമനത്തിലാണ് ഇപ്പോള്‍ പോലീസ്. ജയിലിലെ താത്കാലിക തടവുകാരെയും പോലസ് ചോദ്യം ചെയ്യാനൊരുങ്ങുകയാണ്. മോഷണം നടന്ന് ഒന്നരവര്‍ഷമായിട്ടും പ്രതിയെ പിടികൂടിയിരുന്നില്ല. തുടക്കത്തില്‍ ജയിലില്‍ നിന്ന് ശിക്ഷ കഴിഞ്ഞ് പുറത്തിറങ്ങിയ തടവുകാരനെ കേന്ദ്രീകരിച്ച് അന്വേഷണം നടത്തിയിരുന്നെങ്കിലും മോഷണം നടത്തിയത് അയാളല്ലെന്ന് കണ്ടെത്തുകയായിരുന്നു.

Also Read: കോവളത്തെ ബലാത്സംഗ കേസ് ശിക്ഷ വിധിക്കുന്നതിനിടെ നാടകീയ രംഗങ്ങൾ, യോഗ അധ്യാപകന്‍ ഓടിപ്പോകുന്നത് കണ്ടെന്ന് പ്രതികൾ

2021 ഏപ്രില്‍ 21നാണ് ജയിലിലെ ചപ്പാത്തി യൂണിറ്റ് ഓഫീസിന്റെ പൂട്ടുപൊളിച്ച് രണ്ടുലക്ഷം രൂപ കവര്‍ന്നത്. രാത്രി 11.30നും 12.15നും ഇടയില്‍ ഈ ഭാഗത്തു സംശയകരമായി ഒരാള്‍ ചുറ്റിത്തിരിയുന്നതിന്റെ ദൃശ്യം സിസിടിവിയില്‍ നിന്നു ലഭിച്ചിരുന്നു. പണം ചപ്പാത്തി യൂണിറ്റിലെ മേശയിലാണ് സൂക്ഷിക്കുകയെന്ന വിവരം കൃത്യമായി അറിയാവുന്നയാള്‍ തന്നെയാണ് കവര്‍ച്ച നടത്തിയതെന്നാണ് പോലീസിന്റെ ആദ്യ നിഗമനം. പൂട്ട് പൊളിച്ചാണ് മോഷ്ടാവ് അകത്തുകടന്നത്. സിസിടിവി ദൃശ്യം ലഭിച്ചിട്ടുപോലും പ്രതിയെ പിടികൂടാനാവാത്തത് പോലീസിന് ഏറെ നാണക്കേടുണ്ടാക്കിയിരുന്നു.

Also Read: 'അയ്യപ്പന്റെ അനുഗ്രഹം, അതുകൊണ്ട് കാര്യങ്ങൾ നടക്കുന്നു, മുഖ്യമന്ത്രി തിരിഞ്ഞു നോക്കുന്നില്ല', ശബരിമലയോട് ചിറ്റമ്മനയമെന്ന് ആക്ഷേപം

അപ്പോഴത്തെ അസിസ്റ്റന്റ് കമ്മിഷണര്‍ പി ബാലകൃഷ്ണന്‍ നായരുടെ മേല്‍നോട്ടത്തിലായിരുന്നു അന്വേഷണം ആരംഭിച്ചത്. സ്പെഷല്‍ ടീമായി തിരിഞ്ഞാണ് അന്വേഷണം നടത്തിയത്. 72 ഓളം ആളുകളെ ചോദ്യം ചെയ്യുകയും സമാന പ്രവൃത്തികള്‍ ചെയ്ത 20 ഓളം ആളുകളെ കണ്ടെത്തി പരിശോധിക്കുകയും ചെയ്തതായാണ് അറിയാന്‍ സാധിക്കുന്നത്. എന്നാല്‍, ഇവരില്‍ നിന്നും ഒന്നും കണ്ടെത്താന്‍ സാധിച്ചിട്ടില്ല. ജയില്‍ അധികൃതരിലേക്ക് അന്വേഷണം വ്യാപിപ്പിക്കുമ്പോഴും പ്രതിയെ പിടികൂടാനാവാതെ പോലീസ് ഇരുട്ടില്‍ തപ്പുകയാണ്.

കണ്ണൂ‍ര്‍ ജില്ലയിലെ മുഴുവൻ വാ‍ര്‍ത്തകളും ഒറ്റ ക്ലിക്കിൽ ഇവിടെ വായിക്കാം

Read Latest Local News and Malayalam News