എമർജൻസി ലൈറ്റിനുള്ളിൽ ഒളിപ്പിച്ച് കടത്താൻ ശ്രമം; കണ്ണൂരിൽ പിടിച്ചെടുത്തത് 2 കിലോ സ്വർണം

കണ്ണൂർ: കണ്ണൂര്‍ രാജ്യാന്തര വിമാനത്താവളത്തില്‍ വീണ്ടും വൻ സ്വർണവേട്ട. കോഴിക്കോട് സ്വദേശിയായ യാത്രക്കാരനിൽ നിന്ന് രണ്ട് കിലോ സ്വര്‍ണം പിടികൂടി. ഒരു കോടിയിലധികം രൂപയുടെ സ്വര്‍ണവുമായി കോഴിക്കോട് സ്വദേശി സിറാജിനെയാണ് കസ്റ്റംസ് പിടികൂടിയത്. 2147 ഗ്രാം തൂക്കം വരുന്ന സ്വര്‍ണം എമര്‍ജന്‍സി ലൈറ്റിനുള്ളില്‍ ബാറ്ററിയുടെ ഭാഗത്ത് ഒളിപ്പിച്ചുവച്ച നിലയിലായിരുന്നു. ഇയാളെ കസ്റ്റംസ് ചോദ്യം ചെയ്തു വരികയാണ്.ഒരാഴ്ച്ച മുൻപ്അന്താരാഷ്ട്ര വിമാനത്താവളത്തിലിറങ്ങിയ യാത്രക്കാരിൽ നിന്നും സ്വര്‍ണം പിടികൂടിയിരുന്നു.

64.5 ലക്ഷത്തിന്റെ സ്വര്‍ണവുമായി മൂന്ന് കര്‍ണാടക സ്വദേശികളാണ് കസ്റ്റംസ് പിടിയിലായത്. കര്‍ണാടക ബട്കല്‍ സ്വദേശി മുഹമ്മദ് ഷമ്മാസ്, ഉഡുപ്പി സ്വദേശി മുക്താര്‍ അഹമ്മദ് സിറാജുദ്ദീന്‍, ഷബാസ് അഹമ്മദില്‍ എന്നിവരില്‍ നിന്നും 1322 ഗ്രാം സ്വര്‍ണമാണ് പിടികൂടിയത്. പരിശോധനയ്ക്കിടെ ഇവരുടെ പെരുമാറ്റത്തിൽ സംശയം തോന്നി കസ്റ്റംസ് നടത്തിയ വിശദ പരിശോധനയിലാണ് ഗുളിക രൂപത്തിലുള്ള മിശ്രിതവും, വസ്ത്രങ്ങള്‍ക്കിടയില്‍ ബെല്‍റ്റ് രൂപത്തില്‍ ഒളിപ്പിച്ചുവച്ച നിലയിലും സ്വര്‍ണവും കണ്ടെത്തിയത്. ഇവരിൽ നിന്നും വിദേശത്തു നിന്നും കടത്തിയ വില പിടിപ്പുള്ള സ്മാർട്ട് ഫോണും പിടികൂടിയിട്ടുണ്ട്. കണ്ണൂര്‍ രാജ്യാന്തര വിമാനത്താവളം വഴി സ്വർണക്കടത്ത് വ്യാപകമാകുന്ന പശ്ചാത്തലത്തിൽ കസ്റ്റംസ് ജാഗ്രതയും പരിശോധനയും ശക്തമാക്കിയ സാഹചര്യത്തിലാണ് തുടർച്ചയായി സ്വർണം പിടികൂടുന്നത്.

Also Read: പിണറായി എന്തുകൊണ്ട് തെരഞ്ഞെടുപ്പ് പ്രചാരണത്തിന് ഇറങ്ങുന്നില്ല? ജാള്യതയോ!! കെ സുധാകരന്‍റെ ഉത്തരം ഇങ്ങനെയാണ്....

പിടിയിലാകുന്നവർ ഗൾഫിൽ നിന്നും മടങ്ങുന്നവരാണ്. ഇവർ വൻ സ്വർണ കള്ളക്കടത്ത് സംഘത്തിന്റെ കണ്ണികളാണെന്ന് സംശയിക്കുന്നു. വിമാനത്താവളം പ്രവർത്തനമാരംഭിച്ചു രണ്ടുവർഷം തികയാനിരിക്കെ കഴിഞ്ഞ കാലങ്ങളിലായി 85.9 കിലോഗ്രാം സ്വര്‍ണമാണ് പിടികൂടിയത്.34 കോടി രൂപ വിലമതിക്കുന്ന സ്വർണമാണ്
രണ്ടു വർഷത്തിനുള്ളിൽ പിടികൂടിയത്. വിമാനത്താവളത്തിലെ എയര്‍കസ്റ്റംസ്‌ 3,11,087,791 രൂപ വരുന്ന 74.9 കിലോ സ്വര്‍ണവും ഡയറക്‌ടറേറ്റ്‌ ഓഫ്‌ റവന്യൂ ഇന്‍റലിജന്‍സ്‌ 11കിലോ സ്വര്‍ണവുമാണ് പിടികൂടിയത്‌. 2018-19 സാമ്പത്തികവര്‍ഷം 3557.92 ഗ്രാമും 2019-20 വര്‍ഷത്തില്‍ 47121.38 ഗ്രാമും ഈ സാമ്പത്തികവര്‍ഷം 24,229.79 ഗ്രാം സ്വര്‍ണവുമാണ് എയര്‍
കസ്റ്റംസ്‌ പിടികൂടിയത്‌.

Also Read: തൻ്റെ ചിത്രം തെരഞ്ഞെടുപ്പ് പ്രചാരണത്തിന് ഉപയോഗിക്കാത്തത് പാർട്ടിയുടെ പ്രധാന മുഖമല്ലാത്തതിനാൽ: ഉമ്മൻ ചാണ്ടി

വിമാനത്താവളം പ്രവര്‍ത്തനം തുടങ്ങി ആദ്യത്തെ ഒരു മാസം അഞ്ച്‌ കേസുകളാണ് രജിസ്റ്റര്‍ ചെയ്‌തത്. രണ്ടാംവര്‍ഷം 63 കേസുകളും. ലോക്ക്‌ ഡൗണിനുശേഷം 25ലധികം കേസുകളാണ് കസ്റ്റംസ്‌ രജിസ്റ്റര്‍ ചെയ്‌തത്‌. കൊവിഡ്‌
പശ്ചാത്തലത്തില്‍ ലോക്ക്‌ ഡൗണില്‍ വിദേശസര്‍വീസുകള്‍ നിര്‍ത്തിവച്ചതോടെ സ്വര്‍ണക്കടത്ത്‌
കുറഞ്ഞിരുന്നുവെങ്കിലും പ്രവാസികളെ നാട്ടിലെത്തിക്കാന്‍ ചാര്‍ട്ടേഡ്‌ വിമാനങ്ങള്‍ക്ക്‌ അനുമതിയായതോടെയാണ്
സ്വര്‍ണക്കടത്ത്‌ വീണ്ടും തുടങ്ങിയത്‌. ഈ കാലയളവിൽ വിമാനത്താവളത്തിലൂടെ സ്വർണം കടത്തുകയായിരുന്ന സ്ത്രീകളടക്കം പിടിയിലായിട്ടുണ്ട്.