ഇന്ധനം വാങ്ങാൻ മയ്യഴിയിലേക്ക് ഒഴുക്ക്; പെട്രോൾ, ഡീസൽ വില കുറഞ്ഞത് ഇത്രയും! തലശേരി, വടകരക്കാർ ഹാപ്പി

എന്നാൽ കേന്ദ്രത്തിൽ നിന്നും ആനുകൂല്യങ്ങൾ കൂടുതൽ കിട്ടുന്നതിനായി ലഫ് ഗവർണറുടെ നുകത്തിനു കീഴിൽ കഴിയുന്ന പുതുച്ചേരി സർക്കാർ വരുമാനം പെരുപ്പിച്ചു കാണിക്കുന്നതിനായി മദ്യത്തിന്റെയും മറ്റു സാധനങ്ങളുടെയും പെട്രോളിന്റെയും മേൽ പിടിമുറുക്കിയതോടെ മയ്യഴിയിലേക്കുള്ള വെളിനാട്ടുകാരുടെ വരവും നിലച്ചു. എന്നാലിപ്പോൾ പെട്രോൾ, ഡീസൽ വിലവർധന കാലത്ത് മയ്യഴിയിപ്പോൾ മലയാളികൾക്ക് ആശ്വാസകരമായിരിക്കുകയാണ്.

മയ്യഴിയിൽ ഇന്ധന വില കുറച്ചപ്പോൾ അതിന്റെ ആശ്വാസക്കാറ്റടിച്ചത് തൊട്ടടുത്ത കണ്ണൂർ, കോഴിക്കോട് ജില്ലകളിലേക്കാണ്. കേന്ദ്ര സർക്കാരിന് പിന്നാലെ പുതുച്ചേരിയിലും വാറ്റ് നികുതി കുറച്ചതോടെയാണ് മയ്യഴി മേഖലയിൽ ഇന്ധനവില കുറഞ്ഞത്. ഇതുകാരണം മയ്യഴിയിലേക്ക് തലശേരി, വടകര ഭാഗങ്ങളിലേ വാഹനങ്ങളുടെ ഒഴുക്കാണിപ്പോൾ. കണ്ണൂരിൽ നിന്നും കോഴിക്കോട്ടേക്ക് പോയിവരുന്ന സ്വകാര്യബസുകളും മാഹിയിൽ ചവുട്ടി നിർത്തിയാണ് ഇന്ധനം നിറയ്ക്കുന്നത്.

പെട്രോളിന് 92.52 രൂപയും, ഡീസലിന് 80.94 രൂപയുമാണ് മാഹിയിൽ വ്യാഴാഴ്ചത്തെ വില. അതേസമയം മാഹിക്ക് തൊട്ടടുത്ത് കിടക്കുന്ന തലശേരിയിൽ ഇപ്പോഴും പെട്രോൾ വില നൂറിന് മുകളിൽ തുടരുകയുണ്. ഡീസലിന് 18.92 രൂപയും പെട്രോളിന് 12.80 രൂപയുമാണ് പുതുച്ചേരിയിൽ വില കുറച്ചത്. ഇതോടെ ഇവിടെ പെട്രോളിന് 92.52 രൂപയും, ഡീസലിന് 80.94 രൂപയിലുമെത്തി. കേന്ദ്രസർക്കാർ പെട്രോൾ, ഡീസൽ എക്‌സൈസ് നികുതി കുറച്ചതോടെയാണ് മറ്റു സംസ്ഥാനങ്ങൾക്ക് പിന്നാലെ പുതുച്ചേരിയും നികുതി കുറച്ചത്. മാഹിയിൽ ഇന്ധന വില കുറഞ്ഞത് വലിയ തോതിൽ ആശ്വാസകരമാണെന്ന് തലശേരിയിലെ ഓട്ടോ ഡ്രൈവർമാർ പറയുന്നു.

കേരളത്തിലിപ്പോഴും ഇന്ധന വില മാറ്റമില്ലാതെ തുടരുന്നത് ഇവർക്ക് ജീവിത പ്രതിസന്ധി സൃഷ്ടിക്കുന്നുണ്ട്. പെട്രോളിന് 104 രൂപ 54 പൈസയും ഡീസലിന് 91 രൂപ 80 പൈസയുമാണ് ഇവിടുത്തെ വില. കേരളത്തിൽ വില കുറയാത്തതിനാൽ തലശേരി, വടകര ഭാഗങ്ങളിലുള്ളവരെല്ലാം മയ്യഴിയിലെ പെട്രോൾ പമ്പുകളെ കൂടുതൽ ആശ്രയിക്കുമെന്നാണ് സൂചന. ഇതിനാൽ മയ്യഴിയിലെ പമ്പുകളിൽ വാഹനങ്ങളുടെ തിരക്കും കൂടുകയാണ്.

പുതുച്ചേരി സർക്കാർ ചെയ്തതു പോലെ കേരള സർക്കാരും ഇന്ധനത്തിന്റെ എക്‌സൈസ് തീരുവ കുറയ്ക്കണമെന്നാണ് ജനങ്ങളുടെ ആവശ്യം. വിവിധ സംസ്ഥാനങ്ങളിലെ തെരഞ്ഞെടുപ്പ് പരാജയത്തെ തുടർന്ന് ബിജെപി സർക്കാർ ജനരോഷം ഭയന്ന് ഇന്ധന വില വർധനവ് പിൻവലിക്കാൻ തയ്യാറായെങ്കിലും കേരളത്തിൽ അധികവരുമാനം നഷ്ടപ്പെടുത്താൻ കഴിയില്ലെന്നാണ് ധനകാര്യമന്ത്രി കെ എൻ ബാലഗോപാൽ പറയുന്നത്. ഇതോടെ ഇന്ധനവിലക്കയറ്റം കൊണ്ടു പൊറുതി മുട്ടുന്ന സാധാരണക്കാർ നിരാശയിലായിട്ടുണ്ട്. മയ്യഴിയിലെ ഇന്ധന വിലക്കുറവ് രാഷ്ട്രീയ പോരിനും ഇടയാക്കിയിട്ടുണ്ട്. കേരളത്തിൽ എക്‌സൈസ് നികുതി കുറയ്ക്കില്ലെന്ന എൽഡിഎഫ് സർക്കാർ തീരുമാനത്തിനെതിരെ സമരത്തിനിറങ്ങാൻ ഒരുങ്ങുകയാണ് പ്രതിപക്ഷ പാർട്ടികളായ കോൺഗ്രസും ബിജെപിയും.