അറം പറ്റിയ കവിതയും കവിയുടെ പുറത്താകലും.. പിണറായിയെ കലി തുള്ളിച്ച ഒരു കവിയുണ്ട് കണ്ണൂരിൽ

ഇന്ന് സ്വർണക്കടത്ത് കേസിലും ലൈഫ്മിഷൻ അഴിമതി കേസിലും ആരോപണ വിധേയനായ മുഖ്യമന്ത്രി പിണറായി വിജയനായിരുന്നു അന്നത്തെ പാർട്ടി സെക്രട്ടറി.വിഎസ്-പിണറായി വിഭാഗീയത നിലനിൽക്കുന്നതിനാൽ എതിരെ നിൽക്കുന്നവരെ വെട്ടിനിരത്താനുള്ള അക്രമോത്സുകതയിലായിരുന്നു പിണറായിയും അദ്ദേഹത്തോടൊപ്പം നിൽക്കുന്നവരും. പാർട്ടി അംഗവും പുരോഗമന കലാസാഹിത്യ സംഘം കണ്ണൂർ ജില്ലാ സെക്രട്ടറിയുമായ ഉമേഷ് ബാബുവിന്‍റെ കവിത വേദിയിൽ പരസ്യമായി വായിച്ചാണ് ഒഞ്ചിയത്തു പിണറായി പ്രസംഗമാരംഭിച്ചത്.

ഉമേഷ് ബാബുവധമാണ് പിന്നെയവിടെ നടന്നത്. പാർട്ടിയെ അപകീർത്തിപ്പെടുത്തുന്നതിനാണ് ഉമേഷ് ബാബു പാർട്ടി വിരുദ്ധർ നടത്തുന്ന ജനശക്തിയിൽ കവിതയെഴുതിയതെന്നായിരുന്നു പിണറായിയുടെ ആരോപണം. എഴുതിയ ഓരോ വരികളും എടുത്തു വായിച്ച് അതു പാർട്ടി വിരുദ്ധമാണെന്നു സ്ഥാപിച്ചു. കമ്മിഷൻ വാങ്ങുന്ന പാർട്ടിയാണെന്നു ചിത്രീകരിച്ച് സിപിഎമ്മിനെ അപകീർത്തിപ്പെടുത്തിയതിന് നടപടിയെടുക്കുമെന്നു ഒഞ്ചിയം രക്തസാക്ഷി അനുസ്മരണ പ്രസംഗത്തിനിടെ പിണറായി മുന്നറിയിപ്പു നൽകി.

ഒരു പക്ഷെ കവിതയെഴുതിന് പാർട്ടിയിൽ നിന്നും പുറത്താക്കപ്പെട്ട ഏക കവിതാനായിരിക്കുമെന്ന് കെസി ഉമേഷ് ബാബു പറയുന്നു. പിണറായി പറഞ്ഞതു പോലെ പിറ്റേന്നു ചെയ്തു. പാർട്ടി കണ്ണൂർ ജില്ലാ കമ്മിറ്റി ഓഫിസിൽ നിന്നും ഫ്രാക്ഷൻ യോഗം ചേരുന്നുണ്ടെന്ന അറിയിപ്പു ലഭിച്ചു. പ്രതീക്ഷിച്ചതു പോലെ 19 വർഷത്തോളമിരുന്ന പുരോഗമന കലാസാഹിത്യ സംഘം സെക്രട്ടറി സ്ഥാനത്തു നിന്നും ഗസറ്റഡ് ഓഫീസേഴ്സ് അസോസിയേഷൻ സംഘടനയിൽ നിന്നും നീക്കം ചെയ്തു.

യഥാർത്ഥത്തിൽ കവിത എഴുതിയതിനല്ല 1996- മുതൽ സിപിഎമ്മിലുണ്ടായ ഉൾപാർട്ടി തർക്കങ്ങളാണ് തന്‍റെ പുറത്താക്കലിനു പിന്നിലെന്ന് ഉമേഷ് ബാബു പറയുന്നു. 20 വർഷങ്ങൾക്ക് ഇപ്പുറം അന്നത്തെ പാർട്ടി സെക്രട്ടറി ഇന്നത്തെ ഇടതു സർക്കാരിനെ നയിക്കുമ്പോൾ ലൈഫ് പദ്ധതിയിൽ ഉൾപ്പെടെ കമ്മിഷൻ വിവാദത്തിൽ കുടുങ്ങിയത് ചരിത്രത്തിന്‍റെ യാദൃശ്ചികതയോ കാവ്യനീതിയോ ആണെന്നാണ് കവിതയെഴുതിയതിന് പുറത്താക്കപ്പെട്ട കവിയുടെ നിലപാട്.