പാര്‍ട്ടി ഏരിയാസെക്രട്ടറിയായിരുന്ന വി.കുഞ്ഞികൃഷ്ണനാണ് പയ്യന്നൂരിലെ പാര്‍ട്ടി ഫണ്ട് വെട്ടിപ്പ് ഏരിയാ കമ്മിറ്റിയോഗത്തിലും ജില്ലാ നേതൃത്വത്തിന്റെ ശ്രദ്ധയിലും കണക്കുകള്‍ സഹിതം കൊണ്ടുവന്നത്. എന്നാല്‍ വിഭാഗീയതയുടെ പ്രവര്‍ത്തനമാരംഭിച്ച് കുഞ്ഞികൃഷ്ണനെ തല്‍സ്ഥാനത്തു നിന്നും നീക്കം ചെയ്ത ജില്ലാ നേതൃത്വം അദ്ദേഹം പാര്‍ട്ടിക്കുള്ളില്‍ ഉന്നയിച്ച സാമ്പത്തിക ക്രമക്കേടുകള്‍ക്ക് മുന്‍പില്‍ നിശബ്ദമാവുകയായിരുന്നു. ഇതോടെയാണ് പാര്‍ട്ടിക്കുള്ളില്‍ നിന്നും പുറത്തുപോകാനുള്ള തീരുമാനംകുഞ്ഞികൃഷ്ണന്‍ പരസ്യമായി പ്രഖ്യാപിച്ചത്.
കണക്കുകൾ പ്രതിരോധിക്കാൻ സിപിഎമ്മിനാകുമോ?
ഇതു അണികളില്‍ രോഷം പടര്‍ത്തുകയും സംസ്ഥാനമാകെ ചര്‍ച്ചയാവുകയും ചെയ്തതോടെ കടുത്ത സമ്മര്‍ദ്ദത്തിലായിരിക്കുകയാണ് ജില്ലാ നേതൃത്വം. പാര്‍ട്ടിസഹകരണ സ്ഥാപനങ്ങളില്‍ സാമ്പത്തിക ക്രമക്കേടുകളുണ്ടായാല്‍ ഓഡിറ്ററുടെ ജോലി ചെയ്തു വരുന്നയാളാണ് വി കുഞ്ഞികൃഷ്ണന്‍. അതുകൊണ്ടു തന്നെ കുഞ്ഞികൃഷ്ണന്‍ പുറത്തുവിടുന്ന കണക്കുകള്‍ പ്രതിരോധിക്കാന്‍ സിപിഎം ജില്ലാ നേതൃത്വം ഏറെ വിയര്‍ക്കേണ്ടി വരും. വരും ദിനപയ്യന്നൂരിലെ സി.പി. എം ഫണ്ട് വിവാദത്തില്‍ ഇനി കണക്കുകളുടെ കളിയാണ് നടക്കാന്‍ പോകുന്നതെന്നാണ് സൂചന.
ജില്ല നേതൃത്വം കണക്ക് പുറത്ത് വിടണം
പാര്‍ട്ടി ഫണ്ട് ക്രമക്കേട് നടന്നുവെന്ന വിവാദത്തില്‍ ധനാപഹരണം നടന്നില്ലെന്ന സിപിഎം കണ്ണൂര്‍ ജില്ലാസെക്രട്ടറിയേറ്റിന്റെ പ്രസ്താവനയില്‍ കടുത്ത അമര്‍ഷം ആരോപണമുന്നയിച്ചവരാണ് ഇത്തരം നീക്കങ്ങള്‍ക്ക് പിന്നില്‍. ഈ സാഹചര്യത്തില്‍ ജില്ലാ നേതൃത്വം കണക്ക് പുറത്തുവിടണമെന്നാണ് ഇവര്‍ പറയുന്നത്. ഇങ്ങനെ കണക്ക് പുറത്തുവിട്ടാല്‍ തങ്ങളുടെ കൈയ്യിലുള്ള യഥാര്‍ത്ഥ കണക്ക് ജനങ്ങളുടെ മുന്‍പില്‍ അവതരിപ്പിക്കാന്‍ തയ്യാറാണെന്നും ഇവര്‍ പറയുന്നു.
നടന്നത് ഒരു കോടിയുടെ വെട്ടിപ്പ്
കഴിഞ്ഞ ദിവസം കരിവെള്ളൂരില്‍ നടന്ന ലോക്കല്‍ ജനറല്‍ ബോഡിയോഗത്തില്‍ ഇവര്‍ ഈക്കാര്യം ആവശ്യപ്പെട്ടതായാണ് സൂചന. സിപിഎം സംസ്ഥാന കമ്മിറ്റിയംഗമായ പി ജയരാജനാണ് യോഗത്തില്‍ പങ്കെടുത്തത്. ഈയൊരു ആവശ്യം ജില്ലാകമ്മിറ്റിയുടെ ശ്രദ്ധയില്‍പ്പെടുത്താമെന്ന് ജയരാജന്‍ ഉറപ്പു നല്‍കിയതായാണ് പാര്‍ട്ടിക്കുള്ളില്‍ നിന്നും ലഭിക്കുന്ന വിവരം. പയ്യന്നൂരില്‍ മൂന്ന് ഫണ്ടുകളിലായി ഒരു കോടിരൂപയുടെ വെട്ടിപ് നടന്നതായാണ് വിമതവിഭാഗം ആരോപണമായി ഉന്നയിക്കുന്നത്. കണ്ണൂരിലെ പാര്‍ട്ടിയുടെ ചരിത്രത്തില്‍ ആദ്യമായാണ് ഇത്രവലിയ സംഖ്യ വെട്ടിപ്പു നടന്നതായി ആരോപണമുയര്‍ന്നിരിക്കുന്നത്.