ആവേശം വാനോളം; കണ്ണൂരിൽ കോൺഗ്രസ് ഭവൻ ഉദ്ഘാടനം ചെയ്തു

പ്രവർത്തകരുടെയും നേതാക്കളുടെയും ആവേശം വാനോളമുയർത്തി കണ്ണൂർ ജില്ലാ കോൺഗ്രസ് കമ്മിറ്റിയുടെ ആസ്ഥാന മന്ദിരമായ കോൺഗ്രസ് ഭവൻ എഐസിസി മുൻ അധ്യക്ഷൻ രാഹുൽ ഗാന്ധി ഓൺലൈനിലൂടെ ഉദ്ഘാടനം ചെയ്തു. സംസ്ഥാന കോൺഗ്രസ് രാഷ്ട്രീയത്തിലെ പ്രമുഖ നേതാക്കൾ അണിനിരന്ന ഉദ്ഘാടന ചടങ്ങിൽ കോൺഗ്രസിൻ്റെ ദേശീയ തലത്തിലും ജില്ലയിലും നടന്ന സംഭവങ്ങളിലേക്ക് വെളിച്ചം വീശുന്ന ഒട്ടേറെ മുഹൂർത്തങ്ങൾ സമ്മാനിച്ചു. വന്ദേ മാതരം ഗാനത്തോടൊപ്പം ദേശീയ പ്രസ്ഥാനം തൊട്ട് സംസ്ഥാന തലത്തിലടക്കം നടന്ന പ്രധാനപ്പെട്ട സംഭവങ്ങൾ വീഡിയോ ദൃശ്യങ്ങളായി കാണികളുടെ മുന്നിലെത്തി. ജില്ലയിലെ കോൺഗ്രസ് പ്രസ്ഥാനത്തിന് നേതൃത്വം നൽകിയ പ്രസിഡൻ്റുമാരുടെ ചിത്രങ്ങൾ സഹിതം വീഡിയോ ദൃശ്യങ്ങൾ പ്രദർശിപ്പിച്ചതും ഉദ്ഘാടന ചടങ്ങിനെ വേറിട്ടതാക്കി. കോൺഗ്രസ് ഭവൻ യാഥാർഥ്യമാക്കുന്നതിൽ ഏറ്റവും വലിയ പങ്കുവഹിച്ച സതീശൻ പാച്ചേനി ഉദ്ഘാടനത്തിന് രാഹുൽ ഗാന്ധിയെ ക്ഷണിച്ചതോടെയാണ് ചടങ്ങിന് തുടക്കമായത്. ബ്രൗൺ ടീ ഷർട്ടിൽ രാഹുൽ ഗാന്ധിയുടെ വീഡിയോ പ്രത്യക്ഷപ്പെട്ടതോടെ സദസിൽ നിന്നും കൈയ്യടി ഉയർന്നു. നേരത്തെ കോൺഗ്രസ് ഭവന് മുന്നിൽ കെപിസിസി അധ്യക്ഷൻ കെ സുധാകരൻ പതാക ഉയർത്തി. യുഡിഎഫ് കൺവീനർ എം എം ഹസൻ ഗാന്ധി പ്രതിമ അനാവരണം ചെയ്തു. എൻ രാമകൃഷ്ണൻ സ്മാരക ഓഡിറ്റോറിയം പ്രതിപക്ഷ നേതാവ് വി ഡി സതീശൻ, കെ സുരേന്ദ്രൻ സ്മാരക വായനാമുറി കെപിസി സി വർക്കിങ് പ്രസിഡൻ്റ് കൊടിക്കുന്നിൽ സുരേഷ് എംപി, സാമുവൽ ആറോൺ സ്മാരക രാഷ്ട്രീയ റഫറൻസ് ലൈബ്രറി പി ടി തോമസ് എംഎൽഎ എന്നിവർ ഉദ്ഘാടനം ചെയ്തു. എഐസിസി ജനറൽ സെക്രട്ടറി കെ സി വേണുഗോപാൽ, കേരളത്തിൻ്റെ സംഘടനാ ചുമതലയുള്ള സെക്രട്ടറി പി വി മോഹനൻ, രാജ് മോഹൻ ഉണ്ണിത്താൻ എംപി, ഡിസിസി പ്രസിഡൻ്റ് മാർട്ടിൻ ജോർജ് എംഎൽഎമാരായ സജീവ് ജോസഫ്, സണ്ണി ജോസഫ്, ടി സിദ്ദിഖ്, ബിന്ദുകൃഷ്ണ തുടങ്ങിയവർ പങ്കെടുത്തു. കോൺഗ്രസ് മുൻ നേതാക്കളുടെ കുടുംബാംഗങ്ങൾ, രക്തസാക്ഷി കുടുംബാംഗങ്ങൾ, പാർട്ടി പോഷക സംഘടനാ ഭാരവാഹികൾ എന്നിവരും ചടങ്ങിൽ പങ്കെടുത്തു.