പി ടി ഉഷ ഇതല്ല ഇതിലപ്പുറവും പറയും; ജോണ്‍ ബ്രിട്ടാസിന്‍റെ നിലപാട് അഭിമാനകരം: ടി പത്മനാഭന്‍

കണ്ണൂര്‍: ഗുസ്തി താരങ്ങളുടെ പ്രതിഷേധത്തെ പി ടി ഉഷ തള്ളിപ്പറഞ്ഞത് സ്ഥാനമാനങ്ങള്‍ മോഹിച്ചെന്ന് കഥാകൃത്ത് ടി പത്മനാഭന്‍. പി ടി ഉഷ ഗുസ്തി താരങ്ങളെ തള്ളിപ്പറഞ്ഞത് ശരിയായില്ല. സ്ഥാനം മോഹിച്ചാണ് ഉഷയുടെ ഇപ്പോഴത്തെ പ്രവര്‍ത്തനങ്ങള്‍. അതിനായി അവര്‍ ഇതും ഇതിലപ്പുറവും പറയുമെന്നും ടി.പത്മനാഭന്‍ പറഞ്ഞു. തളിപ്പറമ്പ് മണ്ഡലം സമഗ്ര വിദ്യാഭ്യാസ പദ്ധതിയുടെ ഭാഗമായി നടക്കുന്ന ടേണിങ് പോയിന്‍റ് 2023 മൂത്തേടത്ത് ഹയര്‍ സെക്കന്‍ഡറി സ്‌കൂളില്‍ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഇന്ത്യ ഇരുണ്ട കാലഘട്ടത്തിലൂടെയാണ് കടന്ന് പോകുന്നത്. വെളിച്ചം ഏറെ അകലെയാണ്. ഗാന്ധിയെയും നെഹ്‌റുവിനെയും മുഗള്‍ രാജവംശത്തിന്‍റെ സംഭാവനകളെയും കുട്ടികള്‍ പഠിക്കണ്ട എന്നാണ് ഇന്ത്യ ഭരിക്കുന്നവരുടെ തീരുമാനം. എന്നാല്‍ കേരള സര്‍ക്കാര്‍ ഇത് തള്ളിക്കളയുകയും നീക്കം ചെയ്ത ഭാഗങ്ങള്‍ പഠിപ്പിക്കുമെന്ന് കേന്ദ്ര സര്‍ക്കാരിനെ അറിയിക്കുകയും ചെയ്തു. ഇതില്‍ ഒരു മലയാളി എന്ന നിലയില്‍ അഭിമാനമുണ്ട്.

Also Read : കക്കുകളി നാടകം നിരോധിക്കണം; വിശ്വാസങ്ങളെ വ്രണപ്പെടുത്താനും നോവിക്കാനുമുള്ള ശ്രമങ്ങള്‍ അനുവദിക്കാനാവില്ല: ജോസ് കെ മാണി



അഭിപ്രായ പ്രകടന സ്വാതന്ത്ര്യം രാജ്യത്ത് ഇല്ലാതാകുകയാണ്. ഒരു തെറ്റും ചെയ്യാത്ത രാഹുല്‍ ഗാന്ധിയെ രാജ്യത്തിന്‍റെ വിവിധ ഭാഗങ്ങളില്‍ കേസ് നല്‍കി പീഡിപ്പിക്കുകയാണ്. അഭിപ്രായ പ്രകടനത്തിന്‍റെ പേരില്‍ ജോണ്‍ ബ്രിട്ടാസിനെയും വേട്ടയാടുകയാണ്. അദ്ദേഹം തെറ്റായ ഒരു കാര്യവും പറഞ്ഞിട്ടില്ല. ഭരണഘടനയ്ക്ക് അനുസരിച്ച് തുടര്‍ന്നും അഭിപ്രായ പ്രകടനം നടത്തുമെന്ന അദ്ദേഹത്തിന്‍റെ നിലപാട് അഭിമാനകരമാണെന്നും ടി പത്മനാഭൻ പറഞ്ഞു.

Also Read : കെ ഫോണിൽ എഐ ക്യാമറയെയും വെല്ലുന്ന അഴിമതി; രണ്ട് ഇടപാടുകളിലും ഒരേ കറക്ക് കമ്പനികൾ: വി ഡി സതീശൻ

മൂത്തേടത്ത് സ്കൂളിൽ നടന്ന ചടങ്ങിൽ എം വി ഗോവിന്ദന്‍ എം എല്‍ എ അധ്യക്ഷനായി. ഗോപിനാഥ് മുതുകാട്, പി എം റിയാസ് എന്നിവര്‍ മുഖ്യാതിഥികളായി. കെ സി ഹരികൃഷ്ണന്‍, വി എ ശശീന്ദ്രവ്യാസ്, ജ .ഗിരീഷ്, പി കെ ശ്യാമള, ടി ഷീബ, പി പി മുഹമ്മദ് നിസാര്‍ എന്നിവർ സംസാരിച്ചു.