വീടിന്റെ ഗ്രില്‍സ് കുത്തി തുറന്നു, ഇലക്ട്രിക് കട്ടര്‍ ഉപയാഗിച്ചു അലമാര മുറിച്ചു, നഷ്ടമായത് സ്വർണവും പണവും, കള്ളനെ കിട്ടിയപ്പോൾ വീട്ടുകാരും ഞെട്ടി

കണ്ണൂര്‍: കണ്ണൂരില്‍ ബന്ധുവീട്ടില്‍ വന്‍കവര്‍ച്ച നടത്തിയ യുവാവിനെ പോലിസ് തന്ത്രപരമായി പിടികൂടി. കണ്ണൂര്‍ നഗരത്തിലെ താണ ദിനേശ് ഓഡിറ്റോറിയത്തിന് സമീപം വീടുകുത്തിതുറന്ന് പതിമൂന്നര പവനും പതിനഞ്ചായിരം രൂപയും മോഷ്ടിച്ച കേസില്‍ പരാതിക്കാരി പുഷ്പലതയുടെ അനുജത്തിയുടെ മകളുടെ ഭര്‍ത്താവിനെയാണ് പോലീസ് പിടികൂടി. സിദ്ദാര്‍ത്ഥ് സോമശേഖരനാ(37)ണ് അറസ്റ്റിലായത്. വീട്ടുടമയും മറ്റുബന്ധുക്കളും പുറത്തു പോയ സമയത്ത് പ്രതി ബന്ധുവീട്ടില്‍ തന്നെ തക്കം പാര്‍ത്ത് കവര്‍ച്ച നടത്തുകയായിരുന്നു.

മോഷണം നടത്തിയത് താനാണെന്ന് സംശയിക്കാതിരിക്കാന്‍ പ്രൊഫഷനല്‍ കള്ളന്‍മാരെപ്പോലെ വീടിന്റെ ഗ്രില്‍സ് കുത്തിതുറന്ന് ഇലക്ട്രിക് കട്ടര്‍ ഉപയാഗിച്ചു അലമാര മുറിച്ചാണ് അലമാരക്കകത്തുണ്ടായിരുന്ന സ്വര്‍ണവും പണവും മോഷ്ടിച്ചത്. സിദ്ധാര്‍ത്ഥിനെതിരെ പാലക്കാട്, കോട്ടയം ജില്ലകളില്‍ മോഷണ കേസുകളുണ്ടെന്ന് പോലീസ് അറിയിച്ചു. ഇയാള്‍ വിവിധ കേസുകളില്‍ രണ്ടുവര്‍ഷം ജയില്‍ ശിക്ഷയും അനുഭവിച്ചിട്ടുണ്ട്. അന്വേഷണത്തിന് കണ്ണൂര്‍ ടൗണ്‍ പോലീസ് ഇന്‍സ്‌പെക്ടര്‍ ബിനു മോഹന്‍, എസ് ഐ നസീബ്, എ എസ്. ഐ രഞ്ജിത്ത്, എ. എസ്. ഐ അജയന്‍, സീനിയര്‍ സിവില്‍ പൊലിസ് ഓഫീസര്‍ നാസര്‍, ഷൈജു, സി പി ഒ രാജേഷ്, ഷിനോജ്, ബിനു, രജില്‍ രാജ് എന്നിവരും പങ്കെടുത്തു.

എറണാകുളത്തു നിന്നാണ് യുവാവിനെ കസ്റ്റഡിയിലെടുത്തത്. പലപ്പോഴായി ഇയാള്‍ ഈ വീട്ടില്‍ കുടുംബാംഗങ്ങളോടൊപ്പം താമസിച്ചിരുന്നു. മോഷണം നടത്തിയത് പുറമേ നിന്നും വന്നയാളല്ലെന്ന് സംഭവദിവസം തന്നെ പൊലിസ് നടത്തിയ അന്വേഷണത്തില്‍ വ്യക്തമായിരുന്നു. തുടര്‍ന്ന് പ്രദേശത്തെ സി സി ടി വി ക്യാമകള്‍ പരിശോധിച്ചപ്പോള്‍ സിദ്ധാര്‍ത്ഥിന്റെ ചിത്രം ലഭിച്ചു. ഇയാള്‍ മോഷണം നടത്തിയതിനു ശേഷം എര്‍ണാകുളത്തേക്ക് മടങ്ങിയെന്നു പോലീസിന് വ്യക്തമായതോടെയാണ് അവിടെ പോയി അറസ്റ്റു ചെയ്തത്.