കൊവിഡിലും അടങ്ങാത്ത രാഷ്ട്രീയ കലിപ്പ്: മൊറാഴയിൽ യുവമോർച്ച നേതാവിന്‍റെ വീട് ബോംബെറിഞ്ഞു തകർത്തു!

കണ്ണൂർ: ഡിവൈഎഫ്ഐ നേതാവിന് വെട്ടേറ്റതിനു പിന്നാലെ യുവമോർച്ച നേതാവിന്‍റെ വീടിനു നേരെയും ബോംബേറ്. കല്യാശേരി മൊറാഴ പണ്ണേരിയിൽ യുവമോർച്ച നേതാവിന്‍റെ വീടിന് നേരെയാണ് ബോംബേറ് നടന്നത്. യുവമോർച്ച കണ്ണൂർ ജില്ലാ ട്രഷറർ വി നന്ദകുമാറിന്‍റെ വീടിന് നേരെയാണ് ബോംബേറുണ്ടായത്. ചൊവ്വാഴ്ച്ച പുലർച്ചെയോടെയാണ് അക്രമം. വീടിന്‍റെ മുൻഭാഗത്തെ ഓടുകളും ജനൽ ഗ്ലാസുകളും വരാന്തയിലെ കസേരയും ബോംബേറിൽ തകർന്നു. അക്രമസമയത്ത് നന്ദകുമാർ വീട്ടിലുണ്ടായിരുന്നു.

Also Read: ഉത്രയെ കടിച്ചത് മൂര്‍ഖനോ? പാമ്പിന്‍റെ ഡിഎന്‍എയും പരിശോധിക്കും, കുറ്റപത്രം 90 ദിവസത്തിനകം!

ശബ്ദം കേട്ട് വീട്ടിലുണ്ടായിരുന്നവർ പുറത്തിറങ്ങിയെങ്കിലും പ്രതികൾ രക്ഷപ്പെടുകയായിരുന്നു.
വിവരമറിഞ്ഞ് തളിപ്പറമ്പ് സിഐ എൻ.കെ. സത്യനാഥൻ, എസ്ഐ പിസി സഞ്ജയ് കുമാർ എന്നിവരുടെ നേതൃത്വത്തിൽ പോലീസ് സ്ഥലത്തെത്തി അന്വേഷണം നടത്തി. സ്ഥലത്ത് പോലീസ് കാവൽ ഏർപ്പെടുത്തി. ബോംബ് സ്ക്വാഡും വിരലടയാള വിദഗ്ധരും സ്ഥലത്തെത്തി പരിശോധന നടത്തി.

Also read: അഞ്ജന ലൈംഗികമായി പീഡിപ്പിക്കപ്പെട്ടോ... ഗോവ പോലീസ് പറയുന്നത് ഇങ്ങനെ!

ഇതിനു മുൻപായി തിങ്കളാഴ്ച്ച രാത്രി എട്ടോടെ മൊറാഴയ്ക്ക് സമീപം കണ്ണപുരം പോലീസ് സ്റ്റേഷൻ പരിധിയിലെ മൊട്ടമ്മലിൽ ഡിവൈഎഫ്ഐ പ്രവർത്തകൻ ആദർശിന് തലയ്ക്ക് വെട്ടേറ്റിരുന്നു.
പരിക്കേറ്റ ആദർശ് ചെറുകുന്ന് കോൺവന്‍റ് ആശുപത്രിയിൽ ചികിത്സയിലാണ്. ബോംബേറിന് പിന്നിൽ ഈ സംഭവവുമായി ബന്ധമുണ്ടോ എന്ന് പോലീസ് പരിശോധിച്ച് വരികയാണ്.