കാസര്കോട്: മംഗളൂരുവില് നിന്ന് ഉള്ളിയുടെ പേരില് പാസെടുത്ത് വരികയായിരുന്ന മിനിലോറി ചെറുവത്തൂരില് അപകടത്തില്പെട്ട് തലകീഴായി മറിഞ്ഞു. ചൊവ്വാഴ്ച വൈകീട്ട് ആറുമണിയോടെ ചെറുവത്തൂര് ജോഷ്വാ ടയേര്സിന് സമീപത്താണ് മിനി ലോറി തലകീഴായി മറിഞ്ഞത്. മംഗളൂരുവില് നിന്നും വടകരയിലേക്ക് പോകുന്ന മിനി വാനാണ് അപകടത്തില്പ്പെട്ടത്. രക്ഷാപ്രവര്ത്തനത്തിനായി നാട്ടുകാരെത്തിയപ്പോഴാണ് സംഭവമറിയുന്നത്.
Also Read: നീലേശ്വരം പീഡന കേസില് പ്രതിയായ പിതാവിന് കൊവിഡ്; തെളിവെടുപ്പ് നടത്തിയ പോലീസുകാര് ക്വാറന്റൈനില്
തകര്ന്ന ഉള്ളി ചാക്കുകള്ക്കിടയില് നിന്നും നിരോധിത പുകയില ഉത്പന്നങ്ങളുടെ ചാക്കുകളും കണ്ടെടുത്തു. പോലീസ് എത്തും മുമ്പേ അപകടത്തില്പെട്ട ലോറിയുടെ ഡ്രൈവറും ക്ലീനറും രക്ഷപ്പെട്ടു. വാഹനത്തിലുണ്ടായിരുന്ന 30 ചാക്കില് ഇരുപതോളം ചാക്ക് നിറയെ നിരോധിത പാന് ഉത്പന്നങ്ങള് ആയിരുന്നു. പത്തു ലക്ഷത്തിലേറെ വിലയുള്ള പുകയില ഉത്പന്നങ്ങളാണ് വാഹനത്തിലുണ്ടായിരുന്നതെന്ന് പോലീസ് പറഞ്ഞു. കൊവിഡ്19 പശ്ചാത്തലത്തില് ഉള്ളി എന്ന വ്യാജേനയാണ് നിരോധിത പുകയില ഉത്പന്നങ്ങള് കടത്താന് ശ്രമിച്ചത്.
Also Read: തെളിവെടുപ്പിനിടെ കൈവിലങ്ങോടുകൂടി കടലില് ചാടിയ പ്രതിയുടെ മൃതദേഹം ഉഡുപ്പിയില് കണ്ടെത്തി
മഞ്ചേശ്വരം ചെക്ക് പോസ്റ്റില് നിന്ന് അധികൃതരെ വെട്ടിച്ചാണ് ചെറുവത്തൂരുവരെ വാഹനമെത്തിയത്. തലപ്പാടിയില് വേണ്ടത്ര പരിശോധന നടക്കാത്തതിനാലാണ് ഇത്തരം വാഹനങ്ങള് അതിര്ത്തി കടക്കുന്നതെന്നാണ് ആരോപണം. അതേസമയം വാഹനത്തിലുണ്ടായിരുന്നവരെ തിരിച്ചറിഞ്ഞതായി സി.ഐ എസ് നിസാം പറഞ്ഞു. ജില്ലയില് തന്നെ ഏറ്റവും വലിയ പാന് മസാല വേട്ടയാണ് ചെറുവത്തൂരില് നടന്നത്.