കാസര്കോട്: ഹൊസ്ദുര്ഗ് പോലീസ് സ്റ്റേഷനിലെ ആറ് പോലീസുകാര്ക്ക് കൂടി കൊവിഡ് സ്ഥിരീകരിച്ചു. ഇതോടെ സ്റ്റേഷനില് കൊവിഡ് ബാധിച്ചവരുടെ എണ്ണം എട്ടായി. ഇതിനിടെ സമ്പര്ക്ക പട്ടികയിലുള്ളവരെ നിരീക്ഷണത്തില് പോകാന് അനുവദിച്ചില്ലെന്ന് ഗുരുതര ആരോപണം ഉയരുന്നുണ്ട്.
ഹൊസ്ദുര്ഗ് പോലീസ് സ്റ്റേഷനില് നേരത്തെ കൊവിഡ് സ്ഥിരീകരിച്ചവരുമായി അടുത്ത സമ്പര്ക്കം പുലര്ത്തിയവരെ നിരീക്ഷണത്തില് പോകാന് അനുവദിച്ചില്ലെന്നാണ് പരാതി.
ഇത് സ്റ്റേഷനില് സമ്പര്ക്ക വ്യാപനത്തിന് കാരണമായി എന്നാണ് ആരോപണം. അതേസമയം എസ്പി ആരോപണം നിഷേധിച്ചിട്ടുണ്ട്. ഒരാഴ്ച മുമ്പ് കോടതിയില് പോകുന്ന ഒരു പോലീസുകാരന് കൊവിഡ് സ്ഥിരീകരിച്ചിരുന്നു. അടുത്ത ദിവസം അടുത്ത് സമ്പര്ക്കം പുലര്ത്തിയവരോട് ആന്റിജന് ടെസ്റ്റ് നടത്താന് അധികൃതര് ആവശ്യപ്പെട്ടിരുന്നു. എന്നാല് പരിശോധനാ ഫലം നെഗറ്റീവായിരുന്നു.
Also Read: ഒരു കൊവിഡ് മരണം കൂടി; കാസര്കോട് മരിച്ച 82 കാരിക്ക് രോഗം
കഴിഞ്ഞ ജൂലൈ 28ന് പിങ്ക് പോലീസ് സ്ക്വാഡിലെ ഒരു പോലീസുകാരിയുടെ സ്രവം പരിശോധനക്ക് വിധേയമാക്കിയിരുന്നു. എന്നാല് അവര്ക്ക് പിന്നീട് നിരീക്ഷണത്തില് പോകാന് പോലീസില് നിന്ന് നിര്ദേശം വന്നിരുന്നില്ല. 30ന് അവര്ക്ക് കൊവിഡ് സ്ഥിരീകരണം വന്നതോടെ ഒപ്പം ജോലിചെയ്ത പോലീസുകാര് നിരീക്ഷണത്തില് പോവുകയായിരുന്നു. സ്രവ പരിശോധനക്കയച്ചവരെ ഫലം വരുന്നത് വരെ ഡ്യൂട്ടിക്കിടുന്നതില് പോലീസുകാര്ക്കിടയില് തന്നെ എതിര്പ്പുണ്ട്.