റിമാന്ഡ് കാലാവധി നീട്ടേണ്ട ആവശ്യമില്ല
നടിയെ ആക്രമിച്ച കേസില് ദിലീപിന്റെ ജാമ്യം റദ്ദാക്കാന് കെട്ടിചമച്ച കേസാണിതെന്നും നാല് ദിവസം പോലീസ് ചോദ്യം ചെയ്തെന്നും റിമാന്ഡ് നീട്ടരുതെന്നുമായിരുന്നു പ്രതി ഭാഗത്തിന്റെ വാദം. എന്നാല് ജാമ്യം നല്കിയാല് തെളിവുകള് നശിപ്പിക്കാനും കൂടുതല് സാക്ഷികളെ സ്വാധീനിക്കാനും സാധ്യതയുണ്ടെന്ന് പ്രോസിക്യൂഷന് വാദിച്ചു. നാല് ദിവസം കസ്റ്റഡിയിലെടുത്ത് ചോദ്യം ചെയ്തതിനാല് പ്രദീപ് കുമാറിന്റെ റിമാന്ഡ് കാലാവധി നീട്ടേണ്ട ആവശ്യമില്ലെന്നും ഏഴുവര്ഷത്തില് താഴെ മാത്രം ശിക്ഷ ലഭിക്കാവുന്ന കേസ് ആയതിനാല് കീഴ് കോടതിയ്ക്ക് തന്നെ ജാമ്യം അനുവദിക്കാമെന്നും പ്രതിഭാഗം കോടതിയില് അറിയിച്ചിരുന്നു.
കേസില് ഗൂഢാലോചന
കേസില് പ്രദീപ് കുമാര് കൂലിക്കാരന് മാത്രമാണെന്നും മാപ്പുസാക്ഷിയായ വിപിന് ലാല് നേരത്തെ പറഞ്ഞിരുന്നു. വിപിന്ലാലിന്റെ പരാതിയിലായിരുന്നു പ്രദീപ് കുമാറിനെ അറസ്റ്റ് ചെയ്തത്. പ്രദീപ് കുമാറിനെ മറ്റാരോ അയച്ചതാണെന്നും ഇതിന് പിന്നില് വലിയ ഗൂഢാലോചന നടന്നിട്ടുണ്ടെന്നുമായിരുന്നു വിപിന്ലാലിന്റെ പ്രതികരണം. കെബി ഗണേഷ് കുമാര് എംഎല്എയുടെ മുന് ഓഫീസ് സെക്രട്ടറിയാണ് പ്രദീപ് കുമാര് എന്ന പ്രദീപ് കോട്ടാത്തല. പ്രദീപ് കുമാറിന്റെ അറസ്റ്റിന് പിന്നാലെ അദ്ദേഹത്തെ പേഴ്സണല് സ്റ്റാഫ് അംഗത്തില് നിന്നും പുറത്താക്കിയെന്ന് ഗണേഷ് കുമാര് അറിയിച്ചിരുന്നു.
ദിലീപിന് അനുകൂലമായി മൊഴി നല്കണം
ദിലീപിന് അനുകൂലമായി മൊഴി നല്കണമെന്നവശ്യപ്പെട്ട് മാപ്പുസാക്ഷി വിപിന് ലാലിനെ ഭീഷണിപ്പെടുത്തിയെന്നാണ് പ്രദീപ് കുമാറിനെതിരായ കേസ്. കഴിഞ്ഞ നവംബര് 24 ന് പുലര്ച്ചെയാണ് പത്തനാപുരത്ത് ഗണേഷ് കുമാര് എംഎല്എയുടെ ഓഫീസില് നിന്ന് പ്രദീപ് കുമാറിനെ ബേക്കല് പോലീസ് അറസ്റ്റ് ചെയ്തത്. കാസര്കോട്ടെത്തി ബന്ധുവിനെയും വിപിന്ലാലിനെയും രണ്ടുദിവസങ്ങളില് തുടര്ച്ചയായി ഭീഷണിപ്പെടുത്തിയെന്നാണ് പരാതി.