കൊവിഡിനെ തുരത്താന്‍ കുരുമുളക് പൊടിയിട്ട റമ്മും ഓംലെറ്റും, വിചിത്രവാദവുമായി കോണ്‍ഗ്രസ് നേതാവ്, വീഡിയോ സോഷ്യല്‍ മീഡിയയില്‍ വൈറല്‍

മംഗളൂരു: കൊവിഡിനെ തുരുത്താനുള്ള മരുന്ന് കണ്ടെത്തുന്നതിനായി നിരവധി പരീക്ഷണങ്ങള്‍ ലോകത്ത് നടക്കുകയാണ്. അതിനിടെ കുരുമുളക് പൊടിയിട്ട റമ്മും ഓംലെറ്റും കഴിച്ചാല്‍ രോഗം ഭേദമാകുമെന്ന വിചിത്ര വാദവുമായി രംഗത്തെത്തിയിരിക്കുകയാണ് മംഗളൂരു ഉള്ളാളിലെ ഒരു കോണ്‍ഗ്രസ് കൗണ്‍സിലര്‍. കൊവിഡ് വ്യാപനം ഏറെ നടക്കുന്ന ഉള്ളാളിലെ കോണ്‍ഗ്രസ് നേതാവ് രവിചന്ദ്ര ഗാട്ടിയുടെ ഈ വിഡിയോ സന്ദേശം ഇപ്പോള്‍ സോഷ്യല്‍ മീഡിയയില്‍ വൈറലായിരിക്കുകയാണ്.

Also Read: സ്വര്‍ണ്ണക്കടത്ത് കേസ്; കള്ളത്തരങ്ങള്‍ ഒന്നൊന്നായി പൊളിയുന്നു, വിജിലന്‍സ് പരാജയം, മുഖ്യമന്ത്രിക്കെതിരെ ആഞ്ഞടിച്ച് മുല്ലപ്പള്ളി

നിങ്ങള്‍ ഒരു ടീസ്പൂണ്‍ നിറയെ കുരുമുളക് പൊടി 90 മില്ലി ഖോഡേയ്‌സ് റമ്മില്‍ ഇട്ട്, നന്നായി ഇളക്കി കുടിക്കുക. പകുതി വേവിച്ച മുട്ടക്കൊപ്പം കഴിക്കണമെന്നാണ് വിഡിയോവിലൂടെ പറയുന്നത്. അതേസമയം റം ഞാന്‍ കുടിക്കില്ലെന്നും മത്സ്യം പോലും കഴിക്കുന്നില്ലെന്നും പറയുന്നു. അനുഭവത്തിലൂടെയാണ് ഇത് പറയുന്നത്. വൈറസിനെ ഭയപ്പെടേണ്ട ആവശ്യമില്ലെന്നും നിങ്ങള്‍ മുന്നോട്ട് പോയി ധൈര്യമായി റം കുടിക്കാമെന്നും അദ്ദേഹം ജനങ്ങളെ ഉപദേശിക്കുന്നത് കാണാം. ഗാട്ടിയെ അനുകൂലിച്ചും എതിര്‍ത്തും പലരും സോഷ്യല്‍ മീഡിയയില്‍ പ്രതികരിക്കുന്നുണ്ട്.



കൊറോണ വൈറസ് അണുബാധ ഭേദമാക്കാന്‍ മദ്യം കഴിക്കാന്‍ ആളുകളെ പ്രേരിപ്പിച്ചതിന് ഗാട്ടിക്കെതിരേ കേസെടുക്കണമെന്നും ചിലര്‍ ഉന്നയിക്കുന്നുണ്ട്. ഈ വീഡിയോ കാണുന്ന ചെറിയ കുട്ടികള്‍ക്ക് മദ്യം കൊറോണയെ സുഖപ്പെടുത്തുന്നുവെന്നും അതിനാല്‍ മദ്യം കഴിച്ചേക്കാം എന്നും അവര്‍ക്ക് ആശങ്കയും ചിലര്‍ പങ്കുവയ്ക്കുന്നുണ്ട്. മദ്യം കഴിക്കണമെന്ന ഉപദേശ വിഡിയോ വൈറലായതോടെ കോണ്‍ഗ്രസ് നേതാക്കള്‍തന്നെ ഗാട്ടിക്കെതിരേ രംഗത്തെത്തിയിട്ടുണ്ട്. കഴിഞ്ഞ മുനിസിപ്പല്‍ തെരഞ്ഞെടുപ്പ് സമയത്ത് ബി.ജെ.പി ടിക്കറ്റ് നിഷേധിച്ചതിനാല്‍ അദ്ദേഹം കോണ്‍ഗ്രസ് ടിക്കറ്റില്‍ മല്‍സരിക്കുകയായിരുന്നു.