കാസര്‍കോട്: കഞ്ചാവ് വേട്ടയ്ക്ക് പിറകെ കുമ്പളയില്‍ വന്‍ വിദേശ മദ്യവേട്ട. 441 ലീറ്റര്‍ വിദേശ മദ്യവുമായി യുവാവിനെ പോലീസ് പിടികൂടി. മിയാപദവ് കുളൂരിലെ നവീന്‍ ഷെട്ടി(33)ആണ് പിടിയിലായത്. രഹസ്യ വിവരത്തെ തുടര്‍ന്നാണ് കുമ്പള സിഐ പ്രമോദ്, എസ്ഐ സന്തോഷ് കുമാര്‍ എന്നിവരുടെ നേൃത്വത്തിലുള്ള പോലീസ് അംഗഡിമുഗര്‍ പാലത്തിനു സമീപം റോഡില്‍ പരിശോധന ആരംഭിച്ചത്. തുടര്‍ന്ന് നവീന്റെ
ഇന്നോവ കാര്‍ തടഞ്ഞു നിര്‍ത്തുകയായിരുന്നു. യുവാവിന്റെ പെരുമാറ്റത്തില്‍ സംശയം തോന്നിയതിനെ തുടര്‍ന്ന് കാര്‍ പരിശോധിച്ചപ്പോഴാണ് പെട്ടികളിലാക്കി സൂക്ഷിച്ച മദ്യം പിടികൂടിയത്.
51 കേയ്‌സുകളിലായി 2688 പാക്കറ്റ് വിദേശ മദ്യമാണ് കാറിനകത്തുണ്ടായിരുന്നത്. തുടര്‍ന്ന് മദ്യവും ഇന്നോവ കാറും പോലീസ് കസ്റ്റഡിയിലെടുത്തു. കര്‍ണാടകയില്‍ നിന്നും അംഗടിമുഗര്‍ വഴി കുമ്പള ഭാഗത്തേക്കായിരുന്നു മദ്യം കടത്താന്‍ ശ്രമിച്ചതെന്ന് പോലീസ് പറഞ്ഞു. കുറഞ്ഞ വിലക്ക് ലഭിക്കുന്ന മദ്യം നാലിരട്ടി വിലക്ക് മറിച്ചു വില്‍ക്കുകയാണ് നവീന്‍ ചെയ്യുന്നതെന്ന് പോലീസ് പറഞ്ഞു.
Also Read: മാസ്‌കും കൈയുറയും ഇല്ലാതെ കച്ചവടം നടത്തിയാൽ കടയ്ക്ക് പൂട്ട് വീഴും; ഉത്തരവിറക്കി കളക്ടർ, കാസർകോട് കടുത്ത നിയന്ത്രണം
അഡീഷണല്‍ എസ്ഐ കെപിവി രാജീവന്‍, സിവില്‍ പോലീസ് ഓഫീസര്‍മാരായ രാജീവന്‍, സുഭാഷ്, മനോജ് എന്നിവരാണ് പോലീസ് സംഘത്തിലുണ്ടായിരുന്നത്. പ്രതിയെ വൈകിട്ടോടെ കാസര്‍കോട് കോടതിയില്‍ ഹാജരാക്കി. ലോക് ഡൗണ്‍ പ്രഖ്യാപിച്ചതിനെ തുടര്‍ന്ന് മദ്യ ലഭ്യത കുറഞ്ഞ സാഹചര്യത്തില്‍ അനധികൃത മദ്യ വില്‍പ്പന വര്‍ധിച്ചിരിക്കുകയാണ്. പോലീസും എക്‌സൈസും പരിശോധന ശക്തമാക്കിയിട്ടുണ്ട്.