മുഹമ്മദ് റഫീഖ് എന്ന മൗഗ്ലി റഫീഖിനെ വധിക്കാന് ശ്രമിച്ച കേസിലെ പ്രതിയാണ് കസായി അലി. ഉപ്പളയിലെ പ്രമാദമായ മുത്തലിബ് വധക്കേസിലെ പ്രതികളിലൊരാളായിരുന്നു മൗഗ്ലി റഫീഖ്. സാക്ഷികളെല്ലാം പോലീസുകാരായതിനാല് പരമാവധി ശിക്ഷയാണ് പ്രതിക്ക് ലഭിച്ചത്. ഉപ്പളയിലെ അധോലോക സംഘങ്ങള്ക്കേറ്റ തിരിച്ചടി കൂടിയാണ് ഈ വിധി. കഞ്ചാവിന്റെയും കള്ളക്കടത്തിന്റെയും പേരില് ഇവിടെ നിരവധി പേരാണ് കൊലക്കിരയായത്. ഇന്നും കേരള കര്ണാടക പോലീസിന് പേടി സ്വപ്നമാണ് ഉപ്പളയിലെ അധോലോകം. മഞ്ചേശ്വരം കേന്ദ്രീകരിച്ച് നാലുഗ്രൂപ്പുകളാണ് പ്രവര്ത്തിക്കുന്നത്. നിയന്ത്രണമെല്ലാം വിദേശത്തുവച്ചും.
ഏഴു വര്ഷം മുമ്പ് നടന്ന അക്രമം
2013 ഡിസംബര് 16 ന് ഉച്ചയ്ക്ക് 11.30 മണിയോടെ വിദ്യാനഗറിലുള്ള കോടതി കോംപ്ലക്സിന് സമീപത്ത് വച്ചാണ് കൊലക്കേസ് പ്രതിയെ വെട്ടിക്കൊല്ലാന് ശ്രമിച്ചത്. കുപ്രസിദ്ധ ക്രിമിനല് കാലിയാ റഫീഖിന്റെ കൂട്ടുപ്രതിയായ മൗഗ്ലി റഫീഖിനെ പോലീസ് കോടതിയില് ഹാജരാക്കിയ ശേഷം തിരിച്ച് ജയിലിലേക്ക് കൊണ്ടുപോകുന്നതിനിടെയാണ് അക്രമം നടന്നത്. കോടതിയുടെ ഗേറ്റിന് സമീപം വെച്ച് റഫീഖിന്റെ കഴുത്തിന് കസായി അലി കൊടുവാള് കൊണ്ട് വെട്ടുകയായിരുന്നു. കഴുത്തിന് ആഴത്തില് മുറിവേറ്റ റഫീഖിനെ ആദ്യം കാസര്കോട്ടെ ആശുപത്രിയില് പ്രവേശിപ്പിച്ചെങ്കിലും നില ഗുരുതരമായതിനാല് മംഗളൂരുവിലേക്ക് മാറ്റിയിരുന്നു. റഫീഖിന്റെ പരാതിയില് കസായി അലിക്കെതിരെ വധശ്രമത്തിനാണ് പോലീസ് കേസെടുത്തത്.
പോലീസിന്റെ പഴുതടച്ച അന്വേഷണം
ഉപ്പളയില് അധോലോക പ്രവര്ത്തനങ്ങള്ക്ക് നേതൃത്വം കൊടുക്കുന്ന സംഘത്തിലെ പ്രധാനിയായിരുന്നു കസായി അലി. ഉപ്പളയിലെ മുത്തലീബിനെ കൊലപ്പെടുത്തിയ വിരോധമാണ് മൗഗ്ലി റഫീഖിന്റെ വധശ്രമത്തില് കലാശിച്ചത്. അന്നത്തെ വിദ്യാനഗര് സിഐ ഡോ. വി ബാലകൃഷ്ണന്റെ നേതൃത്വത്തിലാണ് ഈ കേസില് അന്വേഷണം നടത്തി പ്രതിയെ അറസ്റ്റ് ചെയ്തിരുന്നത്. പിന്നീട് സിഐ സിപി ജേക്കബ് കോടതിയില് കുറ്റപത്രം സമര്പ്പിക്കുകയായിരുന്നു. എസ്ഐ ജോര്ജ്, സിവില് പോലീസ് ഓഫീസര്മാരായ രാജേഷ്, സുമേഷ് എന്നിവരും അന്വേഷണ സംഘത്തിലുണ്ടായിരുന്നു. പ്രോസിക്യൂഷന് വേണ്ടി പബ്ലിക് പ്രോസിക്യൂട്ടര് മോഹനന് ഹാജരായി. സാധാരണ ഉപ്പളയിലെ കൊലയ്ക്ക് സാക്ഷികളാരും മുന്നോട്ട് വരാറില്ല. ഗുണ്ടാ തലവന്മാരും കൂട്ടാളികളും സാക്ഷികളെ ഭീഷണിപ്പെടുത്തിയും പ്രലോഭിപ്പിച്ചും കൂറുമാറ്റി കേസുകളില് നിന്നെല്ലാം രക്ഷപ്പെടുകയാണ് ചെയ്യുന്നത്. എന്നാല് പോലീസ് മാത്രം സാക്ഷികളാകുന്ന കേസില് ശക്തമായ വാദമാണ് കോടതയില് നടന്നത്.
കസായി അലിക്കെതിരേ നിരവധി കേസുകള്
കാലിയ റഫീഖും കസായി അലിയും ആയിരുന്നു പ്രധാന അധോലോക സംഘങ്ങളുടെ തലവന്. അതില് കാലിയാ റഫീഖ് നേരത്തെ കൊല്ലപ്പെട്ടിരുന്നു. ഗുണ്ടാനേതാവ് കസായി അലിക്കെതിരെ നിരവധി കേസുകള് നിലവിലുണ്ടെന്ന് പോലീസ് പറയുന്നു. 2015 ല് ഉപ്പളയിലെ വെടിവെപ്പുമായി ബന്ധപ്പെട്ട് അറസ്റ്റിലായി കണ്ണൂര് ജയിലില് റിമാന്ഡില് കഴിയവേ കാപ്പ ചുമത്തിയിരുന്നു. 2015 ഡിസംബര് 30 ന് രാത്രിയാണ് ഉപ്പള കൈക്കമ്പയില് ഗുണ്ടാസംഘങ്ങള് തമ്മില് വെടിവെപ്പുണ്ടായത്. കാലിയയുടെ സംഘവും കാസായി അലിയുടെ സംഘവും തമ്മിലുണ്ടായ വെടിവെപ്പ് ജില്ലയിലാകെ പരിഭ്രാന്തി പടര്ത്തിയ സംഭവമാണ്. അധോലോകത്തെ അനുസ്മരിപ്പിക്കുന്ന രീതിയിലായിരുന്നു.