നടിയെ ആക്രമിച്ച കേസ്: മാപ്പു സാക്ഷിയെ ഭീഷണിപ്പെടുത്തിയ പ്രതി റിമാൻഡിൽ, കസ്റ്റഡിയിൽ വിട്ടുകിട്ടാൻ അന്വേഷണ സംഘം അപേക്ഷ നൽകും

പ്രതിയെ കോടതി 14 ദിവസത്തേക്ക് റിമാൻഡ് ചെയ്തു. തുടർന്ന് ജില്ലാ ആശുപത്രിയിൽ വെച്ച് കൊവിഡ് പരിശോധന നടത്തി. ശേഷം കാഞ്ഞങ്ങാട് സബ് ജയിലിലെ കൊവിഡ് കേന്ദ്രത്തിലേക്ക് മാറ്റി. കേസിലെ കൂടുതൽ വിശദാംശങ്ങൾ ശേഖരിക്കുന്നതിന് പ്രതിയെ കസ്റ്റഡിയിൽ വിട്ടുകിട്ടുന്നതിനായി അന്വേഷണ സംഘം ബുധനാഴ്ച കോടതിയിൽ അപേക്ഷ നൽകും. കസ്റ്റഡിയിൽ വിട്ടുകിട്ടുന്നതോടെ പ്രതി പ്രദീപ് കുമാറിനെ തമിഴ്നാട്ടിലെ തിരുനെൽവേലിയിലെ വിവിധ സ്ഥലങ്ങളിൽ കൊണ്ടുപോയി തെളിവെടുപ്പ് നടത്തും.

പ്രദീപ് കുമാർ സമർപ്പിച്ചിരുന്ന മുൻകൂർ ജാമ്യാപേക്ഷ തള്ളിയതിന് പിന്നാലെയാണ് ചൊവ്വാഴ്ച രാവിലെ ഇയാളെ പോലീസ് അറസ്റ്റു ചെയ്തത്. പത്തനാപുരത്തെ ഗണേഷ് കുമാറിന്റെ എംഎൽഎ ഓഫീസിലെത്തിയായിരുന്നു അന്വേഷണ സംഘം പ്രദീപ് കുമാറിനെ അറസ്റ്റ് ചെയ്തത്. കേസിലെ എട്ടാം പ്രതി ദിലീപിന് അനുകൂലമായി മൊഴി നൽകിയില്ലെങ്കിൽ മാപ്പുസാക്ഷിയെ ഇല്ലാതാക്കുമെന്ന് ഭീഷണിപ്പെടുത്തിയെന്നാണ് കേസ്.

കാസർകോട് സ്വദേശി വിപിൻലാൽ നൽകിയ പരാതിയിൽ പ്രദീപ് കുമാറിന് കൃത്യമായ പങ്കുണ്ടെന്ന് അന്വേഷണ സംഘം കോടതിയെ അറിയിച്ചിരുന്നു. നടിയെ ആക്രമിച്ച കേസിൽ ക്വട്ടേഷൻ തുക ആവശ്യപ്പെട്ട് പൾസർ സുനിക്കായി ജയിലിൽ നിന്ന് കത്തയച്ചത് വിപിൻലാൽ ആയിരുന്നു. കേസിലെ മാപ്പ് സാക്ഷിയായ വിപിൻ ലാലിന്റെ ബന്ധുവിനെ കാണാനായി പ്രദീപ് കുമാർ കാസർകോട്ടെ ജ്വല്ലറിയിൽ എത്തിയതിന്റെ സിസിടിവി ദൃശ്യങ്ങൾ പോലീസിന് ലഭിച്ചിട്ടുണ്ട്. എന്നാൽ വാച്ച് വാങ്ങാൻ മാത്രമാണ് പ്രദീപ് കുമാർ ഇവിടെയെത്തിയതെന്നായിരുന്നു പ്രതിഭാഗം അറിയിച്ചത്.

അതേസമയം അറസ്റ്റിലായ സെക്രട്ടറി പ്രദീപ് കുമാറിനെ പുറത്താക്കിയെന്ന് കെ ബി ഗണേഷ് കുമാർ എംഎൽഎ അറിയിച്ചു. എംഎൽഎയുടെ ഓഫീസിൽ സെക്രട്ടറിയായിരുന്നു പ്രദീപ് കുമാർ. അറസ്റ്റിന് പിന്നാലെയാണ് പേഴ്‌സണൽ സ്റ്റാഫിൽ നിന്നും ഇയാളെ പുറത്താക്കിയതായി ഗണേഷ് കുമാർ അറിയിച്ചത്.