നടൻ മോഹൻലാൽ മരിച്ചെന്ന് വ്യാജ വാര്‍ത്ത; കാസര്‍കോട് സ്വദേശി അറസ്റ്റില്‍!

തിരുവനന്തപുരം: നടൻ മോഹൻലാൽ കൊവിഡ് ബാധിച്ച് മരിച്ചെന്ന വാര്‍ത്ത സോഷ്യൽ മീഡിയയിൽ പ്രചരിപ്പിച്ച യുവാവ് അറസ്റ്റില്‍. കാസര്‍കോട് പാടി സ്വദേശി സമീര്‍ ബി എന്നയാളാണ് അറസ്റ്റിലായത്. തിരുവനന്തപുരം റേഞ്ച് ഡിഐജി കെ സഞ്ജയ്കുമാര്‍ ഐപിഎസിന്റെ നേതൃത്വത്തിലുള്ള സംഘമാണ് അറസ്റ്റ് ചെയ്തത്. കൊവിഡ് വൈറസുമായി ബന്ധപ്പെട്ട് നിരവധി വിഐപികളെയും സെലിബ്രിറ്റികളെയും ബാധിക്കുന്ന തരത്തില്‍ വ്യാജ വാര്‍ത്ത പ്രചരിപ്പിച്ചതിനും, പരിഭ്രാന്തി സൃഷ്ടിക്കുകയും ചെയ്തതിനാണ് പോലിസ് കേസ് രജിസ്റ്റര്‍ ചെയ്തത്.

വ്യാജവാർത്ത സംബന്ധിച്ച് ഡിജിപിയുടെ ഫേസ് ബുക്ക് പേജിലും മുഖ്യമന്ത്രിയുടെ ഫേസ് ബുക്ക് പേജിലും നിരവധി പേർ പരാതി ഉന്നയിച്ചിരുന്നു. ഐപിസി 469, സിഐടി 66, ദുരന്ത നിവാരണ 54 നിയമ പ്രകാരമാണ് ഇയാൾക്കെതിരേ കേസ് രജിസ്റ്റര്‍ ചെയ്തത്. പോലിസ് പരിശോധനക്കിടയില്‍ വ്യാജ വാര്‍ത്തകള്‍ നിര്‍മ്മിക്കാനും, പ്രചരിപ്പിക്കാനും ഉപയോഗിച്ച ഉപകരണങ്ങള്‍ പിടിച്ചെടുത്തു. വ്യാജ വാര്‍ത്ത പ്രചരിപ്പിക്കുന്നവര്‍ക്കെതിരെ കര്‍ശന നടപടി എടുക്കുമെന്നും ഡി ഐജി അറിയിച്ചു.