മഹാരാഷ്ട്രയ്ക്ക് കരുത്തേക്കാന്‍ കേരളത്തിലെ ഡോക്ടര്‍മാരുടെ സംഘം; കാസര്‍കോട് സ്വദേശി ഡോ. മുഹമ്മദ് റിബ് ഹാനും സംഘത്തില്‍

കാസര്‍കോട്: കൊവിഡ് രോഗവ്യാപനം അതിതീവ്രമായ മഹാരാഷ്ട്രയെ രക്ഷിക്കാന്‍ നിയോഗിക്കപ്പെട്ട കേരളത്തില്‍ നിന്നുള്ള പ്രത്യേക മെഡിക്കല്‍ സംഘത്തില്‍ കാസര്‍കോട് സ്വദേശിയും. മേല്‍പറമ്പിലെ യുവ ഡോക്ടറുമായ മുഹമ്മദ് റിബ്ഹാനാണ് സംഘത്തില്‍ ഉള്ളത്. ഇദ്ദേഹമടക്കമുള്ള സംഘം തിങ്കളാഴ്ച മുംബൈയിലേക്ക് തിരിക്കും. ഇന്ത്യയിലെ കൊവിഡിന്റെ ഏറ്റവും വലിയ ഹോട്ട്‌സ്‌പോട്ട് എന്നറിയപ്പെടുന്ന മുംബൈയില്‍ സേവനമനുഷ്ഠിക്കുന്ന സംഘത്തിലാണ് റിബ്ഹാനുള്ളത്.

Also Read: യുവതിയുടെ കഴുത്തിൽ കത്തി വെച്ച് ഭീഷണിപ്പെടുത്തി ആഭരണം തട്ടാൻ ശ്രമം; അസം സ്വദേശി പിടിയിൽ

കേരളത്തില്‍ 50 ഡോക്ടര്‍മാരുടെയും 100 നേഴ്‌സുമാരുടെയും സംഘത്തെ അയക്കണമെന്ന് മഹാരാഷ്ട്ര സര്‍ക്കാര്‍ നേരത്തെ ആരോഗ്യമന്ത്രി കെ കെ ശൈലജയോട് അഭ്യര്‍ഥിച്ചിരുന്നു. ഇതിന്‍റെ അടിസ്ഥാനത്തിലാണ് വിദഗ്ധസംഘം മുംബൈയിലേക്ക് പോകുന്നത്. മുംബൈ നഗരത്തിലെ പ്രതിരോധ പ്രവര്‍ത്തനങ്ങള്‍ക്ക് പിന്തുണ നല്‍കാനാണ് തിരുവനന്തപുരം മെഡിക്കല്‍ കോളേജ് ഡെപ്യൂട്ടി സൂപ്രണ്ട് എസ് എസ് സന്തോഷ്‌കുമാറിന്റെ നേതൃത്വത്തിലുള്ള സംഘം തിരിച്ചത്.

മുംബൈയിലേക്ക് പോകാന്‍ താല്പര്യം കാട്ടി ഡോ. റിബ്ഹാന്‍ നേരത്തെ അപേക്ഷ നല്‍കിയിരുന്നു. ഇതിനുപിന്നാലെ കഴിഞ്ഞ ദിവസം ആരോഗ്യമന്ത്രിയുടെ ഓഫിസില്‍ നിന്നും റിബ്ഹാനെ തേടി ഫോണ്‍കോളുമെത്തുകയായിരുന്നു. ദുരിതം അനുഭവിക്കുന്നവരെ ജീവിതത്തിലേക്ക് തിരിച്ചുകൊണ്ടുവരാന്‍ കഴിയുന്നതിന്റെ ആഹ്‌ളാദത്തിലാണ് റിബ്ഹാന്‍. സന്നദ്ധ സേവനത്തിന് തയ്യാറായ ഡോക്ടര്‍മാരും നേഴ്‌സുമാരുമാണ് സംഘത്തിലുള്ളത്.

Also Read: 'ചില പാർട്ടിക്കാർ കുറച്ചുകാലമായി ബുദ്ധിമുട്ടിക്കുന്നു... സഹിക്കാൻ വയ്യ'; ആരോഗ്യ പ്രവർത്തകയുടെ ആത്മഹത്യാക്കുറിപ്പ് പുറത്ത്!!

മേല്‍പറമ്പ് അപ്‌സര സ്‌കൂളില്‍ പഠനം പൂര്‍ത്തിയാക്കിയശേഷം മംഗളൂരു അലോഷ്യസ് പ്രീ യൂണിവേഴ്‌സിറ്റി കോളജില്‍ നിന്നാണ് പ്ലസ്ടു കഴിഞ്ഞത്. മെഡിക്കല്‍ പഠനം യുക്രൈനിലെ പ്രശസ്തമായ ഇവനോ ഫ്രാങ്ക്‌സി സര്‍വകലാശാലയില്‍ നിന്നാണ്. എം ബി ബി എസ് പൂര്‍ത്തിയാക്കിയശേഷം അമേരിക്കയില്‍ ഉപരി പഠനത്തിനുള്ള തയ്യാറെടുപ്പിലായിരുന്നു. ഇതിനിടയില്‍ കേരള സര്‍വീസില്‍ മെഡിക്കല്‍ ഓഫിസര്‍ തസ്തികയിലേക്ക് അപേക്ഷിച്ചിട്ടുണ്ട്. ഈ സമയത്താണ് മുംബൈയിലേക്കുള്ള പ്രത്യേക സംഘത്തില്‍ ഉള്‍പ്പെടുന്നത്. ഹൈദരാബാദിലെ പരിശീലനത്തിനുശേഷം നാട്ടില്‍ തിരിച്ചെത്തിയ ഡോ. മുഹമ്മദ് റിബ്ഹാന്‍ കൊറോണക്കാലത്ത് നാട്ടില്‍ തന്നെയായിരുന്നു. ഖത്തറില്‍ ബിസിനസുകാരനായ അബ്ദുല്ല ഇബ്രാഹിം (മദര്‍ ഇന്ത്യ) ടി കെ ബീവി ദമ്പതികളുടെ മകനാണ്. എന്‍ജിനീയറായ റിസ്‌വാന്‍, ഡോ. റംഷ, റസ്മിയ എന്നിവരാണ് സഹോദരങ്ങള്‍.