34.71 കോടി രൂപയ്ക്കുള്ള പ്രവൃത്തിക്ക് കിഫ്ബി അംഗീകാരം
റെയില്വേ ലെവല് ക്രോസ് നമ്പര് 273 ലാണ് മേല്പ്പാലം നിര്മിക്കുക. ഇതിനാവശ്യമായ 34.71 കോടി രൂപയ്ക്കുള്ള പ്രവൃത്തിക്ക് കിഫ്ബി അംഗീകാരം ലഭിച്ചു. ഭൂമി ഏറ്റെടുക്കല് ദ്രുതഗതിയില് പൂര്ത്തിയാകുന്നു. 144 മീറ്റര് നീളമാണ് പാലത്തിനുള്ളത്. 148 സെന്റ് ഭൂമിയാണ് ഏറ്റെടുക്കേണ്ടത്. ഒമ്പതു കെട്ടിടം ഏറ്റെടുത്ത് പൊളിച്ചു നീക്കേണ്ടി വരും. 13.40 കോടി രൂപ ഇതിന് ഉള്പ്പെടുത്തി. റെയില്വേയുടെ ഭാഗമായുള്ള സ്പാന് നിര്മിക്കാന് 5 കോടി 40 ലക്ഷം രൂപയും മറ്റുള്ളവ നിര്മിക്കാന് 14 കോടി 45 ലക്ഷം രൂപയുമാണ് ചെലവഴിക്കുക. 201819 ല് കിഫ്ബി പദ്ധതിയില് ഉള്പ്പെടുത്തി 35.97 കോടി രൂപ യുടെ എസ്റ്റിമേറ്റാണ് സമര്പ്പിച്ചത്. ഇതില് 34.71 കോടിയുടെ അംഗീകാരം ലഭിച്ചു.
സമീപ പ്രദേശത്തെ റോഡ് പണി പൂര്ത്തിയായി
ടിബി സ്മൃതി മണ്ഡപം പുതിയ കോട്ട മുതല് ശവപ്പറമ്പ് കൊട്രച്ചാല് റോഡ് വരെ മെക്കാഡം ടാര് ചെയ്ത് നവീകരിക്കുന്ന പ്രവൃത്തി പൂര്ത്തിയായി. ഇതോടെ തീരദേശ മേഖലയില് ഗതാഗത തടസമൊഴിവാകും. സ്ഥലം എംഎല്എയായ മന്ത്രി ഇ ചന്ദ്രശേഖരനാണ് വിഷയം സര്ക്കാരിന്റെ ശ്രദ്ധയില് കൊണ്ടുവന്നത്. തീര മേഖലയായ കുശാല്നഗര്, കല്ലൂരാവി, ഹോസദുര്ഗ് കടപ്പുറം, പുഞ്ചാവി കടപ്പുറം, ഒഴിഞ്ഞവളപ്പ് തുടങ്ങിയ തീരദേശ വാര്ഡുകള്ക്ക് മേല്പ്പാലം ഗുണകരമാകും. നീലേശ്വരം നഗരസഭയിലെ അഴിത്തല, തൈക്കടപ്പുറം, കണിച്ചിറ, മരക്കാപ്പ് കടപ്പുറം, കടിഞ്ഞിമൂല പ്രദേശങ്ങളിലേക്ക് എളുപ്പത്തില് എത്താനും ഉപകരിക്കും.
പദ്ധതിക്ക് ഏഴുവര്ഷത്തെ പഴക്കം
2018 സപ്തംബര് 25നാണ് മേല്പാലത്തിനായുള്ള സര്വേ ആരംഭിച്ചത്. 2013 ല് ആണ് ഈ ആവശ്യം അധികൃതരുടെ മുന്നിലെത്തിയത്. 2014 ല് കേന്ദ്ര സര്ക്കാര് പാലത്തിനായി പത്തുലക്ഷം അനുവദിച്ചിരുന്നു. കര്മ സമിതിയുടെയും സര്ക്കാരിന്റെയും നിരന്തര സമ്മര്ദ്ദത്തെ തുടര്ന്ന് പിന്നീട് 38 കോടി രൂപ കേന്ദ്രം അനുവദിച്ചിരുന്നു. എന്നാല് കേന്ദ്ര സംസ്ഥാന സര്ക്കാറുകള് തുല്യമായി വിഹിതം വഹിക്കണമെന്ന വ്യവസ്ഥ വന്നതോടെ പദ്ധതിയുടെ ഡി.പി.ആര് പ്രവര്ത്തനങ്ങള്ക്ക് കാലതാമസം വന്നു.