2 തവണ വലയെറിഞ്ഞു കിട്ടിയ മീൻ കരയിൽ വെച്ചു, വീണ്ടും വലയിടാൻ പോയപ്പോൾ ഷിബു പെട്ടത് മരണക്കയത്തിൽ

ശനിയാഴ്ച രാത്രി 11 മണിയോടെയാണ് ഷിബുവും സുഹൃത്ത് നസീറും വഞ്ചിയിൽ കവ്വായി കായലിൽ മീൻ പിടിക്കാൻ പോയത്. രണ്ടുതവണ വലയെറിഞ്ഞു കിട്ടിയ മീൻ കരക്കു വെച്ച ശേഷമാണ് മൂന്നാമതും വലയെറിയാൻ പോയത്. പന്ത്രണ്ടിൽ ബോട്ട് ജെട്ടിക്ക് സമീപം വലയെറിഞ്ഞു കൊണ്ടിരിക്കെ പെട്ടെന്ന് വഞ്ചി ചെരിയുകയും പിന്നീട് മറിയുകയുമായിരുന്നു. വഞ്ചി ഉലയുന്നതിനിടെ കാൽതെന്നിയാണ് ഷിബു കായലിൽ വീണത്. വഞ്ചി വെള്ളംകയറി മുങ്ങിയതോടെ ഒപ്പമുണ്ടായിരുന്ന സുഹൃത്ത് നസീർ നീന്തി രക്ഷപ്പെട്ടു. കായലിൽ വീണ ഷിബു രക്ഷപ്പെടാൻ ശ്രമിച്ചതായി നസീർ പറയുന്നു.

ശക്തമായ അടിയൊഴുക്ക് ഉണ്ടായതിനാൽ കരപറ്റാനായില്ലെന്നാണ് കരുതുന്നത്. നീന്തി കരക്ക് എത്തിയ നസീറാണ് നാട്ടുകാരെയും വീട്ടുകാരെയും സംഭവം അറിയിക്കുന്നത്. രാത്രി തന്നെ മത്സ്യത്തൊഴിലാളികളും നാട്ടുകാരും രക്ഷാപ്രവർത്തനം തുടങ്ങിയെങ്കിലും ഷിബുവിനെ കണ്ടെത്താനായില്ല. അപകടത്തിൽപ്പെട്ട വഞ്ചി രാത്രിതന്നെ നാട്ടുകാർ അപകടസ്ഥലത്ത് വെച്ചു കണ്ടെത്തിയിരുന്നു. ഞായറാഴ്ച രാവിലെ മുതൽ മുങ്ങൽ വിദഗ്ധരും കോസ്റ്റ് ഗാർഡുകളും അഗ്നിരക്ഷാ യൂണിറ്റുകളും പോലീസും നാട്ടുകാരും ചേർന്ന് വിവിധ ഭാഗങ്ങളിൽ തെരച്ചിൽ നടത്തിയിരുന്നു. തിങ്കളാഴ്ച വീണ്ടും തെരച്ചിൽ നടത്തുന്നതിനിടെയാണ് മൃതദേഹം കണ്ടെത്തിയത്.

കണ്ണൂർ പരിയാരം മെഡിക്കൽ കോളേജിൽ പോസ്റ്റ്മോർട്ടത്തിനുശേഷം വൈകിട്ട് നാല് മണിക്കാണ് മൃതദേഹം വീട്ടിലെത്തിച്ചത്. ബന്ധുക്കളും സുഹൃത്തുക്കളും നാട്ടുകാരും അടക്കം വൻജനാവലിയാണ് മൃതദേഹം കാണാൻ ഷിബുവിന്റെ വീട്ടിലെത്തിയത്. പിന്നീട് ശ്മശാനത്തിൽ സംസ്കരിച്ചു. അവിവാഹിതനായ ഷിബു നാട്ടുകാർക്ക് ഏറെ പ്രിയങ്കരനായിരുന്നു. എം വി തമ്പായി ആണ് മാതാവ്. വിപിൻ സഹോദരനാണ്.