കാസര്കോട്: പിഴ' അടപ്പിക്കുന്ന മോട്ടോര് വാഹന വകുപ്പ് 'കുഴി' അടപ്പിക്കാനും രംഗത്തിറങ്ങിയതോടെ റോഡിലെ അപകട കുരുക്ക് നീങ്ങി. ചന്ദ്രഗിരി വഴി കാഞ്ഞങ്ങാട് വരെയുള്ള തീരദേശറോഡില് രൂപപ്പെട്ട കുഴികള് അടപ്പിക്കാന് മുന്കൈ എടുത്തത് മോട്ടോര് വാഹന വകുപ്പ് എന്ഫോഴ്സ്മെന്റ് വിഭാഗം. ചന്ദ്രഗിരി പ്രസ് ക്ലബ് ജംഗഷനു സമിപത്തും, ഉദുമ ഓട്ടോ റിക്ഷ സ്റ്റാന്ഡിനടുത്തും കുഴികള് രൂപപ്പെട്ടതിനാല് വാഹനങ്ങള് പെട്ടെന്ന് വേഗത കുറക്കുന്നതും, ദിശ മാറ്റുന്നതും അപകടകരമാകുമെന്ന സാധ്യത കണക്കിലെടുത്താണ് അധികൃതര് തന്നെ രംഗത്തിറങ്ങിയത്.
കുഴി കാരണം നിരവധി അപകടങ്ങള്
വലിയ കുഴികള് കാരണം തീരദേശപാതയില് കഴിഞ്ഞ ഒരുവര്ഷമായി വാഹനങ്ങള് അപകടത്തില് പെടുകയാണ്. ഇരുചക്ര വാഹനങ്ങളാണ് ഏറ്റവും കൂടുതല് അപകടത്തില്പെട്ടത്. കാലവര്ഷം കനത്തതോടെയാണ് വലിയ കുഴികള് രൂപപ്പെട്ടത്. കഴിഞ്ഞ വര്ഷവും കുഴികള് രൂപപ്പെട്ട് അറ്റകുറ്റപ്പണി നടത്തിയ അതേസ്ഥലത്താണ് വീണ്ടും കുഴികള് രൂപപ്പെട്ടത്. രാത്രികാലങ്ങളില് കുഴി ശ്രദ്ധയില്പെടാതെ വാഹനങ്ങള് അപകടത്തില്പെടുന്നത് പതിവായിരുന്നു. എത്രയും പെട്ടെന്ന് റോഡ് നന്നാക്കണമെന്നാണ് നാട്ടുകാര് ആവശ്യപ്പെട്ടാന് തുടങ്ങിയിട്ട് മാസങ്ങളേറെയായിരുന്നു.
കെഎസ്ടിപി അധികൃതര് തന്നെ കുഴിയടച്ചു
കാസര്കോട് എന്ഫോഴ്സ്മെന്റ് ആര്ടിഒ ടിഎം ജഴ്സന്റെ നിര്ദേശ പ്രകാരം കെഎസ്ടിപി അധികൃതരുമായി ബന്ധപ്പെട്ടാണ് അടിയന്തിരമായി കുഴികള് അടപ്പിക്കാന് നടപടി സ്വീകരിച്ചത്. ശനിയാഴ്ച വൈകീട്ടോടെ തുടങ്ങിയ അറ്റകുറ്റപണികള് തിങ്കളാഴ്ചയോടെ പൂര്ത്തിയായി. ഇത് മൂലമുണ്ടായ വാഹനത്തിരക്ക് കാസര്കോട് ടൗണ് ട്രാഫിക് പോലീസിന്റെ സഹായത്തോടെ മോട്ടോര് വെഹിക്കിള് ഇന്സ്പെക്ടര് ബിനീഷ് കുമാര്, അസിസ്റ്റന്റ് മോട്ടോര് വെഹിക്കിള് ഇന്സ്പെക്ടര് ജയരാജ് തിലക്, സുധീഷ് എന്നിവര് നിയന്ത്രിച്ചു.