സഞ്ചാരികള്ക്ക് വിരുന്നൊരുക്കി ബേക്കല്‍ കോട്ട, സ്വാഗത കമാനം നിങ്ങളെ മാടി വിളിക്കും... ഒരു കോടി രുപയുടെ വികസനം
ഒരു കോടി രൂപയുടെ പദ്ധതി
ജില്ലാകളക്ടര്‍ ചെയര്‍മാനായ ജില്ലാടൂറിസം പ്രമോഷന്‍ കൗണ്‍സില്‍ സെക്രട്ടറി ബിജുവിന്‍റെയും മാനേജര്‍ സുനില്‍കുമാറിന്‍റെയും ശ്രമഫലമായാണ് പദ്ധതി പൂര്‍ത്തിയാക്കാന്‍ കഴിഞ്ഞത്. കോണ്‍ക്രീറ്റില്‍ പണിത് ചെങ്കല്‍ ടൈലുകള്‍ ഒട്ടിച്ച കമാനം, ജംങ്ഷന്‍ മുതല്‍ സ്വാഗത കമാനം വരെ ബേക്കല്‍ കോട്ടയുടെ പേരെഴുതിയുള്ള ഡിവൈഡര്‍, ഓട്ടോസ്റ്റാന്‍റ് സൗന്ദര്യവല്‍ക്കരണം, ടോയ്‌ലറ്റ് തുടങ്ങിയവയാണ് പദ്ധതിയിലുണ്ടായിരുന്നവ. 99, 94, 176 (തൊണ്ണൂറ്റി ഒന്‍പത് ലക്ഷത്തി തൊണ്ണൂറ്റി നാലായിരത്തി നൂറ്റി എഴുപത്തിയാറ്) രൂപയുടെ ഈ പദ്ധതിക്ക് സംസ്ഥാന ടൂറിസം വകുപ്പ് അംഗീകാരം നല്‍കുകയായിരുന്നു.
400 വര്‍ഷം പഴക്കം
സാങ്കേതികാനുമതി ലഭിച്ചയുടന്‍ ഒട്ടുംവൈകാതെ നിര്‍മ്മാണ പ്രവര്‍ത്തി ആരംഭിച്ചു. ഇതുകാരണം സ്വാഗത കമാനം, കോമ്പൗണ്ട് വാള്‍, ഇന്‍റര്‍ലോക്ക് പതിച്ച നടപ്പാത, കൈവരികള്‍, ട്രാഫിക് സര്‍ക്കിള്‍ എന്നിവ സമയബന്ധിതമായി പൂര്‍ത്തിയാക്കാന്‍ കഴിഞ്ഞു. നിര്‍മ്മാണ ചുമതല ജില്ലാ നിര്‍മ്മിതി കേന്ദ്രത്തിനായിരുന്നു. വടക്കേ മലബാറില്‍ ഏറ്റവും കൂടുതല്‍ വിനോദ സഞ്ചാരികള്‍ എത്തുന്ന വിനോദ സഞ്ചാര കേന്ദ്രങ്ങളില്‍ ഒന്നാണ് ബേക്കല്‍. 400 വര്‍ഷത്തോളം പഴക്കമുള്ള കേരളത്തിലെ ഏറ്റവും വലിയ സംരക്ഷിത സ്മാരകമായ ബേക്കല്‍ കോട്ടയും, കോട്ടയോട് ചേര്‍ന്നുള്ള ബീച്ചും സഞ്ചാരികളെ ഇവിടേക്ക് ആകര്‍ഷിക്കുന്ന പ്രധാന ഘടകങ്ങളാണ്.
കേന്ദ്ര സര്‍ക്കാര്‍ തെരഞ്ഞെടുത്ത ഏക ടൂറിസം മേഖല
കേന്ദ്ര സര്‍ക്കാര്‍ തിരഞ്ഞെടുത്ത കേരളത്തിലെ ഏക പ്രത്യേക ടൂറിസം മേഖലയാണ് ബേക്കല്‍. ബേക്കലിന്‍റെ സ്വാഗത കമാനവും വീഡിയോ കോണ്‍ഫറന്‍സിലൂടെ മുഖ്യമന്ത്രി പിണറായി വിജയന്‍ ഉദ്ഘാടനം നിര്‍വ്വഹിച്ചു. പ്രധാന ടൂറിസം പദ്ധതിയായ പൊന്‍മുടി മുതല്‍ കാസര്‍കോട്ടെ ബേക്കല്‍ കോട്ടയുടെ കമാനവും പാതയോര സൗന്ദര്യ വല്‍ക്കരണ പരിപാടികളും വരെയും സംസ്ഥാനത്തെ കായലുകളും കടല്‍ തീരങ്ങളും ഹില്‍ സ്‌റ്റേഷനുകളും കോട്ടയും ഡാമുകളും അടങ്ങിയ വിവിധ ജില്ലകളിലെ പ്രധാന പദ്ധതികളാണ് മുഖ്യമന്ത്രി ഉദ്ഘാടനം ചെയ്തത്. ഉദ്ഘാടന വേദിയോട് ചേര്‍ന്ന് സജ്ജീകരിച്ച പ്രവൃത്തി ഫലകം മുഖ്യമന്ത്രിക്ക് വേണ്ടി കെ കുഞ്ഞിരാമന്‍ എംഎല്‍എ അനാച്ഛാദനം ചെയ്തു.