മംഗളൂരു ആശുപത്രിയിലേക്കുള്ള യാത്ര തടഞ്ഞു; കാസര്‍കോട് ആസ്ത്മ രോഗി മരിച്ചു!

കാസര്‍കോട്: മംഗളൂരു ആശുപത്രിയിലേക്ക് ചികിത്സയ്ക്ക് പോകാന്‍ കഴിയാത്തതിനെ തുടര്‍ന്ന് ആസ്ത്മ രോഗി ശ്വാസം മുട്ടി മരിച്ചു. മഞ്ചേശ്വരം തുമിനാട് സ്വദേശി അബ്ദുല്‍ ഹമീദാണ് ചികിത്സ കിട്ടാതെ മരിച്ചത്. മംഗളൂരു ആശുപത്രിയിലേക്ക് ചികത്സയ്ക്ക് പോകാന്‍ പറ്റാത്തതിനെ തുടര്‍ന്നാണ് മരണം സംഭവിച്ചത്. തലപ്പാടിയില്‍ വച്ച് കര്‍ണാടക പോലീസ് തടഞ്ഞതിനെ തുടര്‍ന്ന് തിരിച്ചു വന്ന ആളാണ് മരിച്ചത്.

Also Read: ബ്രിട്ടീഷ് പ്രധാനമന്ത്രി ബോറിസ് ജോണ്‍സണ് കൊവിഡ് 19 സ്ഥിരീകരിച്ചു

വെള്ളിയാഴ്ച രാവിലെ മംഗളൂരുവിലേക്ക് പോകാന്‍ കഴിയാത്തതിനാല്‍ ബീഹാര്‍ പാറ്റ്‌ന സ്വദേശിനിയായ 25 കാരി അതിര്‍ത്തിയില്‍ ആംബുലന്‍സില്‍ പ്രസവിക്കേണ്ടി വന്നിരുന്നു. വൃക്കരോഗികളടക്കം നിരവധി പേരാണ് മെച്ചപ്പെട്ട ചികിത്സ കിട്ടാതെ വലയുന്നത്. കൊവിഡ് 19 രോഗവ്യാപനം തടയുന്നതിന്‍റെ ഭാഗമായാണ് കര്‍ണാടക അതിര്‍ത്തി മുഴുവന്‍ അടച്ചത്. തലപ്പാടിയില്‍ അത്യാസന്ന നിലയിലായ രോഗികളെ പോലും കടത്തിവിടുന്നില്ല. നൂറുകണക്കിന് പേരാണ് മംഗളൂരുവില്‍ ചികില്‍സയ്ക്കായി സംസ്ഥാനത്തു നിന്നും പോകുന്നത്. അതേസമയം കേന്ദ്ര നിര്‍ദേശപ്രകാരമാണ് അതിര്‍ത്തി അടച്ചതെന്നാണ് കര്‍ണാടകയുടെ വിശദീകരണം.