കാസര്കോട്: ലോക്ഡൗണില് ഓണ്ലൈന് പഠനവുമായി ബന്ധപ്പെട്ട് മിക്ക കുട്ടികളും ഇന്ന് മൊബൈല് ഫോണിന് മുന്നിലാണ്. വിരസതമാറ്റാന് പല കുട്ടികളും മൊബൈല് ഫോണിലെ ഗെയിമുകളെയാണ് ആശ്രയിക്കുന്നത്. ഇത് ഗുരുതരമായ പ്രത്യാഘാതമുണ്ടാക്കുമെന്ന് തിരിച്ചറിഞ്ഞ പിതാവ് കുട്ടിക്ക് വേണ്ടി ചെയ്തത് വീട്ടില് ഒരു പക്ഷി സങ്കേതം. കാസര്കോട് എരവില് സ്വദേശിയും പ്രവാസിയുമായ മുഹമ്മദ് റാഫിയാണ് വീടിനുള്ളില് നിന്ന് പുറത്തിറങ്ങാനാകാതെ വിഷമിക്കുന്ന സ്വന്തം വീട്ടിലെ കുട്ടികള്ക്ക് മാനസീകോല്ലാസം ലഭിക്കാന് പക്ഷി സങ്കേതം ഉണ്ടാക്കിയത്.
ലൗ ബേര്ഡ്സ് മുതല് അമ്പതിനായിരം രൂപ വിലവരുന്ന സണ്കൂണൂര് പക്ഷികളുടെ ഇനങ്ങള് വരെ ഇവിടെ കാണാം. കോക്ടൈല്, ജാവാ ബേഡ്, ആഫ്രിക്കന് ബേഡ്, റംബ് ബേഡ് തുടങ്ങിയ 100 ഓളം പക്ഷികള് ഈ സങ്കേതത്തിലുണ്ട്. വിവിധയിനം തത്തകള്, പ്രാവുകള് തുടങ്ങി അലങ്കാര മത്സ്യങ്ങള് വരെ ഇവിടെയുണ്ട്. പക്ഷി സങ്കേതത്തില് വിദേശ ഇനത്തില് പെട്ട പക്ഷികളും എത്തിയതോടെ കുട്ടികളും ആവേശത്തിലാണ്.
മൊബൈല് ഗെയിമിനോട് വിട പറഞ്ഞ കുട്ടികള് ഇപ്പോള് അലങ്കാര പക്ഷികള്ക്കൊപ്പമാണ് സമയം ചെലവിടുന്നത്. കുട്ടികള് വിളിച്ചാല് കൈയ്യിലേക്ക് പക്ഷികള് ഓടിയെത്തും. രാവിലെ പച്ചക്കറികളാണ് ഇവകളുടെ ഭക്ഷണം. പപ്പായ, മാതളം, തണ്ണിമത്തന് തുടങ്ങിയവയെല്ലാമാണ് ഭക്ഷണം. നിരവധി കുട്ടികളാണ് ഈ വാര്ത്തയറിഞ്ഞ് റാഫിയുടെ പക്ഷി സങ്കേതം കാണാന് ഇപ്പോഴെത്തുന്നത്. ഭാര്യ ഹാജിതയും മകന് റയാനും ഓമനപക്ഷികളെ പരിചരിക്കാന് കൂടെയുണ്ടാകും.