കാസര്കോട്: കൊവിഡ് കാലത്ത് മിക്ക ബാങ്കുകളിലും ഇന്ന് തിരക്കോട് തിരക്കാണ്. നിരയായി നിന്ന് തളര്ന്ന് എങ്ങനയെങ്കിലും ഇടപാട് നടത്തുന്നവരെയാണ് ബാങ്കിനുമുന്നില് കാണാനാകുക. എന്നാല് ഇതില് നിന്നും ഏറെ വ്യത്യമാവുകയാണ് കാസര്കോട് ചെറുവത്തൂരിലെ തിമിരി സര്വീസ് സഹകരണ ബാങ്കിന്റെ സേവനം. ഉപഭോക്താക്കള്ക്ക് 24 മണിക്കൂര് സേവനമാണ് ബാങ്കു നല്കുന്നത്.
രാത്രി കാല സേവനത്തിനായി രണ്ട് ജീവനക്കാരെയും ഒരു സെക്യൂരിറ്റി ജീവനക്കാരനെയുമാണ് നിയോഗിച്ചിരിക്കുന്നത്. ക്ലാസ് വണ് സൂപ്പര് ഗ്രേഡ് റാങ്കിലുള്ള ബാങ്കിന് 155 കോടി രൂപയാണ് പ്രവര്ത്തനമൂലധനമുള്ളത്. 150 കോടി രൂപയുള്ള ഡെപ്പോസിറ്റും ബാങ്കിലുണ്ട്. മുപ്പതിനായിരത്തോളം അംഗങ്ങളുള്ള ബാങ്കിന് അഞ്ചുശാഖകള് വിവിധ സ്ഥലങ്ങളില് പ്രവര്ത്തിച്ചുവരികയാണ്. ആധുനീക സൗകര്യങ്ങളോടെയുള്ള പോളിക്ലിനിക്, മെഡിക്കല് ലാബ്, മെഡിക്കല് സ്റ്റോറുകള്, ആംബുലന്സ്, ഫ്രീസര് സേവനം, ഓഡിറ്റോറിയം തുടങ്ങി ഇരുപതോളം സേവനങ്ങളും ജനങ്ങള്ക്കായി നല്കുന്നുണ്ട്. 1952ല് ഐക്യനാണയ സംഘമായി കേവലം 25 അംഗങ്ങളോടെ പ്രവര്ത്തനം തുടങ്ങിയ ബാങ്ക് ഇന്ന് സംസ്ഥാനത്തുതന്നെ അറിയപ്പെടുന്ന സ്ഥാപനമാണ്.
കമ്മ്യൂണിസ്റ്റ്, കര്ഷക വിപ്ലവകാരി ടികെസി എന്ന ടികെ. ചന്തനായിരുന്നു ആദ്യത്തെ ഓണററി സെക്രട്ടറി. പ്രവര്ത്തനമികവിന് തിമിരി സര്വീസ് സഹകരണ ബാങ്കിന് സംസ്ഥാന സഹകരണ വകുപ്പിന്റെ അംഗീകാരം കഴിഞ്ഞ വര്ഷം ലഭിച്ചിരുന്നു.കൊവിഡ് മഹാമാരിയെ ചെറുക്കാനുള്ള പ്രവര്ത്തനത്തിലും ശക്തമായ ഇടപെടലുണ്ടായി. കെയര് അറ്റ് ഹോം പദ്ധതിയിലൂടെ ജീവകാരുണ്യ പ്രവര്ത്തനങ്ങളിലും ബാങ്ക് കൈകോര്ത്തിരുന്നു. ബാങ്കിന്റെ വിശാലമായ വളപ്പില് പ്രത്യേകം തയ്യാറാക്കിയ ഏഴ് ശുദ്ധജല ടാങ്കുകളില് മത്സ്യകൃഷിയും നടത്തുന്നുണ്ട്.