കാസര്കോട്: കൊവിഡ് ലോക്ക് ഡൗണില് നിര്ത്തലാക്കിയ ട്രെയിനുകളില് പലതും ഓടിത്തുടങ്ങി. എന്നാല് കാസര്കോട് ജില്ലയില് മാത്രം സര്വീസ് നടത്തുന്ന ചെറുവത്തൂര് പാസഞ്ചര് ഓടാന് തുടങ്ങിയിട്ടില്ല. സാധാരണക്കാരുടെ ആശ്വാസ ട്രെയിനായിരുന്നു ചെറുവത്തൂര് മംഗളൂരു പാസഞ്ചര്. രാവിലെ 6.30ന് മംഗളൂരുവിലേക്ക് പുറപ്പെട്ട് വൈകീട്ട് 6.30ന് തിരിച്ചെത്തുന്ന വിധമായിരുന്നു സര്വീസ്. വിദഗ്ധ ചികിത്സയ്ക്കായി മംഗളൂരുവിലെ ആശുപത്രിയിലേക്ക് പോകുന്ന രോഗികള്, വിദ്യാര്ഥികള്, പച്ചക്കറി വ്യാപാരികള്, ചെറുവരുമാനക്കാരായ പാര്ടൈം ജീവനക്കാര് ഉള്പ്പെടെയുള്ളവരുടെ ആശ്രയവണ്ടിയായിരുന്നു.
എന്നാല്, നിലവില് ഓടിത്തുടങ്ങിയ ട്രെയിനുകളില് കയറിയാല് കൃത്യസമയത്തെത്താനുമാകില്ല. അതേസമയം ഭീമമായ തുകയും ചെലവാകും. സാധരണക്കാര് ആശ്രയിക്കുന്ന ചെറുവത്തൂര് മംഗളൂരു പാസഞ്ചര് ഉടന് സര്വീസ് തുടങ്ങണമെന്നാണ് പച്ചക്കറി വ്യാപാരിയായ മണി പറയുന്നത്.
കൊവിഡിന് മുന്പ് വര്ഷം അഞ്ചുകോടിയോളം വരുമാനം കിട്ടിക്കൊണ്ടിരുന്ന സ്റ്റേഷനാണ് ചെറുവത്തൂര്. പരശുറാം എക്സ്പ്രസിന് സ്റ്റോപ്പ് അനുവദിക്കണമെന്നത് യാത്രക്കാരുടെ പതിറ്റാണ്ടുകളുടെ ആവശ്യമായിരുന്നു. ചെറുവത്തൂരില് നിര്ത്തിക്കൊണ്ടിരുന്ന വെസ്റ്റ് കോസ്റ്റ് എക്സ്പ്രസിന്റെ സ്റ്റോപ്പും നിലവില് ഇല്ലാതായി. കല്ക്കരി വണ്ടികള് ഓടിയിരുന്ന കാലത്ത് വെള്ളം കൊടുത്ത സ്റ്റേഷനാണ് ചെറുവത്തൂര്. അന്ന് ചെറുവത്തൂരില് നിര്ത്താത്ത വണ്ടികളൊന്നുമുണ്ടായിരുന്നില്ല. ഇന്ന് ചെറുവത്തൂരിലെ സബ്സ്റ്റേഷനില്നിന്നാണ് ട്രെയിനുകള്ക്ക് ഓടാനുള്ള വൈദ്യുതി വിതരണം ചെയ്യുന്നത്. എന്നാല്, ആ പരിഗണന പോലും ചെറുവത്തൂരിനോട് റെയില്വേ അധികൃതര്ക്കില്ലന്നാണ് യാത്രക്കാരുടെ പരിഭവം.