കെടി ജലീലിന്‍റെ രാജി; കാസര്‍കോട് യുവമോര്‍ച്ചയുടെ മാര്‍ച്ചില്‍ സംഘര്‍ഷം, പോലിസ് ജലപീരങ്കി പ്രയോഗിച്ചു

കാസര്‍കോട്: മന്ത്രി കെ.ടി ജലീലിന്‍റെയും എംഎല്‍എ എംസി ഖമറുദ്ദീനിന്‍റെയും രാജി ആവശ്യപ്പെട്ട് കളക്ടറേറ്റിലേക്ക് യുവമോര്‍ച്ച നടത്തിയ മാര്‍ച്ചില്‍ സംഘര്‍ഷം. പ്രവര്‍ത്തകയ്ക്ക് പരിക്ക്. മാര്‍ച്ചിനെത്തിയ പ്രവര്‍ത്തകര്‍ക്കതിരെ പോലിസ് ജലപീരങ്കി പ്രയോഗിച്ചു. യുവമോര്‍ച്ച ജില്ലാ അധ്യക്ഷന്‍ ധനഞ്ജയ മധുരിന്‍റെ നേതൃത്വത്തില്‍ നടന്ന പ്രതിഷേധ മാര്‍ച്ചിലാണ് സംഘര്‍ഷമുണ്ടായത്. കളക്ടറേറ്റ് ഗേറ്റ് അടച്ച് ബാരിക്കേഡ് വച്ച് മാര്‍ച്ച് തടഞ്ഞിരുന്നു. ഗേറ്റ് ചാടിക്കടന്നും പ്രവര്‍ത്തകര്‍ അക്രമാസാക്തരായിരുന്നു.

Also Read: 43 ദിവസം വെന്‍റിലേറ്ററില്‍... 2 പ്ലാസ്മ തെറാപ്പി, വീണ്ടും ആരോഗ്യ വകുപ്പിന് പൊന്‍തൂവല്‍, കൊവിഡ് ബാധിതനായ ടൈറ്റസ് 75 ദിവസത്തിന് ശേഷം ജീവിതത്തിലേക്ക്

എന്നാല്‍ പ്രവര്‍ത്തകര്‍ ബാരിക്കേഡ് തള്ളിയിട്ട് മുന്നേറാന്‍ ശ്രമിച്ചതോടെയാണ് പോലീസ് ആദ്യം ജലപീരങ്കി പ്രയോഗിച്ചത്. അതിനിടേ ജില്ലാവൈസ് പ്രസിന്‍റ് അഞ്ജു ജോസ്റ്റിക്ക് പരിക്കേറ്റ് ബോധരഹിതയായി. പിന്നീട് പ്രവര്‍ത്തകര്‍ തന്നെ വാഹനത്തില്‍ ആശുപത്രിയിലേക്ക് മാറ്റി. വോട്ടു ബാങ്കിന്റെ പേരില്‍ ജലീലിനെ മുഖ്യമന്ത്രി സംരക്ഷിക്കുകയാണ്. അഴിമതി മൂടി വെക്കാനുള്ള നീക്കം തുടര്‍ന്നാല്‍ സമരം ശക്തമാക്കുമെന്നും കമറുദ്ദീനെതിരെ ദിനം തോറും ഉയരുന്ന പരാതികള്‍ പോലീസിന്‍റെ അനാസ്ഥക്ക് തെളിവാണെന്നും മാര്‍ച്ച് ഉദ്ഘാടനം ചെയ്ത ബിജെപി ജില്ലാ അധ്യക്ഷന്‍ കെ ശ്രീകാന്ത് പറഞ്ഞു.

Also Read: മതത്തിന്‍റെ അതിര്‍വരമ്പുകള്‍ ഭേദിച്ച് യുവാക്കള്‍, കൊവിഡ് ബാധിച്ച് മരിച്ച മഹാലിങ്കന്‍റെ മൃതദേഹം മതാചാരപ്രകാരം സംസ്‌കരിച്ചത് മുസ്ലീം ചെറുപ്പക്കാര്‍

മന്ത്രി കെടി ജലീലിന്‍റെ രാജി ആവശ്യപ്പെട്ട് കഴിഞ്ഞ കുറച്ചു ദിവസങ്ങളായി യുവമോര്‍ച്ച സംസ്ഥാനത്തുടനീളം ശക്തമായ പ്രതിഷേധ പ്രകടനങ്ങളാണ് സംഘടിപ്പിക്കുന്നത്. നേതാക്കളായ സുധീര്‍ പറക്കളായി, സാഗര്‍, എന്‍ സതീശന്‍, ജയരാജ്, ടിആര്‍ സുനില്‍ തുടങ്ങിയവര്‍ മാര്‍ച്ചിന് നേതൃത്വം നല്‍കി.