യുവാക്കള്‍ പടിക്ക് പുറത്ത് തന്നെ... കൊല്ലത്ത് കോൺഗ്രസിനെതിരെ വീണ്ടും യൂത്ത് കോൺഗ്രസിന്‍റെ പടയൊരുക്കം

പത്ത് ശതമാനം പോലും സീറ്റ് യുവാക്കൾക്ക് ഇല്ലാത്ത അവസ്ഥയാണ് കൊല്ലം ജില്ലയിലുള്ളത്. കെപിസിസി സർക്കുലർ പ്രകാരം കഴിഞ്ഞ തവണ റിബൽ സ്ഥാനാർത്ഥികളായവരെ പരിഗണിക്കരുതെന്നാണ് നിർദേശം. ജനറൽ സീറ്റുകളിൽ വനിതകളെ ഒഴിവാക്കണം, ഭർത്താവ് മാറിയാൽ ഭാര്യ മത്സരിക്കുന്ന രീതി ഉണ്ടാകരുതെന്നും സർക്കുലറിൽ പറയുന്നു. എന്നാൽ സർക്കുലറിൽ നിർദേശിക്കുന്നതൊന്നും കോൺഗ്രസ് പ്രാദേശിക നേതാക്കൾ ഉൾക്കൊള്ളുന്നില്ലെന്ന് യൂത്ത് കോൺഗ്രസ് ആരോപിക്കുന്നു.

പഞ്ചായത്തുകളുടെയും മുനിസിപ്പാലിറ്റികളുടെയും കോർപ്പറേഷന്‍റെയും മുന്നിൽ അഴിമതിക്കെതിരെ സമരം ചെയ്യാനും അടികൊള്ളാനും കേസിൽ പ്രതികളാകാനും യൂത്ത് കോൺഗ്രസുകാർ വേണം. എന്നാൽ സീറ്റിന്‍റെ കാര്യം വരുമ്പോൾ പുത്തൻ ഉടുപ്പും ഇട്ട് ഏതെങ്കിലും നേതാക്കന്മാരുടെ നോമിനിയെന്ന സർട്ടിഫിക്കറ്റുമായി ചില ആൾക്കാർ അവതരിക്കുന്നു. ഇത് അംഗീകരിക്കാനാവില്ല.

ജനറൽ സീറ്റുകളിൽ വനിതകളെ ഒഴിവാക്കി യുവാക്കൾക്ക് പരമാവധി അവസരങ്ങൾ നല്കാൻ പാർട്ടി നേതൃത്വം തയ്യാറാവണമെന്നാണ് യൂത്ത് കോൺഗ്രസ് നിലപാട്. കെപിസിസി സർക്കുലറിൽ ഇക്കാര്യം പറയുന്നുണ്ടെന്നും അവർ ഓർമ്മിപ്പിക്കുന്നു. യൂത്ത് കോൺഗ്രസിന്‍റെ ഉന്നത സ്ഥാനങ്ങളിൽ ഇരിക്കുന്ന നേതാക്കളെ പോലും അവഗണിച്ചാണ് പ്രാദേശിക നേതൃത്വങ്ങൾ മുന്നോട്ട് പോകുന്നതെന്നും ഇതിനെ അംഗീകരിക്കാൻ കഴിയില്ലെന്നും പ്രേംരാജ് പറയുന്നു.