പരസ്യ പ്രതികരണവുമായി സിപിഐ
പത്തനാപുരത്ത് നിന്നുള്ള സിപിഎം ജില്ലാ കമ്മിറ്റി അംഗങ്ങൾ, പത്തനാപുരം ഏരിയ സെക്രട്ടറി എൻ ജഗദീശൻ, ഏരിയ കമ്മിറ്റിയിലെ മുതിർന്ന അംഗങ്ങൾ തുടങ്ങിയവരാരും കൂട്ടായ്മയിൽ പങ്കെടുക്കാൻ എത്തിയില്ല. ജനാധിപത്യ പ്രതിഷേധങ്ങളെ അടിച്ചമർത്താൻ ശ്രമിക്കരുതെന്ന നിലപാട് തുടക്കം മുതൽ സ്വീകരിച്ച സിപിഐയുടെ മുതിർന്ന നേതാക്കളും വിട്ടു നിന്നു. കോക്കാട് ക്ഷീരോൽപ്പാദന സഹകരണ സംഘം കെട്ടിടത്തിന്‍റെ ഉദ്ഘാടനത്തിന് കോൺഗ്രസിന്‍റെ ജനപ്രതിനിധികളെ ക്ഷണിക്കാതിരുന്നതിലെ പ്രതിഷേധമാണ് ഗണേഷും യുഡിഎഫും തമ്മിലുള്ള പ്രശ്നങ്ങളുടെ തുടക്കം.
യൂത്ത് കോണ്‍ഗ്രസ് പ്രവര്‍ത്തകര്‍ക്ക് മര്‍ദ്ദനം
ഗണേഷിന്‍റെ വാഹനം വഴിയിൽ തടയാൻ ശ്രമിച്ച യൂത്ത് കോൺഗ്രസ് പ്രവർത്തകരെ മുൻ പിഎ പ്രദീപ് കോട്ടാത്തലയുടെ നേതൃത്വത്തിൽ മർദിച്ചു. പിന്നീട് ചവറയിൽ ഗണേഷിന്‍റെ വാഹനം തടഞ്ഞ യൂത്ത് കോൺഗ്രസ് വനിതാ നേതാക്കൾ ഉൾപ്പെടെ ഉള്ളവരെയും പ്രദീപിന്‍റെ നേതൃത്വത്തിൽ കയ്യേറ്റം ചെയ്യാൻ ശ്രമിച്ചു. സർക്കാർ ഫണ്ടുപയോഗിച്ച് നിർമ്മിക്കുന്ന കെട്ടിടങ്ങളുടെ ഉദ്ഘാടന ചടങ്ങിൽ നിന്ന് ജനപ്രതിനിധികളെ ഒഴിവാക്കുന്നത് ശരിയല്ലെന്നായിരുന്നു കോക്കാട് ക്ഷീര സംഘത്തിന്‍റെ കെട്ടിട ഉദ്ഘാടന ചടങ്ങിൽ നിന്ന് കോൺഗ്രസ് ജനപ്രതിനിധികളെ ഒഴിവാക്കിയ സംഭവത്തിൽ സിപിഐയുടെ നിലപാട്.
സിപിഐ-സിപിഎം ഐക്യം
സിപിഐ കടുത്ത നിലപാട് സ്വീകരിച്ചതോടെ ഒന്നും മിണ്ടാതിരുന്ന സിപിഎമ്മും പ്രതിരോധത്തിലായി. ഗണേഷ് കുമാര്‍ എംഎൽഎയും സിപിഎം സിപിഐ പത്തനാപുരം നേതൃത്വങ്ങളും തമ്മിൽ വലിയ ഐക്യത്തിലല്ല ഏറെ കാലമായി പോകുന്നത്. ഗണേഷിന്‍റെ പല പ്രവർത്തനങ്ങളോടും സിപിഎം പത്തനാപുരം ഏരിയാ കമ്മിറ്റിക്ക് വിയോജിപ്പുകളുണ്ടെന്നാണ് വിവരം.
തെരുവ് യുദ്ധം
ഗണേഷിന്‍റെ നേതൃത്വത്തിൽ കേരള കോൺഗ്രസ് യുഡിഎഫിലേക്ക് മടങ്ങാൻ ശ്രമം നടത്തുന്നുവെന്ന വാർത്തകൾ മുമ്പ് പുറത്ത് വന്നിരുന്നു. ഇത്തരം വാർത്തകൾ പത്തനാപുരത്തെ പ്രാദേശിക സിപിഎം നേതൃത്വങ്ങളെ അസ്വസ്ഥരാക്കിയെങ്കിലും പാർട്ടി സംസ്ഥാന നേതൃത്വവുമായി ഗണേഷ് നല്ല ബന്ധം സൂക്ഷിക്കുന്നുണ്ട്. യൂത്ത് കോൺഗ്രസ് പ്രവർത്തകരുമായുണ്ടായ കോക്കാട്ടെ തർക്കം ജില്ലയിലാകെ തെരുവ് യുദ്ധത്തിലേക്ക് നീണ്ട സാഹചര്യത്തിൽ യുഡിഎഫിലേക്ക് ഇനിയൊരു മടങ്ങി പോക്കിനുള്ള സാധ്യതയും ഗണേഷിന് മുമ്പിലില്ല.