ഉത്ര കൊലക്കേസില്‍ സുഹൃത്തുക്കളുടെ നിര്‍ണായക മൊഴി; കൊലപാതക വിവരം അറിഞ്ഞിരുന്നു!

ഇന്നലെ സൂരജിൻ്റെ മൂന്ന് സുഹൃത്തുക്കളുടെ മൊഴിയാണ് അന്വേഷണ സംഘം ശേഖരിച്ചത്. ഇതിൽ ഒരാൾ സൂരജിൻ്റെ സഹോദരിയുടെ സഹപാഠിയും മറ്റ് രണ്ടുപേര്‍ അടൂര്‍ പറക്കോട് സ്വദേശികളുമാണ്. സൂരജുമായുള്ള സൗഹൃദം, ഉത്രയുമായുള്ള വിവാഹം, പാമ്പ് പിടുത്തക്കാരൻ സുരേഷുമായുള്ള അടുപ്പം തുടങ്ങിയ കാര്യങ്ങളാണ് അന്വേഷണ സംഘം ചോദിച്ചറിഞ്ഞത്. ഇവരെ സൂരജിൻ്റെ സാന്നിധ്യത്തിൽ ചോദ്യം ചെയ്യാനാണ് അന്വേഷണ സംഘത്തിൻ്റെ തീരുമാനം.

പാമ്പിനെ കൊണ്ട് കൊത്തിച്ച് ഉത്രയെ കൊലപ്പെടുത്തിയ വിവരം തന്നെ അറിയിച്ചിരുന്നതായി ഒരു സുഹൃത്ത് മൊഴി നൽകി. ഉത്രയുടെ കൊലപാതകത്തിൻ്റെ അന്വേഷണം ഊര്‍ജിതമായതോടെ സൂരജ് ഭയപ്പെട്ടിരുന്നു. ഭയം എന്തിനെന്ന് ചോദിച്ചപ്പോളാണ് കൊലപാതക വിവരം സൂരജ് വെളിപ്പെടുത്തുന്നത്. അറസ്റ്റിന് മുന്നോടിയായി മുൻകൂര്‍ ജാമ്യത്തിനുള്ള ശ്രമം നടന്നുവെന്നും സുഹൃത്ത് അന്വേഷണ സംഘത്തോട് വ്യക്തമാക്കി.

ഉത്രയെ കൊലപ്പെടുത്താൻ ഭര്‍ത്താവ് സൂരജിന് മറ്റാരുടെയെങ്കിലും സഹായം ലഭിച്ചിട്ടുണ്ടോയെന്ന് അന്വേഷണ സംഘം സംശയിക്കുന്നു. ഇതിനു പുറമേ പാമ്പിനെ കൊണ്ട് കൊത്തിക്കുന്നതിനു മുൻപ് അബോധാവസ്ഥയിൽ എത്തിക്കാൻ ഉറക്കഗുളികയ്‍ക്കൊപ്പം ലഹരിമരുന്നും ഉത്രയ്ക്കു നൽകിയോ എന്നും പോലീസ് സംശിയിക്കുന്നുണ്ട്. സൂരജിൻ്റെ അറസ്റ്റിനുശേഷം മാധ്യമങ്ങൾക്കു മുന്നിലുള്ള വികാര പ്രകടനങ്ങളും പോലീസ് സംശയിക്കുന്നു. നിരപരാധി ചമയാൻ സൂരജിന് പരിശീലനം ലഭിച്ചോയെന്ന് അന്വേഷണ ഉദ്യോഗസ്ഥ‍ര്‍ സംശയിക്കുന്നുണ്ട്.

സൂരജിൻ്റെ മാതാവ് രേണുക, സഹോദരി സൂര്യ എന്നിവരെ ഇന്ന് ക്രൈംബ്രാഞ്ച് ഡിവൈഎസ്‍പി എ അശോകിൻ്റെ നേതൃത്വത്തിലുള്ള സംഘം ചോദ്യം ചെയ്യും. ഇവരോട് കൊട്ടാരക്കര ഓഫീസിലേക്ക് എത്താൻ അറിയിച്ചിട്ടുണ്ട്.